ماسەلەن, سۇڭگۋىر قايىق جابدىقتارىن يزولياتسيالاۋعا تەك وسى زاۋىتتىڭ كابەلدەرى قولدانىلادى ەكەن. سۇڭگۋىر قايىق دەگەننىڭ ءوزى ەلەكتر قۋاتىنان ءبىر ءسات تە ايىرماي, ادامنىڭ جۇرەگى سياقتى تىنىمسىز جۇمىس ىستەپ تۇرادى عوي. سوندايدا كابەلدەر قالاي قىزباسىن؟ قۇرال-جابدىقتارى ءتىپتى قول تيگىزبەي ىسيتىن كورىنەدى. وعان تەك ساپاسى وتە جوعارى كابەلدەر عانا شىداس بەرەدى. ال ولار ءبىزدىڭ پەتروپاۆلدا جاسالعان.
90-جىلداردىڭ باسىنداعى ەكونوميكالىق داعدارىس كەزىندە وسى زاۋىتتىڭ دا بارلىق قۇرال-جابدىعى مەن شيكىزاتتىق ماتەريالدارى تالان-تاراجعا ءتۇستى.
اسكەري زاۋىت بولعاندىقتان باقىلاۋ دا از بولعان سياقتى, ايتەۋىر كوپ دۇنيەلەرى رەسەيگە تاسىلىپ اكەتىلگەنى انىق. مىنە, وسى زاۋىتتىڭ سىلەمىنە «يزوليت» كاسىپورىنى يە بولىپ قالعان. 1992 جىلدىڭ 9 قاڭتارىندا «يزوليت» جشس جۇمىسىن باستايدى. سودان بەرگى 32 جىلدا «يزوليت» پەتروپاۆلداعى ءجۇز ادامداي ادام ناپاقاسىن ايىراتىن شاعىن كاسىپورىنعا اينالدى. 2017 جىلدىڭ قاراشا ايىنان باستاپ باس ديرەكتور قىزمەتىن الەكساندر بەبەشكو اتقارىپ كەلەدى.
ونىمدەرى كاسىبي ماماندارعا بولماسا, جالپاق كوپشىلىككە تانىمال ەمەس. ونەركاسىپكە قولدانىلاتىن ماتالار, ەلەكتريزولياتسيالىق ماتالار, شىنىۆولوكنادان جاسالاتىن يزولياتورلار, سليۋدالار, لاكتار, جەلىمدى بوياۋلار, مەكانيتتەر شيكىزات رەتىندە قولدانىلىپ, ەلەكتريزولياتسيالىق دايىن ونىمدەر جاسالادى. ولاردىڭ قاتارىندا تۇرمىستا ءجيى قولدانىلاتىن يزولەنتادان باستاپ ەلەكتريزولياتسيالىق جۇقا ماتەريالدار, جوعارى ءۆولتتى ەلەكترماشينالارىنا ارنالعان يزولياتسيالىق وراۋىشتار, ماشينانىڭ كوللەكتورىنا ارنالعان شىرماۋىقتار, قاعازعا شايىر ءسىڭىرىلىپ, پرەستەلگەن ماتەريالدار, ۇنەمى قىسىمدا بولاتىن تەمىر ماتەريالداردىڭ اراسىنا سالىناتىن يزولياتسيالىق ساقينالار سەكىلدى 60 شاقتى ءونىم ءتۇرى بار.
كاسىپورىن 2023 جىلدىڭ قورىتىندىسى بويىنشا بيۋدجەتكە 80 ملن تەڭگەدەي سالىق تولەدى. ونىڭ ونىمدەرىن «قازاقستان تەمىر جولى», رەسەيدىڭ جانە باسقا مەملەكەتتەردىڭ تەمىرجول مەكەمەلەرى تۇتىنادى. الىس شەتەلدەردىڭ اراسىندا قىتاي مەن ءۇندىستان كاسىپكەرلەرى پەتروپاۆلدىق زاۋىت ونىمدەرىنە مۇقتاجدىق ءبىلدىرىپ وتىر. قورعانىس كاسىپورىندارى «يزوليت» شىعاراتىن «ارگوف-ەپ» اتتى ەلەكتريزولياتسيالىق ەمالدى ۇلكەن سۇرانىسپەن الادى. بۇل – ەپوكسيدتى شايىردان جاسالىپ, ارناۋلى ورىنداردا عانا قولدانىلاتىن ەلەكتريزولياتسيالىق ءونىم.
«ۇنەمى سۇرانىستا بولىپ, كليەنتتەردىڭ كوڭىلىنەن شىعىپ وتىرۋ ءۇشىن ونىمدەردىڭ ساپاسى وتە جوعارى بولۋى كەرەك. سوندىقتان مۇندا ءونىم ساپاسىنا قاتتى كوڭىل ءبولىنىپ, ولاردىڭ مەملەكەتتىك ستاندارتقا سايكەستىگى ءتۇرلى ولشەگىش قۇرالدارمەن ءجىتى تەكسەرىلەدى. جاراماي قالعان ماتەريالدار بىردەن جويىلادى. بىزدە ءار كۇنى تەحنولوگتەردىڭ جۇمىسىنا باقىلاۋ جاسالادى. تەحنيكالىق باقىلاۋ قىزمەتكەرلەرىنە تالاپ كۇشتى. جابدىقتاۋشىلار, ماركەتولوگتەرگە دا قاتاڭ تالاپتار قويامىز», دەيدى باس ديرەكتور الەكساندر بەبەشكو.
كومپانيا 2020 جىلى پرەزيدەنتتىڭ «التىن ساپا» سىيلىعىنىڭ شەڭبەرىندە بەرىلەتىن «ىسكەر» ارنايى سىيلىعىن الدى. بۇعان دەيىن ول پرەزيدەنت تاعايىنداعان «پارىز» سىيلىعىنىڭ «ەكولوگيانى تازارتۋعا قوسقان ۇلەسى ءۇشىن» اتالىمىن جەڭىپ العان ەدى. «يزوليت» جشس كاسىپكەرلەر پالاتاسىمەن دە, جەرگىلىكتى اكىمدىكپەن دە تىعىز بايلانىس ورناتىپ, بارلىق مەملەكەتتىك جانە قوعامدىق ءىس-شارالارعا بەلسەندى قاتىسىپ وتىرادى.
ء«بىز بولاشاققا ۇلكەن سەنىممەن قاراپ, كاسىپورنىمىزدىڭ دامىپ, قىزمەتكەرلەرىمىزدىڭ جانە ەلىمىزدىڭ جاقسى تۇرمىسقا جەتۋى جولىندا ايانباي قىزمەت ەتەمىز», دەيدى الەكساندر بەبەشكو.
پەتروپاۆل
