چەركاسسك اۋىلىنىڭ تۇرعىندارى كوپتەن كۇتكەن جاڭا دارىگەرلىك امبۋلاتوريا قولدانىسقا بەرىلدى. بۇرىن بەيىمدەلگەن عيماراتتا وتىرعان مەديتسينا مەكەمەسى ەندى قاجەتتى جاعدايلارى جاسالعان جاڭا ورىندا اۋىلدىڭ 2 500-گە جۋىق حالقىنا قىزمەت كورسەتەدى. وبلىس اكىمى ءباسپاسوز قىزمەتىنىڭ مالىمەتىنشە, بۇل نىسانعا 70 ملن قارجى جۇمسالعان.
عيماراتتىڭ اشىلۋ سالتاناتىنا چەركاسسك اۋىلدىق وكرۋگىنىڭ اكىمى ماقسات ايتجانوۆ پەن سارقان اۋداندىق ورتالىق اۋرۋحاناسى ديرەكتورىنىڭ ورىنباسارى ءبىرجان ۋاحانوۆ قاتىسىپ, اۋىل تۇرعىندارىن قۋانىشىمەن قۇتتىقتادى.
جالپى, بلوكتى-ءمودۋلدى قۇرىلىستى «شەبەرمەتالل» جشس 2023 جىلدىڭ قاراشاسىندا باستاپ, وسى جىلدىڭ شىلدەسىندە اۋماعى 240 شارشى مەترلىك جاڭا امبۋلاتوريانى پايدالانۋعا بەردى. بۇعان دەيىن اۋىلدىق دارىگەرلىك امبۋلاتوريا مەكتەپتىڭ باستاۋىش سىنىبىنا ارنالعان ەسكى تۇرعىنجايىندا, ياعني سانيتارلىق نورماعا ساي ەمەس بەيىمدەلگەن عيماراتتا وتىرعان ەدى.
اتالعان اۋىلدا 2 448 ادام تۇرادى. جاڭا عيماراتتا حالىققا ساپالى مەديتسينالىق قىزمەت كورسەتۋگە بارلىق جاعداي جاسالعان. دارىگەرلىك امبۋلاتوريا جالپى كۇنىنە 60 ادامدى قابىلداۋعا قاۋقارلى. سول سياقتى 5 ادامعا لايىقتالعان كۇندىزگى ستاتسيونار دا قاراستىرىلعان. مۇندا 3 دارىگەر, 9 ورتا بۋىن قىزمەتكەر, 1 كىشى بۋىندى جانە 2 باسقا دا قىزمەتكەر جۇمىس ىستەيدى. اۋىل تۇرعىندارى ءۇشىن پەدياتريالىق, تەراپەۆتىك, اكۋشەرلىك, ستوماتولوگيالىق كومەك كورسەتىلەدى. عيماراتتا دارىگەرگە دەيىنگى قارالۋ كابينەتى, ساۋ بالالاردىڭ كابينەتى, ەكپە, پروتسەدۋرا, دەزينفەكتسيا, زەرتحانا بولمەلەرى, ارنايى دارىگەرلەر كابينەتتەرى بار. سول سياقتى قاجەتتى قۇرال-جابدىقتار, سونىڭ ىشىندە ستەريلدى قۇرالدارعا ارنالعان ۋفو كامەرا, زەرتحانالىق تالداۋلارعا قاجەتتى اپپاراتتار تولىقتاي ورناتىلعان.
«اۋرۋدىڭ الدىن الۋ, ناۋقاستىڭ دياگنوزىن ءدوپ تاۋىپ, ۋاقىتىندا ەم-شارا قولدانىپ, حالىقتى دارىگەرلىك تەكسەرىستەن وتكىزىپ تۇرۋ – ءبىزدىڭ باستى مىندەتىمىز. مۇندا تۇرعىندار اۋداندىق ەمحاناعا بارماي-اق اناليز تاپسىرىپ, وسى جەردەن قورىتىندىسىن الا الادى. جاڭا زامانعى تەحنولوگياعا ساي جابدىقتالعان امبۋلاتوريادا ارنايى تالداما كابينەتى بار. وسىنداي قاجەتتى مۇمكىندىكتەر جاسالعان, ماتەريالدىق-تەحنيكالىق بازاسى بار جاڭا عيمارات مەديتسينالىق قىزمەت كورسەتۋ ساپاسىنىڭ ارتۋىنا ىقپال ەتەدى دەپ سەنەمىز», دەيدى امبۋلاتوريا مەڭگەرۋشىسى ءساليما
وتەۋلينوۆا.
جەتىسۋدا ءالى ونداعان اۋىل ءوز كەزەگىن كۇتىپ وتىر. كەلەر جىلى تاعى وسىنداي نىساندار الىستاعى ەلدى مەكەننىڭ قۋانىشىن ەسەلەيدى.
جەتىسۋ وبلىسى
