ءىس-شارانى الماتى وبلىسىنىڭ دەنە شىنىقتىرۋ جانە سپورت باسقارماسى مەن الماتى وبلىستىق دەنە شىنىقتىرۋ جانە سپورتتى دامىتۋ ورتالىعى ۇيىمداستىردى. شاراعا ساڭلاق سپورتشىنىڭ اناسى مەن تۋىستارى, قازاقستاندىق گرەك-ريم كۇرەسى پالۋانى, 2008 جىلعى بەيجىڭ وليمپياداسىنىڭ كۇمىس جۇلدەگەرى, ەكى دۇركىن ازيا چەمپيونى نۇرباقىت تەڭىزباەۆ باستاعان جەرلەستەرى مەن جاتتىقتىرۋشىلارى جۇماحان تۇرعانبەكوۆ پەن بەرىك جاڭاباتىر ۇلى جانە جانكۇيەرلەرى قاتىسىپ, بايراقتى باسەكەدە ەل نامىسىن قورعاعان باتىر ۇلىن زور قوشەمەتپەن قارسى الدى.
قازاق حالقىنىڭ مەرەيىن اسقاقتاتقان كۇنى وليمپيادا جەڭىمپازىن الماتى وبلىسىنىڭ اكىمى مارات سۇلتانعازيەۆ قۇتتىقتادى. ول دەمەۋ جادىراەۆتىڭ جەتىستىگىنىڭ ماڭىزدىلىعىن ايتا كەلە, 77 كەلى سالماقتا جەرلەسىمىزدىڭ جەڭىپ العان كۇمىسى – قازاق كۇرەسى ءۇشىن تاريحي وقيعا ەكەنىن اتاپ وتكەن ەدى.
تورتكۇل دۇنيە كوز تىككەن جازعى وليپيادادا كوك تۋىمىزدى كوكتە جەلبىرەتكەن دەمەۋ جادىراەۆ جەتىسۋ وبلىسى, پانفيلوۆ اۋدانى, ءۇشارال اۋىلىندا دنيەگە كەلگەن. ول 12 جاسىنان كۇرەسپەن اينالىسا باستاعان. سودان بەرگى تىنىمسىز جاتتىعۋلار مەن جارىس جولدارىندا ايتارلىقتاي جەتىستىكتەرگە قول جەتكىزدى. اتاپ ايتساق, دەمەۋ جادىراەۆ ازيا چەمپيونى, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, قازاق سپورت جانە تۋريزم اكادەمياسىنىڭ شەبەرى, اسكەري قىزمەتكەرلەر اراسىندا ازيا جانە الەم چەمپيوناتتارىنىڭ قولا جۇلدەگەرى اتاندى.
«بالامدى قارسى الۋعا جان-جاقتان جيىلعان قاۋىمعا ريزاشىلىعىمدى بىلدىرەمىن. ەل نامىسىن قورعار ۇرپاقتارىمىز كوپ بولسىن. حالقىما, ەل-جۇرتىما اماندىق تىلەيمىن», – دەپ اعىنان جارىلدى جۇلدەگەردىڭ اناسى كۇليپا بيجانوۆا.
ەسكە سالار بولساق, پاريجدەگى وليمپيادا ويىندارىندا جادىراەۆ شەشۋشى بەلدەسۋدە جاپوندىق اتاقتى پالۋان ناو كۋساكامەن كەزدەستى.
قارقىندى كۇرەسكە قاراماستان, قورىتىندى ەسەپ 5-2 ناو قۋساكانىڭ پايداسىنا بەرىلسە دە, دەمەۋ جادىراەۆتىڭ جەتىستىگى وتانداستارىمىزدى زور قۋانىشقا كەنەلتىپ, كۇمىس مەدال ەنشىلەدى.
وعلان باتىرىمىز جادىراەۆ شيرەك فينالدا قىرعىزستاندىق اقجول ماحمۋدوۆتى سەنساتسيالىق جولمەن جەڭسە, جارتىلاي فينالدا ازىربايجاندىق سانان سۋلەيمانوۆتى 6:1 ەسەبىمەن ۇتتى.
الماتى وبلىسى
