الديارحاننىڭ بالا كەزدەگى ارمانى – كاسكادەر بولۋ. سول ونەرىمەن شىتىرمان كينولارعا ءتۇسىپ, كورەرمەننىڭ كوزايىمىنا اينالعىسى كەلدى. كىشكەنتايىنان سوعان بەيىم بولدى دا. سپورتپەن شۇعىلداندى. ءالى دە سپورتتى سەرىك ەتىپ كەلەدى.
مەكتەپتە وقۋ وزاتى بولدى. شىعارماشىلىق كەشتەرگە بەلسەنە قاتىستى. مەكتەبىنىڭ ماقتانىشىنا اينالدى. اكتەر بولامىن دەگەن ارمانىنان اتا-اناسى الىستاتپايدى, جول اشادى. ءسويتىپ, قاراعاندى قالاسىنداعى تاتتىمبەت اتىنداعى ونەر كوللەدجىنە وقۋعا ءتۇسىپ, 2020 جىلى دراما تەاترىنىڭ ءارتىسى ماماندىعى بويىنشا ءبىلىم الىپ شىعادى.
جوعارى وقۋ ورنىنا ءتۇسىپ, ءبىلىمىن جەتىلدىرگىسى كەلەدى. قالادا قالىپ, بالا ارمانىن ورىنداعىسى دا كەلەدى. بىراق الديارحان ەكەۋىنەن دە باس تارتادى. ويتكەنى قارا شاڭىراقتا قالعان اتا-اناسىنا قامقورلىق كەرەك ەكەنىن تۇسىنەدى. ونىمەن قوسا جانىنا قالادان گورى دالا جاقىن ەكەنىن سەزىنەدى. ابدەن بارلىعىن وي ەلەگىنەن وتكىزگەن ول بار العان ءبىلىمىن اۋىل بالالارىنىڭ بويىنا دارىتايىن, ونەرگە دەگەن ماحابباتىن وياتايىن دەپ شەشەدى.
وسىلايشا ماماندىعى بويىنشا قارقارالى اۋدانىنداعى بالالار ونەر مەكتەبىنىڭ اپپاز اۋلىنداعى فيليالىندا تەاتر ونەر سىنىبىنا جەتەكشى بولىپ, جۇمىسىنا كىرىسەدى.
اۋىل بالالارىن جيناپ, تالانتتارىن اشادى. العاشقىدا سىنىبىنا 15 بالا كەلىپتى. اۋىلدان تەاتر اشىلعانى ۇلكەن جاڭالىق بولىپ, بالاسىن جەتەكتەپ كەلگەندەر كوبەيەدى. ءسويتىپ, از ۋاقىت ىشىندە بالالاردى ساحناعا شىعارادى.
الديارحان «Jas fund» جوباسى ارقىلى ەكى مارتە 300 مىڭ تەڭگەدەن قارجى الادى. وعان تەاترعا قاجەتتى جابدىقتار ساتىپ الادى.
العاش كسرو حالىق ءارتىسى قاليبەك قۋانىشباەۆتىڭ 130 جىلدىعىنا ارنالعان اۋداندىق «شولپان» تەاترلىق قويىلىم سايىسىندا اپپاز بالالار تەاترى باس جۇلدەنى يەلەنەدى. وندا «جۋسان ءيىسى» قويىلىمىن ءساتتى ورىنداپ شىققان. كەلەر جىلى تاعى دا «اڭدار الەمى – باۋىرساق» اتتى ورىس حالقىنىڭ ەرتەگىسىن جاڭاشا سيپاتتا الىپ شىققانى ءۇشىن باس بايگەنى ولجالادى. سول جولى «ۇزدىك قىز بالا» اتالىمىن جەڭىپ العان شاكىرتى ءسانىم رىمباي بولسا بولاشاعىنان كوپ ءۇمىت كۇتتىرەدى.
– مەنىڭ بالا كەزدەگى ارمانىم – تەاتر ءارتىسى بولۋ. بىراق بۇل ارمانىم مەكتەپ بىتىرگەننەن كەيىن عانا ورىندالادى دەپ ويلادىم. سودان اۋىلعا الديارحان مۇعالىم كەلىپ, تەاتر اشتى دەگەندى ەستىپ قاتتى قۋاندىم. ارمانىم ورىندالا باستاعانى تاڭعالدىردى. الديارحان اعاي بارلىعىن كەرەمەت تۇسىندىرەدى. رولگە قالاي كىرىپ, سومداۋ كەرەكتىگىن ۇيرەتەدى. «اڭدار الەمى – باۋىرساق» ەرتەگىسىندە تۇلكىنىڭ ءرولىن سومدادىم. بارىنشا ايلاكەر, قۋ بولۋ كەرەك. ەپتەپ قيىن بولدى. بىراق جەتەكشىمىزدىڭ ەڭبەگىنىڭ ارقاسىندا جەڭىل ويناپ شىقتىم. سول ءرولىم ءۇشىن اتالىم جەڭىمپازى اتاندىم. مەن ءۇشىن ۇلكەن جەتىستىك بولدى. اتا-انام دا, اۋىلداعىلار دا, ءبارى-ءبارى جەتەكشىمىزگە ريزا. قانشاما بالانىڭ ارمانىنا قانات ءبىتىردى. ءبىز جاناشىر جەتەكشىمىزدى ماقتان تۇتامىز, – دەيدى جاس ءارتىس ءسانىم رىمباي.
بۇل تەاتر جەتەكشىسىنىڭ اۋىل اراسىنداعى عانا جەتىستىگى ەكەن دەمەڭىز. بىلتىر جاس تەاتر مەملەكەتتىك قوسىمشا ءبىلىم بەرۋ سالاسىنداعى بالالار شىعارماشىلىعىنا ارنالعان رەسپۋبليكالىق «Burabay fest» جازدىق ويىن-ساۋىق جوباسىنان باس جۇلدە الىپ كەلىپ, اۋىلدى مارە-سارە قىلدى.
مۇنىمەن قوسا, اپپاز اۋلىنىڭ جاس اكتەرلەرى ەلورداداعى م.وتەمىسوۆ اتىنداعى وقۋشىلار سارايىندا وتكەن «Alash Star» حالىقارالىق بايقاۋىندا سايىن مۇراتبەكوۆتىڭ «جۋسان ءيىسى» دراماسى مەن «ارمان الەمى» ەرتەگىسىن زاماناۋي ۇلگىدە ۇسىنىپ, گران-پري مەن ءى ورىن يەلەنىپ قايتتى. تۇركيادا وتەتىن فەستيۆالعا جولداما الدى.
جاس تەاتر ءۇش-اق جىلدىڭ ىشىندە وسىنداي جەتىستىكتەرگە قول جەتكىزىپ جاتىر. ارينە, ول جۇمىسىنا ۇلكەن ماحابباتپەن كىرىسكەن الديارحاننىڭ ارقاسى.
جاس جەتەكشىنىڭ جەتىستىكتەرى ەلەۋسىز ەمەس. ەڭبەگىن ەسكەرگەن اۋىل اكىمى تەاتر اشقان جىلى «اپپاز جىل ۇزدىگى» سىيلىعىن تابىستاپتى.
– الديارحان اۋىلعا كەلگەندە قاتتى قۋانعانداردىڭ ءبىرى ءوزىم. بالا كەزىنەن ەلگەزەك ەكەنىن بىلەمىز. تەاتر اشامىن دەگەندە ءتىپتى قۋاندىم. قازىر شاكىرتتەرى بايقاۋعا بارسا, جۇلدەسىز قايتپايدى. اۋىلدىڭ اتىن شىعارىپ جۇرگەن تالانتتى جاستارى بار, ءبىز باقىتتىمىز, – دەيدى اۋىل اكىمى جولامان تىلەمىسوۆ.
قارقارالى اۋدانىنىڭ اكىمدىگى «ۇزدىك جاس مادەنيەت قىزمەتكەرى» دەگەن سىيلىقپەن دە ماراپاتتاپتى. جالعىز اپپازدىڭ عانا ەمەس, قارقارالىنىڭ ونەرىن ۇلىقتاپ جۇرگەن ۇلعا ابدەن لايىق قۇرمەت.
الديارحان دا اۋلىنىڭ ىمىرا-بىرلىگىنە ريزا. اۋىل تۇرعىندارى «بولامىن دەگەن بالانىڭ بەتىن قاقپاي بەلىن بۋدى». قۇشاق جايا قارسى الىپ, قولداۋ كورسەتتى. ءار شارۋاسىنا دەمەۋشىلىك بىلدىرەدى.
«كىندىك قان تامعان جەرگە ماڭداي تەر دە تامۋ كەرەك. ءبىزدىڭ شاعىن تەاترىمىزدان ەرتەڭ ۇلكەن ساڭلاقتار شىعادى. سولاردىڭ سول بيىككە جەتكەنى – مەنىڭ دە ارمانىم ورىندالعانى», دەيدى تەاتردىڭ جاناشىر جەتەكشىسى.
قاراعاندى وبلىسى,
قارقارالى اۋدانى,
اپپاز اۋىلى
