ەلدىڭ كۇتكەنى – «ەل-كلاسيكو»
فۋتبولدان يسپانيانىڭ قوس گراندى – كاتالونيانىڭ «بارسەلوناسى» مەن ءمادريدتىڭ «رەالى» اراسىنداعى باسەكە «ەل-كلاسيكو» دەپ اتالاتىنىن كورەرمەندەردىڭ ءبارى بىلەدى. بىتىسپەس قارسىلاستاردىڭ لا ليگاداعى تارتىسىن تورتكۇل دۇنيە جۇرتشىلىعى ءار جىل سايىن تاعاتسىزدانا كۇتەدى. كۇرەستىڭ دە «ەل-كلاسيكوسى» بار. جەر-جاھان جانكۇيەرلەرى پاريجدە 86 كگ سالماق دارەجەسىندەگى دەۆيد تەيلور (اقش) مەن حاسان ءيازدانيدىڭ (يران) جانە 97 كگ سالماقتاعى ابدۋلراشيد سادۋللاەۆ (رەسەي) پەن كايل سنايدەردىڭ (اقش) «جان الىسىپ, جان بەرىسكەن» ايقاسىن كورسەك دەپ ەرەكشە قۇشتارلاندى. بىراق عالامدىق دودادا اتالعان ارىستانداردىڭ جولى قيىسپادى. ونىڭ ءتۇرلى سەبەبى بار. ماسەلەن, 33 جاستاعى تەيلور اقش-تاعى ىشكى باسەكەلەستىككە شىدامادى. اتاعى الىسقا جايىلعان ءاپايتوس ىرىكتەۋ تۋرنيرىندە ويدا-جوقتا وزىنەن توعىز جاس كىشى, كادەتتەر مەن جاستار اراسىنداعى الەم بىرىنشىلىگىنىڭ (U-23) جەڭىمپازى اارون برۋكسكە ەسە جىبەردى. ساياسي جاعدايعا بايلانىستى حالىقارالىق وليمپيادا كوميتەتى (حوك) رەسەي سپورتشىلارىنىڭ باسىم بولىگىن تورتجىلدىقتىڭ باستى جارىسىنان شەتتەتكەنى بەلگىلى. سولاردىڭ اراسىندا اتاعىنان ات ۇركەتىن, وليمپيا مەن ەۋروپا ويىندارىنىڭ ەكى دۇركىن جەڭىمپازى, الەمنىڭ بەس جانە ەۋروپانىڭ ءتورت دۇركىن چەمپيونى 28 جاستاعى ابدۋلراشيد سادۋللاەۆ تا بار. سول ساتتە يازداني مەن سنايدەردىڭ چەمپيوندىق اتاققا تالاسۋ ءۇشىن ەندى ەش كەدەرگى جوقتاي كورىندى.
كەي جاعدايدا جورامالدىڭ جوققا شىعىپ جاتاتىنى بەلگىلى عوي. بۇل جولى ءداپ سولاي بولدى. اقتىق سىنعا دەيىن القىنباي جەتكەن حاسان يازداني شەشۋشى تۇستا بولگاريانىڭ تۋى استىندا كۇش سىناسىپ جۇرگەن داعىستاندىق ماگومەد رامازانوۆپەن بەلدەستى. بۇل باسەكەنىڭ ءفاۆوريتى پارسى ەلىنىڭ پەحلەۆانى ەدى. الايدا سىن ساعاتتا ونىڭ يىعى شىعىپ كەتتى. باسەكە بارىسىندا بىرنەشە رەت دارىگەردىڭ كومەگىنە جۇگىنگەن باتىر ۇل سوڭىنا دەيىن ايقاسۋعا بەل بۋدى. جاراقاتى جانىنا باتسا دا, باس جۇلدە ءۇشىن بارىن سالىپ, ەش ايانباي ايقاستى. بىراق وينامالى يىق ءيازدانيدىڭ ەركىن كوسىلۋىنە مۇمكىندىك بەرمەدى. جەڭىس رامازانوۆتىڭ ەنشىسىندە كەتتى. ەسەپ – 7:1.
فينالدا اۆار ۇلىنىڭ ازاماتتىق تانىتقانىن اتاپ وتكەن ءجون. رامازانوۆتا جارالى جولبارىستىڭ جاراقاتىن اسقىندىرامىن دەگەن نيەت تە بولعان جوق. ول ارامزا ارەكەتكە بارمادى. ايقىن باسىمدىقپەن ۇتۋعا بولاتىن تۇستا بولگاريالىق تارتىنىپ كۇرەستى. تاۋ ۇلىنىڭ اتاعى جەر جارعان قارسىلاسىنىڭ جىگەرىن جاسىتقىسى كەلمەگەنى سىرت كوزگە انىق بايقالدى. ونى ءيازدانيدىڭ ءوزى دە اڭعاردى. مىنە, مارتتىك دەگەن وسى ەمەس پە! باسەكە اياقتالعان تۇستا حاسان ماگومەدتى قۇشاعىنا قىسىپ, ماڭدايىنان ءسۇيدى. مىنە, قوس ەلدىڭ باتىرلارى ءبىر-ءبىرىن وسىلاي قۇرمەتتەدى. ناتيجەسىندە ماگومەد رامازانوۆ التىن السا, ريو وليمپياداسىنىڭ جەڭىمپازى حاسان يازداني عالامدىق دودادا قاتارىنان ەكىنشى رەت كۇمىسپەن كۇپتەلدى. گرەكيالىق داۋرەن كرۋگليەۆ پەن اارون برۋكس قولا مەدال ەنشىلەدى.
ريو-دە-جانەيرودا التىن الىپ, توكيودا كۇمىسكە قول سوزعان كايل سنايدەر الەم (3+2+2) مەن پانامەريكا چەمپيوناتتارىندا (7+0+0) جەتى جانە الەم كۋبوگى (2+1+0) مەن پانامەريكا ويىندارىندا (3+0+0) ءۇش رەتتەن جەڭىس تۇعىرىنىڭ ەڭ بيىك ساتىسىنا كوتەرىلگەن. بىلتىر بەلگرادتاعى دۇنيەجۇزىلىك دودادا اقش-تىڭ ءاپايتوسى باحرەيننىڭ تۋى استىندا كۇرەسكەن 20 جاستاعى اۆار ۇلتىنىڭ وكىلى احمەد تاجۋدينوۆتەن ويدا-جوقتا ۇتىلدى. ونىمەن قويماي احمەد ءوزىنىڭ داڭقى الىسقا جايىلعان قانداسى ءارى ۇستازى ابدۋلراشيد سادۋللاەۆقا دا سان سوقتىردى. سەنا وزەنىنىڭ جاعالاۋىندا قوس ءدۇلدۇلدىڭ جولى قايتا قيىستى. بۇل باسەكەدە دە تادجۋدينوۆتىڭ مىسى باسىم بولدى – 6:4. فينالدا ول گرۋزيالىق گيۆي ءماچاراشۆيليدى ءبىر جارىم مينۋتقا جەتكىزبەي, قوس جاۋىرىنىمەن جەرگە قادادى. يراندىق ءامىر ءالي ازارپيرا مەن بەلارۋستىك ماگومەدحان ماگومەدوۆ ءۇشىنشى ورىنعا تۇراقتادى.
جەڭىس تۇعىرىنداعى جامپوزدار
اتالعان جارىستاعى 65 كگ سالماق دارەجەسىنىڭ باستى ءفاۆوريتىن اتاۋعا دۋالى اۋىز مامانداردىڭ وزدەرىنىڭ جۇرەگى داۋالامادى. باس جۇلدەدەن دامەلىلەر اراسىندا ازەربايجاندىق گادجي اليەۆ, ماجارستاندىق يسمايل مۋسۋكاەۆ, امەريكالىق زەين ريزەرفورد, قىرعىزستاندىق ەرنازار احماتاليەۆ, موڭعوليالىق تومەر وچير تۇلعا, ارمەنيالىق ۆازگەن تەۆانيان, كۋبالىق الەكساندر ۆالدەس, پۋەرتوريكالىق سەباستيان ريۆەرا جانە البانيالىق يسلام دۋداەۆ سىندى كىلەڭ ىعاي مەن سىعايلار بولدى. الايدا سەنا جاعالاۋىندا سول دۇلدۇلدەردىڭ بىردە-بىرەۋىنە التىن تۇعىرعا كوتەرىلۋ باقىتى بۇيىرمادى. كوپشىلىككە ەسىمى بەيمالىم كوتارو كيووكا ولاردىڭ بارلىعىنىڭ «اۋزىن ۇرىپ» كەتتى.
23 جاستاعى جاپونيانىڭ بالۋانى بۇعان دەيىن رەسمي حالىقارالىق جارىستاردا جۇلدە الماعان. تىپتەن ازيا دەڭگەيىندە دارالانعان كەزى دە ەستە جوق. كوتارونىڭ ءبىر عانا ەرلىگى – اتالعان مەملەكەتتىڭ ىشكى بىرىنشىلىگىندە توكيو وليمپياداسى مەن بۋداپەشتەگى الەم چەمپيوناتىندا توپ جارعان اتاقتى تاكۋتو وتوگۋرونى «توپ ەتكىزۋى». فرانتسيانىڭ باس شاھارىندا بارلىق قارسىلاسىن ۇپاي سانىمەن ۇتقان كيووكا اقتىق سىنعا دەيىن جەتتى. ال ونىڭ فينالداعى قارسىلاسى اتاقتى راحمان امۋزاد ەدى. يراننىڭ ءدۇلد ۇلى ءوز كەزەگىندە زەين ريزەرفورد (8:0), يسلام دۋداەۆ (11:0) جانە يسمايل مۋسۋكاەۆتىڭ (10:0) تاس-تالقانىن شىعاردى. فينالدا ەكەۋى جولىقتى. باسەكەنى قارقىندى باستاعان كوتارو كيووكا امۋزادقا ادىم اشتىرمادى. ونى ءاپ-ساتتە جىعىپ الدى دا, كىلەمنىڭ ۇستىندە شىر اينالدىردى. ەندى وعان ءبىر ءادىس جاساسا دا جەتكىلىكتى ەدى. ماسقارا بولىپ ۇتىلۋعا شاق قالعان يراندىقتى تورەشىنىڭ ىسقىرىعى قۇتقاردى. ءبىرىنشى كەزەڭ 9:1 ەسەبىمەن اياقتالدى. ۇزىلىستەن كەيىن راحمان قانشا تالپىنسا دا, جاپون جىگىتى وعان ەشتەڭە ىستەتپەدى – 10:3. قولا مەدالدى سەباستيان ريۆەرا مەن يسلام دۋداەۆ يەمدەندى.
57 كگ سالماقتاعى رەي حيگۋتي ريو-دە-جانەيروداعى كۇمىسىن پاريجدە التىنعا الماستىردى. جاپونيانىڭ جۇلدىزى فينالدا امەريكالىق سپەنسەر ليگە سان سوقتىردى. ءۇشىنشى ورىندا – ۇندىلىك امان امان مەن وزبەكستاندىق ۋلومجون ابدۋللاەۆ. 74 كگ سالماقتا رازامبەك جامالوۆ جەڭىمپاز اتاندى. داعىستان سپورتشىسىنىڭ وزبەكستان ازاماتتىعىن العانىنا جارتى جىلداي عانا ۋاقىت بولدى. كورشىلەرىمىز دۇرىس تاڭداۋ جاساعان ەكەن. سول لەگيونەر فرانتسيانىڭ استاناسىندا وزبەكتىڭ ءانۇرانىن شىرقاتتى. فينالدا جامالوۆ جاپونيالىق دايتي تاكاتانيدى تىزە بۇكتىردى. امەريكالىق كايل دەيك پەن البانيالىق چەرمەن ۆاليەۆ قولاعا قول سوزدى.
الىپتاردىڭ ايقاسى گەنو پەترياشۆيليدىڭ جەڭىسىمەن اياقتالدى. گرۋزيانىڭ تاۋ تۇلعاسى ۋاقىت وزعان سايىن وليمپياداداعى كورسەتكىشىن جاقسارتىپ كەلەدى. 2016 جىلى ول قولا السا, 2021 جىلى ونى كۇمىسكە الماستىردى. مىنە, ەندى وردا بۇزار 30 جاسىندا التىن تۇعىردان قول بۇلعادى. فينالدا گەنو توكيودا كۇمىس الىپ, الەم چەمپيوناتىن ەكى رەت ۇتقان يراندىق ءامىر حۋسسەين زارەمەن كۇش سىناستى. بۇل ايقاستى كورگەن دە ارماندا, كورمەگەن دە ارماندا. ءبىرىنشى كەزەڭدى پەترياشۆيلي 10:1 ەسەبىمەن ءوز پايداسىنا شەشتى. تازا ۇتۋ ءۇشىن وعان ءبىر عانا ۇپاي جەتپەي تۇردى. ۇزىلىستەن كەيىن 23 جاستاعى ءامىر حۋسسەين قارقىنىن كۇرت كۇشەيتىپ, بىردەن سەگىز ۇپاي ولجالادى. ابىروي بولعاندا گرۋزيا بالۋانى وسى ءسال عانا باسىمدىعىن ساقتاپ قالدى. ەسەپ – 10:9. گەنو پەترياشۆيلي چەمپيون اتانسا, پارسىنىڭ پەحلەۆانى كۇمىستى قاناعات تۇتتى. قولا مەدال ازەربايجاندىق گەورگي مەشۆيلديشۆيلي مەن تۇركيالىق تاحا اقگۇلدىڭ مويىندارىندا جارقىرادى.
داۋرەن بىزگە بوتەن ەمەس
86 كگ سالماقتا سايىسقا تۇسكەن گرەكيالىق داۋرەن كرۋگليەۆتىڭ قولا مەدال ولجالاعانىن جوعارىدا ايتتىق. ونىڭ تەك يراننىڭ داڭقتى بالۋانى حاسان يازدانيگە ءالى جەتپەدى. وزگە بەلدەسۋلەردە پۋەرتوريكالىق يتان راموس (پانامەريكانىڭ ەكى دۇركىن جۇلدەگەرى), اۋستراليالىق دجەيدەن لوۋرەنس (مۇحيت جاعالاۋى ەلدەرى بىرىنشىلىگىنىڭ بەس دۇركىن جەڭىمپازى) پەن سان-مارينونىڭ تۋى استىندا ونەر كورسەتەتىن اقش-تىڭ ءاپايتوسى مايلس اميننەن (وليمپيادا مەن الەم چەمپيوناتىنىڭ قولا جۇلدەگەرى, ەۋروپا چەمپيونى) باسىم ءتۇستى. داۋرەننىڭ بۇل تابىسىنا گرەكتەر مەن داعىستاندىقتاردان بولەك, قازاق جانكۇيەرلەرى دە قۋاندى.
ەجەلگى ەللادا ەلىنىڭ وكىلى جايىندا بەكەر اڭگىمەلەپ وتىرعان جوقپىز. ونىڭ بولە اعاسى ماگومەد كرۋگليەۆ ۇزاق جىلدار بويى حالىقارالىق ارەنادا قازاقستاننىڭ نامىسىن ابىرويلى قورعادى. 2005 جىلى بۋداپەشتەگى الەم چەمپيوناتىندا كرۋگليەۆ قولا مەدال يەلەندى, 1996–2006 جىلدار ارالىعىندا وتكەن ازيا ويىندارى (1 كۇمىس, 2 قولا) مەن قۇرلىق چەمپيوناتتارىندا (1 كۇمىس, 2 قولا) ءۇش رەتتەن جەڭىس تۇعىرىنا كوتەرىلدى, 1997 جىلى شىعىس ازيا ويىندارىندا باس جۇلدەنى ولجالادى. ماگومەد ءالى دە ءبىزدىڭ ەلدە تۇرىپ جاتىر. بيىل ەردىڭ جاسى 50-گە تولعان تانىمال سپورتشى اقتاۋدا جاتتىقتىرۋشى بولىپ ەڭبەك ەتەدى.
1992 جىلدىڭ 12 شىلدەسىندە كرۋگليەۆتەر وتباسىندا شىر ەتىپ دۇنيەگە نارەستە كەلدى. وتباسى مۇشەلەرى كەڭەسە كەلە, ونىڭ اتىن ماگومەد قويسىن دەگەن ۇيعارىمعا كەلدى. سول ۋاقىتتا رەسپۋبليكا دەڭگەيىندە تانىلىپ ۇلگەرگەن بوزبالا وعان ءوزىنىڭ جەكە جاتتىقتىرۋشىسى داۋرەن اتامقۇلوۆتىڭ ەسىمىن بەرۋدى قۇپ كوردى. سول داۋرەن بۇگىن تورتكۇل دۇنيەگە تانىلدى. اۋەلى رەسەيدىڭ, كەيىننەن گرەكيانىڭ نامىسىن قورعاعان ول 2017–2024 جىلدار ارالىعىندا ەۋروپا ويىندارىن – ءبىر, الەم كۋبوگىن – ەكى جانە قۇرلىق چەمپيوناتىن ءۇش رەتتەن ۇتتى. باسقا دا كوپتەگەن حالىقارالىق تۋرنيردە توپ جاردى. مىنە, ەندى وليمپيا ويىندارىندا ولجاعا كەنەلدى.
جالپى, كرۋگليەۆتەردى بالۋاندار اۋلەتى دەپ ايتساق, ەش قاتەلەسپەيمىز. ماسەلەن, ماگومەدتىڭ ۇلى كاميلدىڭ دە ەسىمى قازاقستاندا قۇرمەتپەن اتالادى. ول – كادەتتەر اراسىنداعى الەم بىرىنشىلىگىنىڭ قولا جۇلدەگەرى, جاسوسپىرىمدەر مەن جاستار اراسىنداعى الەم (U-20) جانە ازيا (U-17, U-20) چەمپيونى. 97 كگ سالماق دارەجەسىندە كۇرەسەتىن كرۋگليەۆ بىلتىر قازاقستان چەمپيوناتىندا قولا مەدال ەنشىلەدى. قازىر ول 19 جاستا. وسى سپورت ءتۇرىنىڭ باسى-قاسىندا جۇرگەن ماماندار كەلەشەكتە كاميل الىشەر ەرعالي مەن ريزابەك ايتمۇحانعا لايىقتى قارسىلاس بولادى دەپ توپشىلايدى. ارينە, وعان قۋانامىز. ويتكەنى باسەكەلەستىك بولعان جەردە ناتيجەنىڭ دە بولاتىنى بەلگىلى.
«كىرمەلەرگە» كۇنى قاراعان كوماندالار
كەيبىر مەملەكەتتىڭ مەرەيىن ۇستەم ەتكەن لەگيونەرلەر ەكەنى راس. اڭگىمەمىزدى چەمپيونداردان باستايىق. كۇرەس تۇرلەرىنەن وزبەكستانعا جالعىز التىندى سىيعا تارتقان رازامبەك جامالوۆ (74 كگ) داعىستاننىڭ حاساۆيۋرت قالاسىنداعى اعايىندى بۋۆايسار مەن ادام سايتيەۆتەردىڭ مەكتەبىندە شىڭدالعان. ماگومەد رامازانوۆ (74 كگ) – اۆار. ول دا حاساۆيۋرتتەن. بۇل بالۋان 2008 جىلى بەيجىڭدە تاجىكستان قۇراماسىنىڭ قورجىنىنا كۇمىس مەدال سالعان ءوزىنىڭ قانداسى يۋسۋپ ابدۋسالاموۆتىڭ قول استىندا جاتتىعادى. التى قۇرلىقتاعى دۇلەي كۇش يەلەرىنىڭ بارلىعىن دا جىققان احمەد تاجۋدينوۆ (97 كگ) داعىستانداعى گەربيل دەپ اتالاتىن شاعىن عانا اۋىلدا دۇنيەگە كەلدى. ءوزىنىڭ وتانداسى, ۇستازى ءارى باسەكەلەسى ابۋلراشيد سادۋللاەۆتىڭ زالىندا دايارلانعان اۆار ۇلتىنىڭ 20 جاستاعى ارىستان جۇرەكتى جىگىتى وسى تابىستارىمەن عانا شەكتەلىپ قالمايتىنى انىق.
البانيا تاريحىنداعى وليمپيادانىڭ تۇڭعىش جۇلدەگەرلەرى چەرمەن ۆاليەۆ (65 كگ) پەن يسلام دۋداەۆ تا (74 كگ) – لەگيونەرلەر. العاشقىسى – شەشەن, ەكىنشىسى – وسەتين. ازەربايجاننىڭ تۋىن بيىكتە جەلبىرەتكەن قوس ءاپايتوس ماگومەدحان ماگومەدوۆ (97 كگ) – داعىستاننان, گەورگي مەشۆيلديشۆيلي (125 كگ) – گرۋزيادان. گرەكيانىڭ مەرەيىن ۇستەم ەتكەن داۋرەن كرۋگليەۆتىڭ (86 كگ) لەزگين ەكەنىن جوعارىدا ايتتىق. مىنە, قاپ تاۋى قىراندارىنىڭ قانشالىقتى قارۋلى ەكەنىن وسى مالىمەتتەردىڭ ءوزى-اق اڭعارتىپ تۇر.
مانسابىن اياقتاعان مارعاسقالار
گرەك-ريم كۇرەسىنەن جارىس اياقتالعاننان كەيىن داڭقى جەر جارعان 42 جاستاعى كۋبالىق ميحاين لوپەس (130 كگ) پەن 33 جاستاعى ۋكراينالىق جان بەلەنيۋكتىڭ (87 كگ) بوزكىلەممەن قوش ايتىسقانى جايىندا ءبىز بۇعان دەيىن جازعانبىز. كوپ ۇزاماي ولاردىڭ قاتارىنا 35 جاستاعى ازەربايجاندىق ساباح شارياتي (130 كگ) مەن 40 جاستاعى وزبەكستاندىق رۋسلان اسساكالوۆ (97 كگ) قوسىلدى. ولاردىڭ ەكەۋى دە وسى جارىستىڭ جەڭىس تۇعىرىنا سىنىق سۇيەم قالعاندا ءسۇرىنىپ, بەسىنشى ورىندى قاناعات تۇتتى.
ەركىن كۇرەستەن باسەكەلەر اياقتالعان بەتتە اسا اۋىر سالماقتا ايقاسقان تۇركيالىق تاحا اقگۇل مەن قىرعىزستاندىق اياال لازارەۆتىڭ ۇلكەن سپورتتان قول ۇزگەنى بەلگىلى بولدى. انادولىدان كەلگەن ارىستاننىڭ باعىندىرماعان بەلەسى جوق. اقگۇل وليمپيا ويىندارىندا – ءۇش (1 التىن+0 كۇمىس+2 قولا) جانە الەم چەمپيوناتىندا سەگىز رەت (3+2+3) جەڭىس تۇعىرىنا كوتەرىلدى. 10 رەت ەۋروپا چەمپيوناتىندا قارسىلاستارىن قوعاداي جاپىرىپ, باس جۇلدەنى قانجىعاسىنا بايلادى. دۇنيەجۇزىلىك ۋنيۆەرسيادا مەن ەۋروپا ويىندارىن ءبىر-ءبىر رەتتەن توپ جاردى. ونداي باق ەكىنىڭ بىرىنە بۇيىرمايتىنى بەلگىلى. سول سەبەپتى دە 34 جاستاعى تاحا تۇركيا حالقىنىڭ الدىندا ءوز پارىزىن تولىعىمەن وتەدى دەپ نىق سەنىممەن ايتۋعا بولادى.
38 جاستاعى اياال لازارەۆ ياكۋتيادا دۇنيەگە كەلگەنىمەن, قىرعىزستاننىڭ داڭقىن ارتتىرۋ ءۇشىن كوپ ەڭبەك ءسىڭىردى. ءيا, وليمپيا ويىندارى مەن الەم چەمپيوناتتارىندا وعان جۇلدەلى ورىنداردىڭ بۇيىرماعانى راس. دەسەك تە 125 كگ سالماقتا ايقاسقان اياال 2010–2024 جىلدار ارالىعىندا الەم كۋبوگى مەن ازيا ويىندارىندا جۇلدەگەرلەر قاتارىنان كورىنىپ, ازيا چەمپيوناتىندا 1 التىن, 2 كۇمىس جانە 3 قولانى ەنشىلەدى. ءۇش وليمپياداعا قاتىستى. بىراق ۇشەۋىندە دە جولى بولمادى. بۇل جولى قولا مەدال ءۇشىن تارتىستا تاحا اقگۇلگە جول بەردى. ءسويتىپ, ەكى بىردەي مىقتى بالۋان ءبىر مەزەتتە بوزكىلەممەن قوش ايتىستى.
جۇلدە بۇيىرعان جوق
وتاندىق ەركىن كۇرەس شەبەرلەرى كۇنى بۇگىنگە دەيىن وليمپيا ويىندارىندا 2 كۇمىس پەن 4 قولاعا قول جەتكىزدى. بارلىعى – 6 مەدال. الاش جۇرتىنا العاشقى جۇلدەنى ماۋلەن مامىروۆ سىيلادى. اسا جەڭىل سالماقتا كۇرەسكەن التىن اسىقتاي ۇلىمىز 1996 جىلى الىستاعى اتلانتادا قولا مەدالدى موينىندا جارقىراتتى. 2000 جىلى سيدنەيدە يسلام بايرامۋكوۆ پەن 2004 جىلى افينادا گەننادي لاليەۆ كۇمىسپەن كۇپتەلدى. 2008 جىلى بەيجىڭدە ماريد مۋتاليموۆ, 2012 جىلى لوندوندا اقجۇرەك تاڭاتاروۆ جانە 2021 جىلى توكيودا نۇريسلام ساناەۆ ۇزدىك ۇشتىكتى تۇيىندەدى.
جوعارىدا ەسىمى اتالعان بالۋانداردىڭ تەڭ جارتىسى لەگيونەر ەكەنىن دە جوققا شىعارمايمىز. لاليەۆ – وسەتين, مۋتاليموۆ – قۇمىق, ساناەۆ – تىۆا. ارزان جولمەن ابىرويعا كەنەلۋدى ماقسات تۇتقان ماماندار ولاردى ەلگە اكەلدى. ال ءدۇبىرلى دودادا جەڭىس تۇعىرىنا كوتەرىلە الماي كەتكەن «كەلىمسەكتەردىڭ» قاتارى تىپتەن قالىڭ. سپورتتىڭ بۇل تۇرىندە ءبىز ۇنەمى لەگيونەرلەرگە باسىمدىق بەرىپ كەلگەنىمىز بەلگىلى. وزگەگە كەلگەندە قاشاندا قۇشاعىن كەڭ جايىپ, ۇنەمى ەمىرەنىپ تۇراتىن اتقامىنەر ازاماتتار ءوز ۇلدارىمىزدى وزەككە تەبۋدەن تارتىنبادى. ەگەر جالعان سويلەسەم, ادىلەتسىزدىكتىڭ ازابىن مولىنان تاتقان نۇرجان قاتاەۆ, اقجۇرەك تاڭاتاروۆ, داۋلەت نيازبەكوۆ, داۋرەن جۇماعازيەۆ, تاعى باسقا بەلدى بالۋانداردان ماسەلەنىڭ ءمان-جايىن انىقتاسا بولادى.
بىلتىر بەلگرادتا 86 كگ سالماق دارەجەسىندە كۇش سىناسقان 19 جاستاعى ريزابەك ايتمۇحان الەم چەمپيونى اتاندى. بۇل – قازاقستاننىڭ ەركىن كۇرەس تاريحىنداعى تەڭدەسسىز وقيعا! بۇعان دەيىن بىردە-ءبىر وتانداسىمىز تورتكۇل دۇنيەنىڭ دۇلدۇلدەرى جينالعان ءدۇبىرلى دودادا باس جۇلدەگە قول جەتكىزە الماعان. ريزابەكتىڭ جەڭىسى ءبىزدىڭ جىگىتتەردى جىگەرلەندىرەدى, ولاردىڭ بويىنداعى جەڭىسكە دەگەن قۇشتارلىقتى ارتتىرىپ, نامىسىن قامشىلايدى دەپ ويلادىق. بىراق ءالى ەشتەڭە وزگەرمەگەن ەكەن. پاريجدە ونەر كورسەتكەن ءتورت بالۋانىمىزدىڭ ءبارى دە باستاپقى باسەكەلەرىندە ۇتىلدى.
جاپوندار جارادى, اقش التىنسىز قالدى
ەركىن كۇرەس شەبەرلەرىنىڭ سايىسىندا جاپونيا قۇراماسىنىڭ قارقىنى كۇشتى بولدى. ولار 2 التىن مەن 1 كۇمىستى ولجالاپ, جالپىكوماندالىق ەسەپتە كوش باستادى. ەكىنشى جانە ءۇشىنشى ورىندا – گرۋزيا مەن وزبەكستان. قاپ تاۋى قىراندارىنىڭ 1 التىنى مەن 1 كۇمىسى, الا تاقيالى اعايىندارىمىزدىڭ 1 التىنى مەن 1 قولاسى بار. بەسىنشى ساتىعا بولگاريا مەن باحرەيننىڭ بالۋاندارى جايعاستى. بۇل ەلدىڭ بەتكەۇستارلارى ءبىر-ءبىر رەتتەن جەڭىس تۇعىرىنىڭ ەڭ بيىگىنە كوتەرىلدى. ودان كەيىنگى ساتىلارعا يران (0+3+1), اقش (0+1+2), البانيا مەن ازەربايجان (0+0+2), ءۇندىستان, پۋەرتو-ريكو, گرەكيا,تۇركيا (0+0+1) تۇراقتادى.
