مۇنداي جارىس قىزىلجار وڭىرىندە العاش رەت وتكىزىلىپ وتىر. وعان وبلىستىڭ جەدەل جاردەم بريگاداسىنىڭ بىلتىر وسىنداي سپارتاكيادادا جەڭىسكە جەتۋى نەگىز بولدى. بۇل وتكەن جىلى 11 تامىزدا اباي وبلىسىنىڭ ورتالىعى سەمەي قالاسىندا وتكىزىلگەن ەدى. وعان ەلىمىزدىڭ بارلىق وڭىرىنەن جەدەل جاردەم بريگادالارى قاتىسقان.
سپارتاكيادانىڭ ءبىر ماقساتى – جەدەل مەديتسينالىق كومەك كورسەتۋ ساپاسىن جاقسارتۋمەن قاتار مەديتسينا قىزمەتكەرلەرىنىڭ كاسىبي داعدىلارىن, تاجىريبەلەرىن ارتتىرۋ. جارىستار جەدەل مەديتسينالىق جاردەم بريگادالارىنىڭ جەدەل كورونارلىق سيندروم, پوليجاراقات, بالالار رەانيماتسياسى, جاڭا تۋعان نارەستەنى ۇيدە تۋعان كەزدە رەانيماتسيالاۋ جانە باسقا جاعدايلار كەزىندە جەدەل مەديتسينالىق كومەك كورسەتۋدىڭ ءادىس-تاسىلدەرى بويىنشا وتكىزىلدى.
اۋرۋحاناعا جەتكىزىلگەنشە ناۋقاسقا جەدەل مەديتسينالىق العاشقى كومەك تاسىمالداۋ كەزىندە كورسەتىلەدى. سوندىقتان جەدەل جاردەمدەگى فەلدشەرلەردىڭ جۇمىسى وتە جاۋاپتى. ولار توتەنشە اۋىر جاعدايعا تۇسكەن ازاماتتاردى قۇتقارۋ بويىنشا العاشقى جەدەل كومەكتى دۇرىس جاساعاندا عانا ادام ءومىرى ساقتالۋى مۇمكىن. ياعني اۋرۋحاناعا امان جەتكىزۋدىڭ ماڭىزى زور. سوندىقتان جەدەل جاردەمنىڭ حالىقارالىق اتاۋى «ambulare» دەگەن لاتىن سوزىمەن جازىلادى. بۇل ءسوزدىڭ تۋرا ماعىناسى – «جەدەل ءجۇرۋ» نەمەسە «جەدەل قوزعالۋ». دەمەك ناۋقاستى دەرەۋ اۋرۋحاناعا جەتكىز دەگەن ءسوز. قالا كوشەلەرىندە دابىلىن بەزىلدەتىپ بارا جاتقان «جەدەل جاردەم» ماشينالارىنا باسقا كولىكتەردىڭ جول بەرىپ, ونى بوساتىپ جىبەرەتىنى دە سودان.
ارنايى «جەدەل جاردەم» كولىكتەرىن قولدانۋدى ادامزات تاريحىندا العاش حV عاسىردا ويلاپ تاپقان – يسپاندىقتار. ال ارناۋلى ماشينالار قولدانۋ ءحىح عاسىردان بەرى ەنگىزىلگەن. جەدەل جاردەمنىڭ قولدانۋىن سارالاعان ستاتيستەر ونىڭ ەڭ كوپ كومەك كورسەتكەنى وتكىر اۋرۋى بار پاتسيەنتتەر مەن جاراقات العان جاندار ەكەن. ونداي ناۋقاستارعا جەدەل جاردەم كولىگى رەتىندە ءتىپتى ات-اربالار, قايىقتار, تىكۇشاقتار, ۇشاقتار قولدانىلعان. ارينە, قازىر جەدەل جاردەم كولىكتەرى بارىنشا جەتىلدىرىلگەن. سانيتارلىق اۆياتسيا عانا ەمەس, قازىر ارنايى, وتە تولىق دەگەن ناۋقاستارعا ارنالعان باريتاريالىق جەدەل جاردەم كولىگى دە بار.
ء«بىز وبلىستا جەدەل مەديتسينالىق كومەك كورسەتۋ ءۇشىن بارلىق جاعدايدى جاساپ جاتىرمىز. جەدەل جاردەم ورتالىعىنداعى سانيتارلىق كولىكتەر 100 پايىزعا جاڭارتىلدى. بيىل جەدەل مەديتسينالىق كومەك كورسەتۋدىڭ حالىقارالىق ستاندارتتارىن دايىندايتىن وقۋ الاڭى اشىلدى», دەدى سپارتاكيادانى اشقان سوزىندە وبلىس اكىمى عاۋەز نۇرمۇحامبەتوۆ.
سپارتاكيادانىڭ وتۋىنە دەنساۋلىق ساقتاۋ مينيسترلىگى, ۇلتتىق شۇعىل مەديتسينانى ۇيلەستىرۋ ورتالىعى جانە سولتۇستىك قازاقستان وبلىسى دەنساۋلىق ساقتاۋ باسقارماسى, جەدەل مەديتسينالىق جاردەم قاۋىمداستىعى ۇيىتقى بولدى. قازاقستاننىڭ تۇكپىر-تۇكپىرىنەن كەلگەن كوماندالار جەدەل مەديتسينالىق كومەك كورسەتۋدە ءوز شەبەرلىكتەرىن كورسەتتى. بارلىق قاتىسۋشى شەبەرلىك ساباقتارىنان ءوتىپ, جۇرەك-وكپە رەانيماتسياسىن جۇرگىزۋدە, دياگنوز قويۋدا, شاقىرۋ ورنىندا جۇمىستى ۇيىمداستىرۋدا تاماشا ناتيجەلەر كورسەتتى. سپارتاكيادانىڭ قورىتىندىسى بويىنشا بىلتىر ءوز جەرىندە سولتۇستىك قازاقستان كومانداسىنان جەڭىلىپ قالعان اباي وبلىسىنىڭ وكىلدەرى ءبىرىنشى ورىن الدى. قىزىلجارلىقتار ەكىنشى, ماڭعىستاۋلىقتار ءۇشىنشى ورىنمەن قاناعاتتاندى. الايدا بارلىق قاتىسۋشى «AinalaMed قازاقستان», «Astana Motors», «Allur», «TND» جشس ت.ب دەمەۋشىلەردىڭ قولداۋىمەن باعالى سىيلىقتار الدى.
سولتۇستىك قازاقستان وبلىسى
