سۋرەتتى تۇسىرگەن – ەرلان ومار, «EQ»
ماگيستراتۋراعا ءتۇسۋ ءۇشىن 39 مىڭنان اسا ادام ەمتيحان تاپسىرعان. سول ۇمىتكەرلەردىڭ تەك 43%-ى شەكتى بالل جينادى. مىنە, سول شەكتى بالل جيناي العاندار عانا گرانت كونكۋرسىنا قاتىسادى. جوعارىدا جازىلعانداي, تالاپكەرلەرگە قۇجاتتارىن ءداستۇرلى جانە ونلاين فورماتتا تاپسىرۋعا مۇمكىندىك بەرىلىپ وتىر.
كونكۋرسقا قاتىسۋ ءۇشىن: جەكە كۋالىكتىڭ كوشىرمەسى, جوعارى ءبىلىمى تۋرالى قۇجات (ديپلوم جانە قوسىمشاسى); كەشەندى تەستىلەۋ سەرتيفيكاتى جانە شەت ءتىلىن مەڭگەرگەنىن راستايتىن حالىقارالىق سەرتيفيكاتتاردى (بار بولعان جاعدايدا) تاپسىرۋ قاجەت. ال جوعارى وقۋ ورنىنا تۇسكەن جاعدايدا 075/ۋ نىسانىنداعى مەديتسينالىق انىقتامانى تاپسىرادى. قۇجاتتاردى تاپسىرۋ كەزىندە وقۋعا ءتۇسۋشى ءبىلىم بەرۋ باعدارلامالارىنىڭ ءبىر توبىن جانە ءۇش جوعارى وقۋ ورنىن كورسەتە الادى.
ماگيستراتۋراعا تۇسۋشىلەر 13 مىڭ مەملەكەتتىك ءبىلىم گرانتىنا ۇمىتكەر بولادى. وسىعان دەيىنگى ماتەريالىمىزدا جازعانىمىزداي, ماگيستراتۋرادا وقۋعا ەڭ كوپ گرانت «ينجەنەرلىك, وڭدەۋ جانە قۇرىلىس» سالالارى بويىنشا ماماندىقتارعا (3 227) بولىنگەن. ودان كەيىنگى رەتتە «پەداگوگيكا عىلىمدارى» باعىتى بويىنشا ماماندىقتار (3 347) قاراستىرىلعان. «جاراتىلىستانۋ عىلىمدارى, ماتەماتيكا جانە ستاتيستيكا» سالالارىنداعى ماماندىقتارعا – 1 265, «اقپاراتتىق-كوممۋنيكاتسيالىق تەحنولوگيالار» سالالارىنداعى ماماندىقتارعا 1 235 گرانت ءبولىندى. ال ەڭ از گرانت بولىنگەنى – «دەنساۋلىق ساقتاۋ جانە الەۋمەتتىك قامتاماسىز ەتۋ» (225), «قىزمەت كورسەتۋ» (315) سالالارىنداعى ماماندىقتار.
ماگيستراتۋرادا وقۋعا ارنالعان ءبىلىم بەرۋ گرانتى تالاپكەرلەر تاپسىرعان كەشەندى تەستىلەۋ ناتيجەلەرى بويىنشا كونكۋرستىق نەگىزدە تاعايىندالادى. ماگيستراتۋرادا وقۋعا ءبىلىم گرانتىن يەلەنگەندەردىڭ ءتىزىمى 26 تامىزعا دەيىن عىلىم جانە جوعارى ءبىلىم مينيسترلىگى مەن ۇلتتىق تەستىلەۋ ورتالىعىنىڭ رەسمي سايتىندا جانە الەۋمەتتىك جەلىلەرىندە جاريالانادى. ال بولاشاق ماگيسترانتتاردىڭ وقۋعا قابىلدانۋى 28 تامىزعا دەيىن اياقتالادى.
