ايتۋلى ءىس-شارانىڭ اشىلۋىندا ءسوز العان وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا فورۋمنىڭ ماڭىزىنا توقتالا كەلىپ, مۇعالىم – ەلىمىزدەگى رەسمي مارتەبەسى بەلگىلەنگەن جالعىز ماماندىق ەكەنىن جەتكىزسە, «نازارباەۆ زياتكەرلىك مەكتەپتەرى» دببۇ باسقارما توراعاسى ءانۋار جانعوزين وسىمەن ءۇشىنشى مارتە ءوتىپ وتىرعان فورۋمنىڭ جاس مۇعالىمدەردىڭ باسىن قوساتىن تاماشا داستۇرگە اينالعان الاڭ ەكەنىن اتاپ ءوتتى. ال «Esen Foundation» جانە «Ansa» قورلارى كونسورتسيۋمىنىڭ وكىلى كاميلا باشاروۆا ءىس-شارا مازمۇنى تۋرالى ايتا كەلىپ, «بالا كىمدى جاقسى كورسە, سودان ۇيرەنەدى. سىنىپقا كىرگەندە, الدارىڭىزدا ەلىمىزدىڭ بولاشاعى تۇرعانىن ۇنەمى ەستە ساقتاڭىزدار», دەپ پەداگوگ جاۋاپكەرشىلىگى جايىندا سالماقتى وي ساباقتادى.
فورۋم ەركىن فورماتتا ءوتتى. وعان وقۋ-اعارتۋ ءمينيسترى عاني بەيسەمباەۆ قاتىسىپ, جاس مۇعالىمدەرمەن ەمىن-ەركىن اڭگىمەلەسىپ, ولاردىڭ قويعان سۇراقتارىنا جاۋاپ بەردى. مينيستر اڭگىمە بارىسىندا پەداگوگ ماماندىعىنىڭ ماڭىزىنا كەڭىرەك توقتالدى.
«پەداگوگ ماماندىعى – بۇل قىزمەت قانا ەمەس, ەلىمىزدىڭ بولاشاعىن قالىپتاستىرۋ جولىنداعى ابىرويلى مىندەت. ءبىز بالالارىمىزدىڭ وقۋى مەن دامۋى ءۇشىن بارلىق جاقسى جاعدايدى قامتاماسىز ەتۋىمىز كەرەك», دەگەن عاني بەكتاي ۇلى پەداگوگتىك جۇمىس بارىسىندا وقۋشىلارمەن جاقىن جۇمىس ىستەۋ, ولاردىڭ پسيحولوگيالىق ەرەكشەلىكتەرىن تانۋ, ءبىلىم بەرۋ ۇدەرىسىندە جاساندى زەردەنى قولدانۋ, فۋنكتسيونالدىق ساۋاتتىلىقتى قالىپتاستىرۋ جانە ەموتسيونالدىق ينتەللەكتىنى دامىتۋ تۋرالى ماسەلەلەردى ءسوز ەتتى.
سونداي-اق ءىس-شارا بارىسىندا جاس پەداگوگتەر ء«ار ساباقتى قالاي ەرەكشە ەتۋگە بولادى: مەنىڭ تاجىريبەم» جانە «Edunext: بولاشاقتاعى تسيفرلىق ءبىلىم» اتتى تانىمدىق شەبەرلىك ساعاتتارىن جۇرگىزىپ, ءبىر-بىرىمەن تاجىريبە الماسىپ, وي ءبولىستى.
اسىرەسە فورۋمدا «قاناتتىلار» ينكليۋزيۆتى تەاترىنىڭ كوركەمدىك جەتەكشىسى ارنۇر ىسقاقوۆ, شىعىس قازاقستان وبلىسى ق ۇلىنجون اۋلىنداعى «مەكتەپ-بوبەكجاي-بالاباقشا كەشەنىنىڭ» ديرەكتورى ارالبەك بەرىك ۇلى دۋشانبەلىك مەكتەپتىڭ ديرەكتورى مەحرون ورتيكوۆ, «ايچۋرەك» بىشكەك كىزدار ليتسەيىنىڭ ديرەكتورى ەرلان ساتاروۆ, الەۋمەتتىك يننوۆاتورلار قاۋىمداستىعىنىڭ پرەزيدەنتى ەمين اسكەروۆ جانە جوعارىدا اتالعان ءبىلىم بەرۋ ۇيىمىنىڭ تۇلەگى ءارى دەربەس ساراپشىسى لاۋرا ۆايگوروۆانىڭ موتيۆاتور-كوشباسشى رەتىندە وزدەرىنىڭ قول جەتكىزگەن جەتىستىكتەرى تۋرالى ايتقان قىزىقتى اڭگىمەلەرى مەن تاجىريبەلەرى ءار ايماقتان كەلگەن جاس مۇعالىمدەرگە قانات بەرىپ, شابىتتاندىردى.
