كومپانيا جول قوزعالىسىن باسقارۋدىڭ زاماناۋي تەحنيكالىق قۇرالدارىن ەنگىزۋ ارقىلى جولداعى قوزعالىس قاۋىپسىزدىگىن جاقسارتۋدى كوزدەيدى.
«كاراگاندااۆتوترانسسيگنال» جشس تاريحى 1971 جىلدان باستاۋ الادى. سول جىلى ءوز جۇمىسىن «گوردورستروي» باسقارماسىنا قاراستى ۋچاسكەدەن باستادى. 1977 جىلى قاراعاندى وبلىسىنىڭ مامانداندىرىلعان مونتاجداۋ-جوندەۋ باسقارماسى نەگىزىندە قايتا قۇرىلدى. 1988 جىلى سمەۋ قازاق كسر ءىىم مەملەكەتتىك اۆتوينسپەكتسياسى باس باسقارماسىنىڭ «قازاۆتوترانسسيگنال» رەسپۋبليكالىق ترەسىنىڭ قۇرامىنا ەندى. 1993 جىلى ترەست «اۆتوترانسسيگنال» اق بولىپ قايتا قۇرىلدى. ونىڭ قۇرامىنا قاراعاندىداعى بولىمشەسى رەتىندە قوسىلدى.
1999 جىلى 31 ناۋرىزدا اكتسيونەرلىك قوعام مۇلكىنىڭ, قۇقىقتارى مەن مىندەتتەرىنىڭ ءبىر بولىگىن ءبولۋ ارقىلى «اۆتوترانسسيگنال» جاق قايتا قۇرۋ جولىمەن «قاراعاندىاۆتوترانسسيگنال» اتانسا, 2004 جىلدىڭ شىلدەسىندە جاق «قاراعاندىاۆتوترانسسيگنال» جشس بولىپ قايتا قۇرىلدى. سودان بەرى «Research and Development Solutions – RDS» دەگەن اتاۋمەن قاراعاندى وبلىسىنداعى كولىك قوزعالىسىن ۇيىمداستىرۋ سەكىلدى ماڭىزدى سالاعا ابدەن ماماندانعان كاسىپورىنعا اينالدى.
«كاسىپورىندا 50-گە جۋىق جۇمىسكەر بار. كوبى جول قوزعالىسى قاۋىپسىزدىگىن قامتاماسىز ەتەتىن سالادا كوپ جىلدىق ەڭبەك تاجىريبەسى بار, بىلىكتىلىگى, ءبىلىمى جوعارى كاسىبي ماماندار. ورلەگەن وندىرىستىك الەۋەتتىڭ ارقاسىندا كومپانيامىز جوعارى بيزنەس ستاندارتتارىن قالىپتاستىرىپ, يننوۆاتسيالىق شەشىمدەر مەن تەحنولوگيالار ەنگىزۋدى ىنتالاندىرا وتىرىپ, سالانى دامىتۋعا ۇلەس قوسىپ كەلەدى. ءبىزدىڭ كومپانيا تۇتىنۋشىلاردىڭ قاجەتتىلىگىن بارىنشا قاناعاتتاندىرۋ ءۇشىن كورسەتىلەتىن جۇمىستار مەن قىزمەتتەردى ۇزدىكسىز جاڭارتىپ وتىرادى», دەيدى كاسىپورىن باسشىسىنىڭ ورىنباسارى نۇرجان ساميتوۆ.
قازىرگى ورناتىلىپ جاتقان باعدارشامدار شەتەلدىكى. بىراق وعان قاجەتتى قوسالقى بولشەكتەر, ارنايى جابدىقتار جەرگىلىكتى كاسىپورىنداردان ساتىپ الىنادى. وتاندىق ءوندىرىس ورىندارىمەن كەلىسىمشارت جاسالعان. ماسەلەن, مايقۇدىقتاعى «ەنەرگوسيستەمى ەلتو», سارانداعى «Kazcentrelectroprovod», «ورنەك نس» جشس, «ۇلار مك», رسۋ, «اگرودور» كومپانيالارىمەن تىعىز بايلانىستا.
كومپانيا ينتەللەكتۋالدى كولىك جۇيەلەرىن ەنگىزۋ جانە تەحنيكالىق قامتاماسىز ەتۋمەن قاتار جول بەلگىلەرىنە ارنالعان تىرەكتەردى دە جاسايدى. بۇل ماقساتتا وتاندىق كومپانيالاردىڭ ونىمدەرىن پايدالانادى. باعدارشامداردى ورناتىپ, ونى كۇتىپ ۇستاۋ, اۆتوماتتاندىرىلعان قوزعالىستى باسقارۋ جۇيەسىن ەنگىزىپ, تەحنيكالىق تۇرعىدان قامتاماسىز ەتۋ – كاسىپورىننىڭ نەگىزگى مىندەتى.
مۇنىمەن قوسا, وسى ۇيىمنىڭ قۇزىرەتىنە كەرى ساناق تابلوسى, ارنايى ديزاينداعى جول بەلگىلەرى مەن بيلبوردتار, جاساندى جول بۇدىرلارى, جول جيەگىندەگى مەتالل قورشاۋلاردى جەتكىزۋ جانە ورناتۋ قىزمەتى كىرەدى. شامامەن ءبىر-ەكى جىل بۇرىن كاسىپورىن كورۋ قابىلەتى ناشار جاياۋ جۇرگىنشىلەر ءۇشىن دىبىستىق بەلگى بەرۋ قۇرىلعىسىن ەنگىزگەن ەدى.
«كەلىسىمشارت نەگىزىندە 162 باعدارشامدى كۇتىپ ۇستاۋدى مىندەتىمىزگە الدىق. دەگەنمەن قاراعاندى قالاسى بويىنشا 200-دەي باعدارشامعا جاۋاپتىمىز. بۇگىندە وبلىس ورتالىعىندا جاياۋ جۇرگىنشىلەر وتەتىن جەرلەرگە 518 ارنايى دىبىستىق بەلگى بەرۋ قۇرىلعىسىمەن جابدىقتالعان الەۋمەتتىك باعدارشام مەكتەپ, اۋرۋحانا ماڭايىنا ورناتىلدى», دەيدى كاسىپورىننىڭ باعدارشام شارۋاشىلىعى ءبولىمىنىڭ باسشىسى ۆلاديمير پلوتوۆ.
جارتى عاسىرلىق تاريحى بار كاسىپورىن وبلىستىڭ جول پوليتسياسىمەن تىعىز بايلانىس ورناتقان. جول قوزعالىسىنىڭ قاۋىپسىزدىگىن قامتاماسىز ەتۋ بويىنشا جۇمىستىڭ بارلىق ءتۇرىن اتقارۋدى جالعاستىرا بەرمەك.
ايتا كەتەرلىك جايت, مەكەمەدە بوس جۇمىس ورىندارى بار. جۇرگىزۋشى, ەلەكترجوندەۋشى, دانەكەرلەۋشى ماماندارعا ەسىگى اشىق.
قاراعاندى وبلىسى
