1999 جىلدان بەرى شيرەك عاسىر ۋاقىتتا بۇل كومپانيا ءوزىنىڭ ماقساتىن ورىنداپ, تۇتىنۋشىلار تاراپىنان ءدامدى, ساپالى ونىمدەرى ءۇشىن سىي-قۇرمەتكە بولەنىپ كەلەدى. كومپانيا قۇرامىنا ەنەتىن 24 ءبولىم ەلىمىزدىڭ تۇكپىر-تۇكپىرىندە ورنالاسقان. بارلىق زاۋىتى ەڭ جاڭا ەۋروپالىق جابدىقتارمەن جاراقتالعان. ال ورتالىق كەڭسەسى الماتى قالاسىندا ورنالاسقان.
ساۋدا نۇكتەلەرىن جاۋلاعان «ماسلو-دەل» 100-گە جۋىق ازىق-ت ۇلىك ءونىمىن شىعارادى. سونىڭ ىشىندە سارى ماي, وسىمدىك مايى, ونەركاسىپ مايى, ىرىمشىك, مارگارين, مايونەز, كەتچۋپ, تومات پاستاسى, ۇنتاقتالعان ءسۇت, قويۋلاتىلعان ءسۇت ونىمدەرى كوپشىلىككە كەڭىنەن تانىمال.
«ماسلو-دەل» كومپانياسىنىڭ بىرنەشە كاسىپورنى ءبىزدىڭ وڭىردە دە بار. پەتروپاۆلداعى «ماسلو-دەل» ءسۇت زاۋىتى 2004 جىلى اشىلعان. بۇل زاۋىت سارىماي, ۋلترا پاستەرلەنگەن ءسۇت, ايران, قايماق, ىرىمشىك جانە اشىتىلعان ءسۇت ونىمدەرىنىڭ باسقا دا ءتۇرىن وندىرەدى. ءوندىرىستىڭ قۋاتى جىلىنا 66 مىڭ تونناعا دەيىنگى شيكى ءسۇتتى وڭدەۋگە جەتەدى. ونداعى شەتەلدىك وڭدەۋ قۇرالدارىنىڭ قۋاتى تاۋلىگىنە 200 تونناداي ءسۇتتى وڭدەۋگە شاقتالعان.
كاسىپورىن شيكىزاتتىڭ 70 پايىزىن شارۋاشىلىقتاردان, 30 پايىزىن جەكە ادامداردان قابىلدايدى.
قازىر وڭىردە 100 اگروقۇرىلىم ءسۇت وندىرۋمەن اينالىسادى. سونىڭ 36-سى – زاماناۋي تاۋارلى-ءسۇت كەشەنى. بيىل تاعى 9 تاۋارلى-ءسۇت فەرماسى سالىنىپ جاتىر. ول ءۇشىن ەۋروپا ەلدەرىنەن, رەسەيدەن 1 500-دەن استام تۇياق قارا مال جەتكىزىلدى. بىلتىر عانا «سولتۇستىك» اكك-ءنىڭ جەڭىلدەتىلگەن نەسيەسى ارقىلى «اتامەكەن-اگرو كورنەەۆكا», «ازيا تورانعۇل», «گەردت», «نەجينكا ەركە», «زەلەنىە لۋگا» جشس تاۋارلى-ءسۇت فەرمالارىن تۇرعىزۋعا نيەت ءبىلدىرىپ, بيىل ولاردىڭ كوبى قارجىلاندىرىلىپ, ىسكە كىرىسكەن. ارقايسىسى 400-دەن 1 300 تۇياققا شاقتالعان كەشەندەر سالعان. وبلىستا بارلىعى وسىنداي 18 كەشەن تۇرعىزىلماقشى. وعان 17 ملرد تەڭگە قاراستىرىلعان.
اۋىل شارۋاشىلىعى مينيسترلىگى بيىلعى جارتىجىلدىقتا بىلتىرعا قاراعاندا ءسۇت ءوندىرۋ 4,8 پايىزعا ۇلعايعانىن جاريالاعان ەدى. وسى جەتىستىكتىڭ نەگىزىن قالاعانداردىڭ ءبىرى – سولتۇستىكتىڭ ءسۇت وندىرۋشىلەرى. قازىر مۇندا بارلىعى 700 مىڭ تونناداي ءسۇت ءوندىرىلىپ, ودان 215 مىڭ توننانىڭ دايىن ءونىمى الىنادى. رەسپۋبليكا بويىنشا بارلىق ءسۇت ءوندىرۋ مەن وڭدەۋدىڭ 25 پايىزى تەرىستىككە تيەسىلى.
مىنە, وسىنداي تاۋارلى ءسۇت كەشەندەرىنىڭ شيكى ءسۇتى «ماسلو-دەلگە» جەتكىزىلىپ, وڭدەلىپ, دايىن ونىمگە اينالعان سوڭ, ەلىمىزدەگى 50 مىڭنان استام ساۋدا نۇكتەسىندە تۇتىنۋشىعا ۇسىنىلادى. سونىمەن بىرگە, كاسىپورىن ءسۇت, ايران جانە قايماق ونىمدەرى بويىنشا تاۋلىكتىك قۋاتتىلىقتى 60 توننادان 450 تونناعا دەيىن جەتكىزە الاتىن جابدىقتارمەن جاڭعىرتۋدى كوزدەپ وتىر. قازىر زاۋىت جىلىنا 104,8 مىڭ توننا دايىن ءونىم شىعارادى.
كومپانيانىڭ پەتروپاۆلداعى فيليالىنىڭ باسشىسى يننا پيسكۋنوۆانىڭ ايتۋىنشا, بىلتىر فيرما وبلىستا ءىرى سالىق تولەۋشىلەردىڭ قاتارىنا قوسىلعان. ءونىم ساپاسىنا دا ەشكىمنەن شاعىم تۇسپەگەن.
«ونىمدەرىمىزدىڭ ساپاسى جوعارى. كەز كەلگەن ادىلەتتى باسەكەگە توتەپ بەرە الامىز. ەلىمىزگە سىرتتان اكەلىنگەن, ناقتى ايتساق رەسەيدەن ەنگىزىلگەن ءسۇت ونىمدەرىنە قاراعاندا ءبىزدىڭ ونىمدەرىمىزدىڭ ساپاسى الدەقايدا جوعارى ەكەنىن زەرتحانادا ارنايى تەكسەرۋدەن وتكىزىپ, كوزىمىزدى جەتكىزدىك», دەيدى.
وتاندىق ءسۇت ونىمدەرى ساپاسىن انىقتايتىن «Dosmart.kz» كەشبەك-سەرۆيس» ۇيىمى 2021 جىلى 313 ازىق-ت ۇلىك دۇكەنىنەن ساتىپ الىنعان 74 مىڭ ءسۇت چەكتەرىن سارالاعان قورىتىندىنى جاريالادى. ءسويتىپ, ءسۇت ونىمدەرى رەيتينگىن انىقتاعان ەدى. سوندا «پەتروپاۆلدىڭ ءسۇتى» اتاۋىمەن ساتىلعان قىزىلجار ءسۇتى الماتى, سەمەي, وسكەمەن, شىمكەنت, تالدىقورعان, قىزىلوردا قالالارىندا ءبىرىنشى ورىن العان. جالپى, «ماسلو-دەل» كومپانياسىنىڭ يەلىگىندە ءسۇت زاۋىتتارى عانا ەمەس, ەلەۆاتور, ماي پرەسس زاۋىتى جانە ماي كومبيناتىن قوسا العاندا بەس ءوندىرىستىڭ جەلىسى بار. بۇل ينتەگراتسيالانعان قۇرىلىم ونىمدەردىڭ جوعارى ساپا ستاندارتىن قامتاماسىز ەتۋگە مۇمكىندىك بەرەدى.
سولتۇستىك قازاقستان وبلىسى
