الدىمەن پرەزيدەنت تاپسىرماسىن ورىنداۋ ماقساتىندا ەلىمىزدىڭ جوعارى ءبىلىم مەن عىلىمدى دامىتۋدىڭ 2023-2029 جىلدارعا ارنالعان تۇجىرىمداماسىنا جوعارى ءبىلىم بەرۋ ساپاسىن جانە عىلىمي زەرتتەۋلەردىڭ ناتيجەلىلىگىن ارتتىرۋعا باعىتتالعان وزگەرىس ەنگىزىلدى. ماسەلەن, جوعارى وقۋ ورىندارىنداعى پروفەسسور-وقىتۋشى قۇرامىنىڭ جالاقى مولشەرى 160,7 مىڭ تەڭگەدەن 350 مىڭ تەڭگەگە دەيىن, ۇلتتىق جوعارى وقۋ ورىندارىندا 228,8 مىڭ تەڭگەدەن 400 مىڭ تەڭگەگە دەيىن ءوستى. ال بىلتىرعى ءبىرىنشى قاڭتاردان باستاپ عىلىمي ۇيىمدار قىزمەتكەرىنىڭ لاۋازىمدىق جالاقىسى 18 پايىزعا ارتسا, بيىلعى قاڭتاردان ولاردىڭ ەڭبەكاقىسى تاعى دا 18 پايىزعا, كەلەسى جىلعى قاڭتاردان 17 پايىزعا كوبەيەدى.
بۇدان بولەك, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا كوزدەلگەن نورمالار شەڭبەرىندە عىلىمي اتاقتاردىڭ بولۋى ءۇشىن عىلىمي قىزمەتكەرلەرگە قوسىمشا اقى مولشەرى ۇلعايتىلدى. بۇل زاڭعا مەملەكەت باسشىسى بيىلعى 6 مامىردا قول قويدى.
زاڭعا ەنگىزىلگەن تۇزەتۋلەردىڭ ءبىرىنشى جەلىسى پەداگوگتەر مەن عىلىمي قىزمەتكەرلەردىڭ ماتەريالدىق جاعدايىن جاقسارتۋعا ارنالعان. اتاپ ايتقاندا, بەلگىلى ءبىر عىلىمي دارەجەسى مەن اتاعى بار پەداگوگتەر ءۇشىن اي سايىن تولەنەتىن قوسىمشا اقى مولشەرى كوبەيدى.
ماسەلەن, فيلوسوفيا دوكتورى (PhD), بەيىنى بويىنشا دوكتور دارەجەسى ءۇشىن 17 اەك; فيلوسوفيا دوكتورى دارەجەسى (PhD) جانە قاۋىمداستىرىلعان پروفەسسور (دوتسەنت) عىلىمي اتاعى, بەيىنى بويىنشا دوكتور دارەجەسى جانە قاۋىمداستىرىلعان پروفەسسور (دوتسەنت) عىلىمي اتاعى ءۇشىن 25 اەك; عىلىم كانديداتى عىلىمي دارەجەسى ءۇشىن 17 اەك, عىلىم دوكتورى عىلىمي دارەجەسى ءۇشىن 34 اەك; عىلىم كانديداتى عىلىمي دارەجەسى جانە قاۋىمداستىرىلعان پروفەسسور (دوتسەنت) عىلىمي اتاعى ءۇشىن 25 اەك, عىلىم دوكتورى عىلىمي دارەجەسى جانە قاۋىمداستىرىلعان پروفەسسور (دوتسەنت) عىلىمي اتاعى ءۇشىن 42 اەك; فيلوسوفيا دوكتورى (PhD) دارەجەسى جانە پروفەسسور عىلىمي اتاعى, بەيىنى بويىنشا دوكتور دارەجەسى جانە پروفەسسور عىلىمي اتاعى ءۇشىن 50 اەك; عىلىم كانديداتى عىلىمي دارەجەسى جانە پروفەسسور عىلىمي اتاعى, عىلىم دوكتورى عىلىمي دارەجەسى جانە پروفەسسور عىلىمي اتاعى ءۇشىن 50 اەك مولشەرىندە اي سايىنعى قوسىمشا اقى بەلگىلەنەدى.
عىلىمي دارەجەسى مەن اتاعى ءۇشىن وسىنداي اي سايىنعى قوسىمشا اقى نەگىزگى جۇمىس ورنىندا عىلىمي-زەرتتەۋ جۇرگىزەتىن عىلىمي قىزمەتكەرلەرگە دە بەلگىلەندى.
سونداي-اق 40 جاسقا تولماعان تالانتتى جاس عالىمدارعا جوعارى نەمەسە جوعارى وقۋ ورنىنان كەيىنگى ءبىلىم بەرۋ ۇيىمىنىڭ ەنداۋمەنت-قورىنىڭ ينۆەستيتسيالىق كىرىس قاراجاتىنان ستيپەنديا الۋ قۇقىعى بەرىلدى.
