تاڭ ازانمەن بەلگىلى جۋرناليست قاينار ولجاي اعامىزدىڭ جازعانىن وقىپ, تاڭىرقاپ وتىرمىز. ول كىسىگە تانىمال سۋرەتشى جانۇزاق ءمۇساپىر WhatsApp ارقىلى حابارلاما جولداپ, قارىز سۇرايدى.
«ويىمىزدا دانەمە جوق, جولداستىڭ ۆاتسابىنا «كىمگە اۋدارۋ كەرەك, جاقا؟» دەپ جازدىق. ءبىر مينۋت وتپەي جاۋاپ كەلدى. كارتىشكە ءنومىردى كورسەتىپتى. ونى سمارتفوننان قاعازعا مۇقياتتاپ جازىپ الدىق. ويتكەنى سانسىز وي قۇيىلىپ تۇراتىن مىنا باسقا تسيفر تۇرمايتىن جىنى بار. 4400 4302 2130 3933. قاعازعا جازىپ الىپ, ۇستىنەن ءبىر تەكسەردىك. سودان كەيىن كاسپي قوسىمشاسىن اشىپ, اقشا اۋدارۋ ءۇشىن وسى كارتىشكە ءنومىرىن تەردىك. «تولەگەن د» دەپ تۇر ەكەن. انىقتاپ الۋ ءۇشىن جاقاڭا حابار جولدادىق. ء«يا» دەپ جاۋاپ بەردى ول كىسى», دەيدى.
سويتەدى دە, اعامىز جاقاڭنىڭ كورسەتكەن كىسىسىنە الگى 250 000 تەڭگەنى اۋدارادى. بىراق قىزىق بولعاندا, بانك بۇل اۋدارىمدى وتكىزبەيدى. كارتا ءنومىرىن تاعى ءبىر مارتە تەكسەرىپ, ەكىنشى رەت اۋدارۋعا تالپىنادى. بۇل جولى دا جۇزەگە اسپاي قالادى. كەيىن بارىپ تەلەفون شالىپ ءمان-جايدى بىلگەن كەزدە, «قاينەكە, بۇلار الاياقتار. مەنىڭ اتىمدى پايدالانىپ جاتىر, اۋدارا كورمەڭىز» دەيدى سۋرەتشى اعامىز شىر-پىر بولىپ.
قاراپايىم حالىق ءۇشىن 250 مىڭ تەڭگە از سوما ەمەس. قانشاما جاننىڭ ءبىر ايلىق ەڭبەكاقىسى. ول تۇرماق ابايسىزدا 5 مىڭ تەڭگەڭىزدى جوعالتىپ الساڭىز دا, جارتى كۇن جانىڭ سىزداپ جۇرەدى...
ايتايىق دەگەنىمىز, الاياقتارعا قويىلاتىن توسقاۋىلدىڭ سوڭعى كەزدە نىعايىپ جاتقانى. ايتپەسە, قاينار اعامىزدىڭ ادەپكى اۋدارىمى-اق كەدەرگىسىز بازبىرەۋدىڭ شوتىنا توپ ەتە قالعالى تۇر ەدى. مۇنى ۇلتتىق بانك بىرنەشە كۇن بۇرىن عانا ىسكە قوسقان «الاياقتىققا ءتان ترانزاكتسيالار بويىنشا دەرەك الماسۋ ورتالىعىنىڭ» – انتيفرود ورتالىعىنىڭ يگىلىگى دەسە بولعانداي.) جوبا قۇقىق قورعاۋ ورگاندارىمەن جانە قارجى نارىعىنا قاتىسۋشىلارمەن بىرلەسىپ ىسكە اسىرىلىپ وتىر.
ۇلتتىق بانك تاراتقان مالىمەتكە سۇيەنسەك, انتيفرود ورتالىعى الاياقتىق بەلگىسى بار وپەراتسيالارعا قارسى ارەكەت ەتۋ ءۇشىن قۇرىلعان.
«قارجى ۇيىمدارىنا الاياقتىققا ءتان وپەراتسيالاردى انىقتاۋعا جانە بۇعاتتاۋعا, الاياقتىق بەلگىسى بار وپەراتسيالارعا جەدەل ارەكەت ەتۋگە, ونىڭ قاتىسۋشىلارى اراسىندا ناقتى ۋاقىت رەجىمىندە اقپارات الماسۋعا دا مۇمكىندىك بەرەدى. انتيفرود ورتالىعىنىڭ جۇمىسى الاياقتىق وپەراتسيالار بويىنشا بىرىڭعاي دەرەكتەر بازاسىن جۇرگىزۋدى دە كوزدەيدى. پلاتفورما ىسكە قوسىلعان ساتتەن باستاپ قارجى ۇيىمدارى مەن قۇقىق قورعاۋ ورگاندارى الاياقتىق وپەراتسيالار بويىنشا 400-گە جۋىق فاكتىنى انىقتادى جانە الاياقتىق ارەكەتتەرمەن بايلانىستى 30 ميلليون تەڭگەگە جۋىق قاراجاتتى بۇعاتتادى», دەلىنگەن حابارلامادا.
الداعى ۋاقىتتا كۇدىكتى ترانزاكتسيالاردى انىقتاۋ تيىمدىلىگىن ارتتىرۋ ءۇشىن جاساندى ينتەللەكت تەحنولوگيالارىن قولدانۋ دا جوسپاردا بار ەكەن. بۇل جەردە ەسكەرە كەتەتىن ءبىر جايت بار – الدەبىر پىسىقاي-الاياقتار (الاياقتار جۋاس بولۋشى ما ەدى ءوزى) ء«بىز انتيفرود ورتالىعىنان حابارلاسىپ تۇرمىز, ءسىزدىڭ شوتىڭىزدا كۇماندى اۋدارىم ءجۇرىپ جاتىر» دەپ حابارلاسىپ, قالتاڭىزدى قاعىپ-سىلكىپ كەتۋى دە بەك مۇمكىن عوي. سوندىقتان بىلە جۇرگەنىڭىز ابزال – انتيفرود ورتالىعىنىڭ قىزمەتكەرلەرى مەن وكىلدەرى اقپارات جيناۋ نەمەسە قانداي دا ءبىر وپەراتسيا جۇرگىزۋ ماقساتىندا ەشۋاقىتتا جەكە تۇلعاعا قوڭىراۋ شالمايدى.
ورتالىق قىزمەتكەرلەرى تەك قارجى, تولەم ۇيىمدارىمەن, قۇقىق قورعاۋ ورگاندارىمەن جانە ۇيالى بايلانىس وپەراتورلارىمەن جۇمىس ىستەيدى. وسىعان بايلانىستى ۇلتتىق بانك ازاماتتاردى قىراعى بولۋعا جانە انتيفرود ورتالىعى اتىنان دەپ قوڭىراۋ شالۋى مۇمكىن الاياقتاردىڭ ارەكەتىن ەلەمەۋگە شاقىرادى.
