ەتنوسپورت دوداسىنىڭ كورىگىن قىزدىراتىن حالىقارالىق مارافون-بايگەدە يران, تۇركيا, ماجارستان, قىرعىزستان, وڭتۇستىك افريكا رەسپۋبليكاسى, رەسەيدەن كەلەتىن شاباندوزدار دالانى دۇبىرگە بولەيدى.
قىرعىزستاننىڭ اتبەگىلەرى « ۇلى دالا جورىعى» حالىقارالىق الامانعا قوساتىن اتتارىن دا ەرەكشە ازىرلىكتەن وتكىزىپ, باپتاپ جاتىر. ءتىپتى ونكۇندىك ات سپورتى مارافونىن دا ۇيىمداستىرىپ, كۇنشىلىك جەرگە ايداعاندا «ەرتەدەن سالساڭ, كەشكە وزاتىن» قىلقۇيرىقتارىن ىرىكتەپ العان. قىرعىزستان ات سپورتى فەدەراتسياسىنىڭ ۆيتسە-پرەزيدەنتى ماناس سۇلتانوۆ « ۇلى دالا جورىعى» مارافون-بايگەسىنە شاقىرتۋ العاندا ەرەكشە قۋانعانىن, قىرعىز اتبەگىلەرىنىڭ باپتاپ وتىرعان جۇيرىكتەرىن سىنايتىن الامان ەكەنىن جەتكىزدى.
«قازاقستاندا دۇنيەجۇزىلىك كوشپەلىلەر ويىندارىنىڭ قارساڭىندا وتەتىن حالىقارالىق دوداعا قوساتىن تۇلپارلارىمىزدى ىرىكتەۋ ادىلەتتى ءوتتى. 300 شاقىرىمدىق قاشىقتىققا «كوچموندور جۋرۋشۋ» ىرىكتەۋ مارافونى ۇيىمداستىرىلدى. بۇرىن-سوڭدى مۇنداي حالىقارالىق سايىس بولعان ەمەس. دەمەك شىن جۇيرىككە تۇساۋ بولماي, تەك تۇلپارلار سۇرىنبەي كومبەدەن كورىنسىن دەمەكپىن. بابى مەن باعى قاتار جانعان اتبەگى مەن شاباندوزدىڭ جۇلدىزى جارقىرايتىنى انىق. بارلىق قاتىسۋشىعا ساتتىلىك تىلەيمىن», دەدى م.سۇلتانوۆ. مارافون-بايگە 5 مىڭ جىلدان اسا ۋاقىت بۇرىن ادام بالاسى جىلقى مالىن العاش رەت قولعا ۇيرەتكەن سولتۇستىك قازاقستان وبلىسىنداعى بوتاي ەلدى مەكەنىندە 3 قىركۇيەكتە باستاۋ الادى.
« ۇلى دالا جورىعىنا» كاباردين-بالقار رەسپۋبليكاسىنىڭ اتبەگىلەرى دە جۇيرىگىن باپتاپ, ازىرلىكتى كۇشەيتىپ جاتىر. «امد كاۆكاز» ات سپورتى كلۋبىنىڭ نەگىزىن قالاۋشى احەد ماحوۆ بۇل جىلقى جانۋارىنىڭ توزىمدىلىگىن سىنايتىن دودا ەكەنىن ايتتى.
ء«بىز سىرىن قويناۋىنا جاسىرعان, شەجىرەگە تولى قازاق دالاسىندا وتەتىن تارتىسقا قاتىسۋدى زور مارتەبە تۇتامىز. تۇلپارلارىمىزدى باپتاۋدى قولعا الىپ جاتىرمىز», دەدى ا.ماحوۆ.
ۇلتتىق سپورت قاۋىمداستىعىنا قارايتىن «Joryq» رەسپۋبليكالىق فەدەراتسياسى ۇيىمداستىراتىن حالىقارالىق مارافون-بايگەنىڭ جەڭىمپازدارى 8 كىركۇيەكتە دۇنيەجۇزىلىك كوشپەلىلەر ويىندارىنىڭ اشىلۋ سالتاناتىنا قاتىسادى.
