ماحمۇت اۋلەتىنىڭ ورمان شارۋاشىلىعىنداعى ەڭبەگى سوناۋ 1971 جىلدان باستالادى. ەڭبەك باستاۋىنىڭ ەڭ ۇشىندا تۇرعان بىلىكتى ورمانشى ومىرزاق مۇقاتاي ۇلى ەدى. ەڭ العاش ول قارقارالىنىڭ ورمان شارۋاشىلىعىنا ورمانشى بولىپ جۇمىسقا ورنالاسادى. ەكى جىلدان سوڭ بىلىكتىگىن بىلگەن سول كەزدەگى ورمان شارۋاشىلىعىنىڭ باسشىلىعى ونى باس ورمانشىنىڭ كومەكشىسى رەتىندە قىزمەتىن وسىرەدى. ءبىر جىل بويى باس ورمانشىنىڭ قاسىندا ءجۇرىپ, ورمانعا قاتىستى وراسان جۇمىسقا باستاماشى بولادى. ءبىر جىلدان كەيىن تابيعاتى تامسانتاتىن كىماسار شاتقالىندا ورمانشى بولىپ اۋىسادى. قاۋىرت شارۋا, قاربالاس تىرشىلىكتەن قاشپايدى. دەنساۋلىعىنا بايلانىستى سونداي شەشىم قابىلداپتى. ول جەردە ون جىل ەڭبەك ەتەدى. جيىرما جىلعى ادال ەڭبەگى ەلەنىپ,«ەرەن ەڭبەگى ءۇشىن» مەدالى بۇيىرادى. ەسىمى «التىن كىتاپقا» جازىلدى.
اكە باستاعان ءىزدى ۇل-قىزدارى جالعاستىرادى. ۇلكەن ۇلى جانىبەك 1986 جىلدان باستاپ كىماسار شاتقالىندا مەملەكەتتىك ينسپەكتور-ورمانشى بولىپ قىزمەت اتقارىپ كەلەدى. اكەسى ۇلىنا بەس جىل قاتار جۇمىس ىستەگەندە بار بىلگەنىن ۇيرەتىپ كەتەدى. سونىڭ ارقاسىندا شاتقالداعى شارۋانى شىر اينالدىرىپ وتىر. قىرىق جىلعا جۋىق ۋاقىت تابان اۋدارماي كىماسارعا كەلەتىن تۋريستەرگە ورماننىڭ ەرەجەسىن ءتۇسىندىرىپ, ونداعى توعاي مەن كولدى قىزعىشتاي قوريدى. تاعى ءبىر ۇلى قانىبەك تە – 2003 جىلدان بەرى وسى ءبىر شاتقالدا ورمانشى. ول دا ءالى وسى ءبىر ۇيرەنگەن جەرىندە. كىماساردىڭ ساي-سايىن, ءار تاسىن, قاراعاي-ارشاسىن, قىبىرلاعان جاندىگىنە دەيىن ابدەن جاتتاپ العان.
– ءوز زامانىندا قادىرلى ورمانشى بولعان اكەمىز بالا كەزىمىزدەن بەرى وسى ءبىر ماماندىققا ۇيرەتتى. قىزدارىنا دەيىن ورمانشىنىڭ وقۋىن وقىتتى. ۇيدە بەس ۇل, ءۇش قىز وستىك. بارلىعىمىز دەمەيىك, تەڭ جارتىسى اكە جولىن جالعادىق. كورىپ وسكەن شارۋا بولعان سوڭ جاتتىق تانىتپادىق. كەرىسىنشە, جانىمىزعا جاقىن بولدى. قازىر نەمەرەلەرى دە, جيەندەرى دە وسى سالادامىز. تابيعاتپەن جانىمىز ۇندەس. ونىڭ ۇستىنە قىزمەتىمىزدى ابىرويلى اتقارساق, اۋلەتىمىزبەن اكەمىزدىڭ اماناتىنا ادال بولساق دەگەن ويىمىز بار. وسى ءبىر قارقارالىنىڭ نۋ ورمانىن اكەمىزدىڭ اماناتىنداي كورەمىز, – دەيدى جانىبەك ماحمۇت.
تاعى ءبىر باۋىرى قاناتبەك – 2004 جىلدان باستاپ قارقارالى ورمانشىلىعىندا ورمانشى. تالعات ومىرزاق ۇلى – 2005 جىلدان باستاپ قارقارالى مەملەكەتتىك ۇلتتىق تابيعي پاركىنىڭ تاۋ ورمانشىلىعىنىڭ ورمان شەبەرى. قاراماعىندا بەس ينسپەكتور بار. وزدەرىنە تيەسىلى اۋماقتى ورتتەن, زاڭسىز اڭ اۋلاپ, اعاش كەسەتىندەردەن ساقتايدى. ال ايداربەك 2014-2016 جىلدار ارالىعىندا قارقارالىنىڭ تابيعي پاركىنىڭ باقىلاۋ وتكىزۋ بەكەتىندە قىزمەت ىستەپ, قاراعاندىعا قونىس اۋداردى. قازىر قالانىڭ پريشاحتينسك بولىگىندەگى ءورت ءسوندىرۋ بولىمىندە ەڭبەك ەتىپ ءجۇر. گۇلنار ومىرزاققىزى 2012-2016 جىلدار ارالىعىندا ۇلتتىق پاركتە راديووپەراتور رەتىندە جۇمىس اتقاردى. ياعني بايلانىس جەلىسىنە جاۋاپتى مامان بولدى. ال شىنار ومىرزاققىزى 2010-2017 جىلدار ارالىعىندا قارقارالى ۇلتتىق تابيعي پاركىندە عىلىم جانە مونيتورينگ ءبولىمىنىڭ مونيتورينگ جونىندەگى باس مامانى قىزمەتىن ابىرويمەن اتقاردى. نەمەرەسى شىڭعىس جانىبەك ۇلى 2013 جىلدان باستاپ ورمان شەبەرى بولىپ ەڭبەك جولىن باستايدى. كەيىن اتاسىنىڭ ىزىمەن قارقارالى ورمانشىلىعىندا باس ورمانشىسىنىڭ كومەكشىسى بولىپ كوتەرىلەدى. قازىر – وسى جاۋاپتى قىزمەتتە.
– ورمانشى – مەملەكەتتىڭ ورمان قورىنا جاتاتىن بارلىق وسكىننىڭ جاقسى ءوسىپ, قورعالۋىنا جاۋاپ بەرەتىن ادام. اعاشتى ۇرلاپ كەسۋشىلەردەن عانا ەمەس, ورتتەن, سۋدان, ءتۇرلى وسىمدىك اۋرۋى مەن زياندى جاندىكتەن قورعاۋ مىندەتى دە بار. جالپى ايتقاندا, ءمىنسىز قىزمەت اتقارۋ كەرەك. ومىرزاق اتامىزدىڭ بۇرىنعى جولىمەن كەلە جاتىرمىن. ول كىسى دە باس ورمانشىنىڭ كومەكشىسى قىزمەتىن اتقاردى عوي. وتە جاۋاپتى جۇمىس. اكەم دە بەدەلدى ورمانشى. ماقتان تۇتامىن. جاۋاپكەرشىلىكتىڭ دە جۇگى اۋىر, – دەيدى ورمانشى نەمەرەسى شىڭعىس.
تاعى ءبىر نەمەرەسى الىبەك قانىبەك ۇلى – قارقارالى ۇلتتىق تابيعي پاركىندە شتاتتان تىس مەملەكەتتىك ينسپەكتور. باقىلاۋ وتكىزۋ بەكەتىندە تۋريستەرگە ورمان ەرەجەسىن تانىستىرادى. جيەن نەمەرەسى انار ويراتقىزى ناعاشىلارىنىڭ جولىن قۋىپ, قارقارالى ۇلتتىق پاركىندە عىلىم جانە مونيتورينگ ءبولىمىنىڭ اعا مامانى رەتىندە جۇمىس اتقارىپ ءجۇر.
قارقارالىداعى ماۋەلى بايتەرەكتەي جايقالعان ورمانشىلار اۋلەتى وسىنداي تىرشىلىك كەشىپ جاتىر.
قاراعاندى وبلىسى,
قارقارالى اۋدانى
