ءوز كەزەگىندە باسقارما باسشىسى ساكەن ەسىركەپ مەرەكەنىڭ اۋقىمى كەڭەيە بەرەتىنىن ايتىپ, قاتىسۋشىلارعا العىسىن ءبىلدىردى. «اباي كۇنى – التى الاشتىڭ رۋحاني مەرەكەسى. ول بىرنەشە كۇنگە جالعاسىپ, حالىق اراسىندا ناسيحاتتالىپ جاتسا, ەلدىگىمىزدىڭ ايعاعى. ال بۇگىنگى دومبىرا دۋمانىنىڭ باستى قاتىسۋشىلارى – جاستار. ولاردىڭ قايرات-قۋاتى, جاسامپاز ويى مەرەكەگە جالپىحالىقتىق سيپات بەرەتىنى داۋسىز. سوندىقتان رۋحاني تامىردان اجىراماعان وسكەلەڭ ۇرپاققا ءبىزدىڭ تاراپىمىزدان ءاردايىم قولداۋ كورسەتىلەدى», دەدى ول.
ساحنادا قازاق ۇلتتىق ونەر ۋنيۆەرسيتەتىنىڭ ستۋدەنتتەرى, ۇلىتاۋ, ماڭعىستاۋ, اباي تۋعان سەمەي توپىراعىنان كەلگەن قالا قوناقتارى ءان ايتىپ, ولەڭ وقىدى. كەش بارىسىندا جاڭبىر جاۋىپ كەتسە دە, حالىق ءمىز باققان جوق. كەرىسىنشە, اباي رۋحىمەن تىنىستاپ, استانانىڭ اسپانىن ودان سايىن ارايلاندىردى.
«حاكىم رۋحى ارقىلى كوپتەن بەرى ءۇزىلىپ قالعان «Dombyra party» جانداندى. حالىق وتە جىلى قابىلدادى. كورەرمەندەر اراسىنان اۋەسقوي دومبىراشىلار شىعىپ, ساحنادا ءوز ونەرىن كورسەتتى. ەڭ باستىسى, اباي اتامىزدىڭ شىعارمالارى جاستار ۇنىمەن جاڭعىردى», دەيدى كەش جۇرگىزۋشىسى الماس التاي.
ايتا كەتەيىك, كەلەسى دومبىرا-دۋمان 24 تامىز كۇنى وتەدى.
