پەتروپاۆل قالاسىندا ءتورت ادامنان تۇراتىن ۇيىمداسقان قىلمىسكەر توبى بيىل قاڭتار–اقپان ايلارىندا ستۋدەنتتەردى قورقىتىپ, سونداي قىلمىستار جاساعان. جاستارى 20 مەن 23 ارالىعىنداعى بۇزاقىلاردىڭ ۇشەۋى بۇرىن سوتتالعان بولىپ شىقتى. ولار قالتالى ستۋدەنتتەردى اڭدىپ, ولاردىڭ قىمبات دۇنيەلەرىن تارتىپ الۋمەن قاتار جالداعان پاتەرلەرىنە الىپ كەلىپ, ۇرىپ-سوعىپ قورقىتۋ ارقىلى ونلاين نەسيە العىزعان. اسىرەسە ءبىر جالدامالى پاتەردە تۇراتىن اۋىلدى جەردەن كەلگەن كوللەدجدىڭ 18 جاسار وقۋشىسى بۇزاقىلاردان قاتتى جاپا شەككەن. قاراقشىلار ونىڭ الەۋمەتتىك جەلىدەگى جازبالارىنا نازار اۋدارعان. وندا بايعۇس ستۋدەنت ءوزىنىڭ بايلىعىمەن, ۇستاعان دۇنيەلەرىنىڭ قىمباتتىعىمەن ماقتانعان. ونى كورگەن بۇزاقىلار ستۋدەنتتىڭ سوڭىنا ءتۇسىپ, اقىرى ونى جالدامالى پاتەرگە الىپ كەلىپ, قوقان-لوقى كورسەتىلىپ, كۇش قولدانۋ ارقىلى بارلىق اقشاسىن تارتىپ الۋمەن قاتار, قىمبات تەلەفونىن 50 مىڭعا ساتقىزىپ, اقشالارىن قالتالارىنا باسقان. قورقىتىپ العىزعان نەسيەلەرىن دە تارتىپ العان. ءبىر جولى, ستۋدەنت ۇيىندە جوعىندا, ەسىگىن بۇزىپ كىرىپ, 70 مىڭ تەڭگەنىڭ دۇنيەسىن ۇرلاپ كەتكەن.
جاس بوزبالا قۇقىق قورعاۋ ورگاندارىنا شاعىنۋعا قورىققان, ويتكەنى بۇزاقىلار ونىڭ پايداسىز ەكەنىن, وزدەرىنىڭ ولارمەن سىبايلاس ەكەنىن ايتىپ, بالانى پسيحولوگيالىق تۇرعىدان ابدەن باسىپ تاستاعان. اتا-اناسى الىستا, ماڭىندا باسقا دا جاقىندارى جوق بوزبالا ءسويتىپ, قاراقشىلارعا ابدەن جەم بولىپ, بارلىعى 400 مىڭ تەڭگەنىڭ اقشاسى مەن دۇنيەسىنەن ايىرىلعان.
وبلىستىق پد باستىعىنىڭ ورىنباسارى, پولكوۆنيك اسقار مۇحامەتقاليەۆتىڭ ايتۋىنا قاراعاندا, وقۋ ورىندارى مەن مۇددەلى مەملەكەتتىك ورگاندار اراسىندا ءوزارا ءىس-قيمىلدى ءتيىمدى ىسكە اسىرۋ شەڭبەرىندە جۇرگىزىلگەن پروفيلاكتيكالىق شارالاردىڭ بىرىندە بوپسالاۋعا ۇشىراعان ستۋدەنت جەدەل ۋاكىلدەرگە جۇگىنىپ, باسىنان كەشىپ جۇرگەن قاسىرەتىن ايتقان. ءسويتىپ, ۇققكب قىزمەتكەرلەرى قىلمىسكەرلەردى دەرەۋ ۇستاعان.
پەتروپاۆل قالالىق سوتىنىڭ شەشىمىمەن قاراقشىلار قىلمىستىق كودەكستىڭ قورقىتىپ اقشا الۋ, باس ەركىنەن ايىرۋ, ۇرلاۋ جانە دەنەگە ورتا دارەجەدەگى جاراقات سالۋ سالۋ باپتارى بويىنشا سوتتالىپ, ۇشەۋىنە 4-تەن 8 جىل ارالارىنداعى باس ەركىنەن ايىرۋ جازاسى بەرىلدى. ال بۇرىن سوتتالماعان ءتورتىنشىسى 4 جىلدىق شارتتى جازاعا كەسىلدى.
پەتروپاۆل
