جاقسىلىق جەردە قالمايدى

بيىل قوعام تاراپىنان قايى­­رىمدىلىق كومەك كۇتەتىن الەۋمەتتىك قورعالماعان جانە از قامتىلعان وتباسىلاردان شىق­قان مەكتەپ جاسىنداعى بالالار سانى بىلتىرعىدان 1 300-گە ارتىپ وتىر. بۇل تۋرالى وبلىستىق ءبىلىم باسقارماسىنىڭ باسشىسى ايناگۇل سۇراعانوۆا ايتتى.

بۇرىن قوعام تاراپىنان ماتە­ريالدىق كومەك «مەكتەپكە جول» اتتى اكتسيا ارقىلى مەملە­كەتتىك اتاۋلى الەۋمەتتىك كومەك الۋعا قۇقىعى بار وتباسىلاردىڭ بالالارىنا, مۇنداي كومەك الماسا دا جان باسىنا شاققانداعى تابىسى ەڭ تومەن كۇنكورىس دەڭگەيىنەن تومەن وتباسىلاردىڭ بالالارىنا, وتباسىلاردا تۇراتىن جەتىم بالالارعا جانە اتا-اناسىنىڭ قامقورلىعىنسىز قالعان بالالارعا بەرىلەتىن. ال بيىل وسى ساناتتارعا توتەنشە جاعداي سالدارىنان شۇعىل جاردەمدى تالاپ ەتەتىن وتبا­سىلاردان شىققان بالالار كىردى. كوك­ت­ەمدەگى تاسقىننىڭ الەگىمەن كوپ­تەگەن وتباسىنىڭ بالالارى مەكتەپكە قا­جەتتى دۇنيەلەرىنەن ايىرىلىپ قالدى. مەم­لە­كەت تاراپىنان وتباسىنا ماتە­ريال­دىق كومەكتەر بەرىلگەنىمەن وقۋشى­لار­دىڭ قاجەتتىلىكتەرى ەسكەرىل­مەگەن ەدى. ەندى سول ولقىلىقتى «مەكتەپكە جول» اكتسيا­سى ارقىلى وتەۋ قولعا الى­نىپ وتىر. سون­دىق­تان بيىلعى قايى­رىم­دىلىق كومەك الۋعا ءتيىستى بالالار سانى بىلتىرعىدان اسىپ ءتۇستى. اكتسيا 1 تا­مىزدا باستالىپ, 30 تامىزعا دەيىن جال­عاسادى. بىلتىر كومەك قورى ­337,4 ملن تەڭگە بولسا, بيىل كومەك كولەمىن 472,2 ملن تەڭگەگە جەتكىزۋ جوسپارلانعان. اكتسيا ۇرانى «جاقسىلىق جاساڭىز!» دەپ اتالادى.

«مەكتەپكە جول» اكتسياسى اياسىنداعى كومەكتىڭ نەگىزگى بولىگى بيۋدجەت قاراجاتى ەسەبىنەن (جالپىعا بىردەي ءبىلىم بەرۋ قورى) جانە قايىرىمدى ازامات­تار­دىڭ دەمەۋشىلىك قاراجاتى ەسەبىنەن كورسەتىلەدى. جالپىعا بىردەي ءبىلىم بەرۋ قورى اياسىندا ءبىلىم الۋشىلار مەن تاربيەلەنۋشىلەرگە كيىم, اياق­كيىم, مەكتەپ كەرەك-جاراعىن ساتىپ الۋ ءۇشىن اتا-انالاردىڭ ەسەپشوتىنا ەڭ تومەنگى كۇنكورىس دەڭگەيىنەن تومەن ەمەس مولشەردە قارجىلاي جانە ماتەريالدىق كومەك كورسەتىلەدى.

بىلتىر اكتسيا اياسىندا بار­لىعى 15 236 وقۋشىعا كومەك كورسەتىلدى. كورسەتىلگەن كومەكتىڭ جالپى سوماسى 404,8 ملن تەڭگەنى قۇرادى, سونىڭ ىشىندە 5 676 وقۋشىعا بيۋدجەتتەن تىس قاراجاتتان 17,0 ملن تەڭگەگە كومەك كورسەتىلسە, 9 560 بالا بيۋدجەت قاراجاتىنان 387,8 ملن تەڭگەگە كومەك الدى. بۇل قاراجاتقا مەكتەپ, سپورت فورمالارى, اياقكيىم جانە كەڭسە تاۋارلارى ساتىپ الىندى.

قىسقاسى, وسى اكتسيانىڭ ارقاسىندا 15 مىڭنان استام وقۋشىنىڭ الەۋمەتتىك سەبەپتەرمەن مەكتەپكە بارماۋىنا جول بەرىلمەيدى. وبلىس كاسىپكەرلەرى اراسىندا تۇراقتى دەمەۋشىلىك كومەك كورسەتەتىن اق جۇرەكتى ازاماتتار دا بار. ءبىلىم باسقارماسىنىڭ باسشىسى ايناگۇل سۇراعانوۆا وسىنداي كومەكتى ۇنەمى كورسەتەتىن «مامبەتوۆ جانە ك» سەرىكتەستىگىنە, «پەتروپاۆل اراق زاۋىتى» اق, «ازكو», «بۋدەننوە سك», «رايسوۆسكوە» جشس, «استىق پريۆولنىي», «زاپادنوە سك», «ES Global agro», «تاحتابرود», «اداني اگرو», «دوستاستىق» سەرىكتەستىكتەرىنىڭ, «ەديل» كومپانياسى, «ازيا-تارانگۋل» جشس, ۆيزيگينا جك, «حانتەمىر-اگرو», «زاگرادوۆسكوە», «پرومەتەي-اگرو», «بروموت س.ۆ.» جك جانە تاعى باسقا ۇيىم باسشىلارىنا العىس ايتاتىنىن جەتكىزدى. «ولاردىڭ كومەكتەرى – ەل بولاشاعىنا قۇيىلعان كاپيتال. ەلىمىزدىڭ وركەندەۋى – وقۋشىلاردىڭ ەشتەڭەدەن تارىقپاي جاقسى ءبىلىم الۋىنا تىكە­لەي بايلانىستى. سوندىقتان جان­اشىر ازاماتتارعا ايتار العى­سىمىز شەكسىز», دەدى ا.سۇراعانوۆا.

الەۋمەتتىك قولداۋدى قاجەت ەتەتىن وقۋشىلاردىڭ اتا-انالارى ءتيىستى قۇ­جاتتارىن مەكتەپكە وتكىزگەننەن كەيىن جار­دەماقى تاعايىندالادى. ونىڭ مولشەرى 43 407 تەڭگە. بۇگىنگى تاڭدا وبلىس­تا وسىنداي بىرجولعى جاردەماقى الۋعا ۇمىتكەر 10 879 وقۋشى انىقتالىپ وتىر. ولاردىڭ سانى ءالى وسەرى ءسوزسىز. الايدا جاردەماقى العان اتا-انالار قارا­جاتتى العان كۇننەن باستاپ 10 جۇ­مىس كۇنى ىشىندە ءبىلىم بەرۋ ۇيىمىنا قاراجاتتىڭ نىسانالى پايدالانىلۋىن قۇجاتتارمەن راستاۋى تالاپ ەتىلەدى.

سولتۇستىك قازاقستان وبلىسى