سۋرەتتەردى تۇسىرگەن – سۇلتان سەيىت
«بۇگىنگى جاستار نە ۇيرەنۋ كەرەك دەگەنگە كەلسەك, اباي دانالىعىنىڭ ءمانىن ءبىراۋىز سوزگە سىيدىرۋعا بولادى, بۇل – ۇلتتى باقىتتى ەتۋ. ۇلتتى باقىتتى ەتۋدىڭ ۇلكەن كىلتى – ەڭبەك پەن ونەر. ونەرگە اباي تەحنولوگيانى, تەحنيكانى دا سىيدىرعان. قازىرگى جاساندى ينتەللەكت, IT-تەحنولوگيا ءبارى دە – ابايدىڭ بىزگە اماناتتاپ كەتكەن مىندەتتەرى. ءبىز ونى ۇمىتپاۋىمىز كەرەك», دەدى اكادەميك, «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى.
ەلوردانىڭ بايقوڭىر اۋدانىنىڭ اكىمدىگى, استانا قالاسى ءبىلىم باسقارماسى, اباي قۇنانباي ۇلى اتىنداعى №87 مەكتەپ-گيمنازياسى ۇيىمداستارعان كەشكە قالامگەرلەر, عالىمدار, ۇستازدار مەن وقۋشىلار قاتىستى. ابايتانۋشى, «بالا اباي» جوباسىنىڭ اۆتورى, اقىن الماحان مۇحامەتقاليقىزى بيىل ۇلى ابايدىڭ, ونىڭ بالالارى ماعاۋيا مەن اقىلبايدىڭ دۇنيەدەن وتكەنىنە 120 جىل تولىپ وتىرعانىن ايتا كەلە, وسى جىلدى «اباي جىلى» دەپ اتاۋعا بولاتىنىن سالماقتادى.
«قۇنانبايدىڭ 220 جىلدىعىن بيىل سەمەي جەرى, اباي ەلى جاقسىلاپ وتكىزدى. ءبىز ابايدى عانا ەمەس, ابايدىڭ اينالاسىن دا تانۋىمىز كەرەك. اباي شىعارماشىلىعىن, ابايدىڭ ءومىرىن بىلگەنىمىز وتە دۇرىس دەپ ويلايمىن. ولەڭدەرى مەن قارا سوزدەرىن عانا جاتتاۋمەن توقتاپ قالماۋىمىز كەرەك. بۇگىنگى كۇنگە الاش ارىستارى جەتكىزگەن اباي شىعارماشىلىعىنداعى ۇلتتى تاربيەلەۋ يدەياسىن ۇعىنۋىمىز قاجەت. ماعجان جۇماباي ۇلى «پەداگوگيكا» ەڭبەگىندە دانىشپان اباي وسىلاي ايتقان دەپ ابايدى مىسالعا ءجيى تارتادى. ۇلت رۋحانياتىنىڭ, ۇلت قۇندىلىعىنىڭ, سالت-ءداستۇرىمىزدىڭ, بۇكىل بويىمىزداعى, قانىمىزداعى قۇندىلىعىنىڭ كىلتى ابايدا», دەيدى الماحان مۇحامەتقاليقىزى.
ارقالى اقىن, جازۋشىلار وداعىنىڭ حاتشىسى, وسى ۇيىمنىڭ استانا قالالىق فيليالىنىڭ ديرەكتورى داۋلەتكەرەي كاپ ۇلى: «بيىل ابايدىڭ ومىردەن وتكەنىنە 120 جىل. ونىڭ زامانىنان الىستاعان سايىن رۋحىنا جاقىنداي بەرەمىز. اباي ايتقان اسىل قاسيەتتەردىڭ بارلىعى قازاق بالاسىنىڭ بويىنان تابىلسا, الاش بالاسى اداسپايدى دەپ ويلايمىن. ويتكەنى الاش زيالىلارىنىڭ ءوزى ابايدىڭ اقىل-ويىن وزدەرىنە تەمىرقازىق قىلدى», دەدى.
سونىمەن قاتار «جۋرناليستەر» اللەياسىمەن قاتار ورنالاسقان «قالامگەرلەر» اللەياسىندا «اباي – رۋحانياتتىڭ التىن قازىعى» ادەبي-سازدى كەش تە كورەرمەننىڭ كوزايىمىنا اينالدى. استانا قالاسى ورتالىقتاندىرىلعان كىتاپحانالار جۇيەسى ۇيىمداستىرعان ءىس-شارانى اكادەميك, «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى مەن اقىن, جازۋشىلار وداعىنىڭ حاتشىسى داۋلەتكەرەي كاپ ۇلى اشىپ بەردى. كەش بارىسىندا ابايتانۋشىلار قاليبەك التىباەۆ پەن الماحان مۇحامەتقاليقىزى جينالعانداردى اباي الەمىنە جەتەلەدى. ء«تىل-قازىنا» ورتالىعىنىڭ قىزمەتكەرلەرى, اقىندار جارقىنبەك ءجۇمادىل ۇلى, ءبىرجان احمەر, ارمان شەريزات قاتىسىپ, ۇلى ابايدىڭ جانە وزدەرىنىڭ ولەڭدەرىن وقىدى. اباي اندەرى اۋەلەپ, «الەمدىك ويدىڭ الىبى» كورمەسى ۇيىمداستىرىلدى. ادەبي-سازدى كەشكە بەلسەندى اتسالىسقاندارعا ورتالىقتاندىرىلعان كىتاپحانالار جۇيەسىنىڭ العىس حاتتارى تابىستالدى.
