وقۋ جىلىنا دايىندىعىن تەكسەردى

مونيتورينگ بارىسىندا ەلىمىزدىڭ بارلىق مەكتە­بىن­دە­گى اعىمداعى جوندەۋ جۇمىسى ءتامامدالىپ, ال كۇردەلى جوندەۋ جۇمىسى 280 ءبىلىم مەكەمەسىندە جالعاسىپ جاتقانى انىقتالعان. سونداي-اق روبوتتەحنيكا, حيميا, بيولوگيا, فيزيكا جانە STEAM-باعىتتارعا ارنالعان 1383 پاندىك كابينەت ساتىپ الۋ بويىنشا جۇمىستار بەلسەندى اتقارىلىپ جاتىر.

بۇگىندە ءبىلىم بەرۋ ۇيىمدارىنىڭ وقۋلىق­تارمەن قامتاماسىز ەتىلۋى 90 پايىزدى قۇراعان. سوندىقتان ءبىلىم باسقارمالارىنىڭ باسشىلارىنا مەكتەپتەردى وقۋلىقتارمەن قامتۋ بويىنشا جۇمىستى جەدەلدەتىپ, ونى وقۋشىلارعا 25 تامىزعا دەيىن تاراتۋ تاپسىرىلدى.

ء«بىز مونيتورينگ كەزىندە ايماقتاعى بارلىق مەكتەپتىڭ جاعدايى مەن جاڭا وقۋ جىلىنا دايىندىعىن مۇقيات تەكسەردىك. باستى ماقساتىمىز – وقۋشىلارعا قاۋىپسىز ءارى جايلى جاعداي جاساۋ. جاڭا وقۋ جىلىن جەمىستى باستاۋ ءۇشىن جەرگىلىكتى اتقارۋشى ورگاندارمەن تىعىز بايلانىستا جۇمىس ىستەۋدى جالعاستىرامىز», دەيدى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.

ايتا كەتەيىك, الداعى 1 قىركۇيەكتەن ەلىمىز­دەگى 7,9 مىڭ ءبىلىم ۇيىمىندا 3,9 ملن وقۋشى ءبىلىم الادى. سوعان بايلانىستى وقۋ-اعارتۋ مينيسترلىگى ايماق اكىمدىكتەرىنە مەكتەپتەردى ىسكە قوسۋ مەرزىمىنىڭ كەشىكپەۋىنە جول بەرمەۋ ءۇشىن بارلىق قاجەتتى شارانى قابىلداۋدى ۇسىندى.