ەرتەدە وسى ولكەنى مەكەندەپ, كەيىن جويىلىپ كەتكەن بالقاش جولبارىسى باس ءرامىز رەتىندە تاڭدالىپتى. اۋقىمدى ءىس-شارا اياسىندا كوكشەكولدىڭ جاعالاۋىندا تۋريزم كلاستەرىن دامىتۋدىڭ نەگىزگى باستامالارى جۇزەگە اسىپ وتىر. «كوكشە تەڭىزدىڭ» سۋىنا ءتۇسىپ, قۇمىنا قىزدىرىنعىسى كەلەتىن ساياحاتشىلاردىڭ قاتارى كەيىنگى ءۇش جىلدا ارتىپ وتىر. بۇعان «Balkhash TourFest» فەستيۆالىنىڭ دە ىقپالى بار دەيدى تۋريزم ماماندارى.
فەستيۆالدا سۋ قويماسىن تازارتاتىن قۇرىلعى ىسكە قوسىلدى. قۇرىلعى كولدىڭ بەتىندەگى قالدىقتاردى تازالايدى. مۇنىڭ كومەگىنە ايىنا 7-10 مارتە جۇگىنەدى. قۇرىلعى بالقاش قالاسى اكىمدىگىنىڭ بالانسىنا بەرىلدى.
ەجەلدەن جەلكەندى قايىقپەن ەلگە بەلگىلى بالقاش جەلكەندى رەگاتاسىنىڭ اشىلۋى دا ۇلكەن قۋانىش سىيلادى. كول بەتىندەگى جارىسقا الماتى, قاراعاندى, تۇركىستان وبلىستارىنىڭ, بالقاش, شاردارا قالالارىنىڭ كىل مىقتىلارى قاتىستى.
«رەگاتا بالقاش كولىندە جاڭا جەلكەندى سپورت ءتۇرىنىڭ كۇش الۋىنا سەپتىگىن ءسوزسىز تيگىزەدى», دەيدى رەسپۋبليكالىق دەڭگەيدەگى باس تورەشى, قازاقستاننىڭ بىرنەشە دۇركىن چەمپيونى يۋري پاسىنكوۆ.
اشىق اسپاننىڭ استىنداعى كينوتەاتردان ەلىمىزدىڭ جانە شەتەل رەجيسسەرلەرىنىڭ ۇزدىك فيلمدەرى كورسەتىلدى. باتۋت ايماعىندا «جاسىل ەل» جاستارىنىڭ اراسىندا Ninja Battle, Byroglaz events ويىندارى وتكىزىلدى. ۇلكەندەرگە تاڭعى فيتنەس, گيمناستيكا, تىنىس الۋعا ارنالعان جاتتىعۋلار, يوگا جاساۋعا ماماندار نۇسقاۋلىق بەردى. جاعاجاي ۆولەيبولى, جاعاجاي كۇرەسى, ونداعى ارقان تارتۋ جانە «كوڭىلدى ستارتتار» بويىنشا جاعاجاي درايۆ ءتۋرنيرى دۋماندى دۇبىرگە بولەدى. جاپپاي ءجۇزۋ دە جۇرتتىڭ كوڭىلىنەن شىعىپ جاتتى. فۋتبولكالارعا سۋرەتتەر, بالالارعا اكۆاگريم سالىندى. ۆولەيبول, كىر تاسىن كوتەرۋ سپورتى جانە ارمرەستلينگ بويىنشا جارىس ۇيىمداستىرىلدى. دويبى, شاحمات, توعىزقۇمالاق سەكىلدى تاقتا ويىندارى دا تارتىستى ءوتتى.
فەستيۆال كەزىندە اۋماقتى تازا ۇستاۋدا ۇلكەن كۇشتى قاجەت ەتەدى. ۇيىمداستىرۋشىلار ونىڭ جولىن وڭاي تاۋىپتى. ءۇش بوس بوتەلكەگە 1 بالمۇزداق ۇلەستىرگەن. بۇعان حالىق بەلسەندى قاتىستى.
– بالقاش كولىن ءتۋريزمنىڭ تەمىرقازىعىنا اينالدىرۋعا زور مۇمكىندىك بار. بۇل ءۇشىن الدىمەن قارجىلىق جانە زاڭنامالىق تۇرعىدان قولداۋ قاجەت. وسى باعىتتا جۇمىستار جۇزەگە اسىرىلىپ جاتىر. جاقىندا عانا وتكەن فەستيۆالدا ەتنومۋزىكا مەن ۇلتتىق ويىندارعا, ونىڭ ىشىندە ارقان تارتىس, قولكۇرەس, توعىزقۇمالاق, اسىق اتۋ سەكىلدى ويىندارعا باستى نازار اۋدارىلدى. كەلۋشىلەرگە ارنايى ۇلتتىق اسپاپتار كورمەسى ۇيىمداستىرىلدى. فەستيۆالعا ەكى كۇندە 30 مىڭعا جۋىق ادام كەلدى. كەلۋشىلەر ءۇشىن جاعالاۋعا دەيىن تەگىن تاسىمالداۋ ۇيىمداستىرىلدى. اۆتوبۋستار ءار 15 مينۋت سايىن 09.00-دەن 00.15-كە دەيىن حالىققا تەگىن قىزمەت كورسەتتى. اقىسىز كولىك تۇراعى, پوليتسيا بەكەتى, جەدەل جاردەم قىزمەتى مەن قۇتقارۋشىلار توبى جۇيەلى جۇمىس ىستەدى. مۇنىڭ بارلىعى – دەمالۋشىلارعا جاسالعان قولايلى جاعداي, – دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ.
فەستيۆالدى ونەرىمەن قىزدىرعان ازامات باقيا جانە «جوشى» ەتنوفولكلورلىق توبىنىڭ اندەرى مەن شەبەرلىك ساباعى جۇرتشىلىققا رۋحاني ازىق بولدى. قازاق ونەرتانۋ عىلىمىنىڭ وركەندەۋىنە ۇلكەن ۇلەس قوسىپ وتىرعان توپتىڭ شەبەرلىك ساباعىندا ۇلتتىق اسپاپتاردى جاساپ كورسەتتى. ساكەن سەيفۋللين اتىنداعى قاراعاندى وبلىستىق اكادەميالىق قازاق دراما تەاترى بالالارعا «كەرىك پەن مۇيىزتۇمسىق» ەرتەگىسىن ساحنالادى. «Dance battle», «timur’s team» سەكىلدى زاماناۋي بي توپتارى مەن «Ivory live band» كاۆەر توبى قوناقتاردىڭ كوڭىلىن كوتەردى. ال ەnergy شىنىعۋ جاتتىعۋلارمەن zumba ءبيى, «اسپازشىلار بايقاۋىنىڭ» اسەرى تىم باسقا. وبلىستىڭ قالا, اۋداندارىنداعى حورەوگرافيالىق انسامبلدەردىڭ كونتسەرتى كوكشە كولدىڭ جاعاسىنداعى مەرەكەنىڭ كورىگىن قىزدىردى. قاس قارايعان سوڭ ۇلكەن ساحنادا DJ نيكيتا فيلاتوۆ ءان ايتىپ, كوبىك كەشى ءوتتى.
– وسىنداي قاداممەن بالقاشتىڭ بىرىككەن اراب امىرلىكتەرى, دۋباي, تۇركيا سياقتى ءتۋريزمدى دامىتقان ەلدەردىڭ قاتارىنا ەنۋگە تالپىنىس جاساپ جاتقانىمىز قۋانتادى. بولاشاقتا وعان جەتەتىنىمىزگە سەنىمدىمىز, – دەيدى بالقاش قالاسىنىڭ مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمىنىڭ باستىعى ءىزباسار شاكەنوۆ.
قولونەرشىلەردىڭ كادەسىيلارى مەن زەرگەرلىك بۇيىمدارى سورەگە قويىلعان كورمەنى دە كوپشىلىك قىزىعا تاماشالادى.
فەستيۆالدىڭ حەدلاينەرى داستان ورازبەكوۆ شىرقاعان انگە جاستار قوسىلدى. فەستيۆالدىڭ جابىلۋ سالتاناتىنداعى وتشاشۋ كەلۋشىلەردىڭ كوڭىلىنە شۋاق سىيلادى. ەلىمىزدىڭ تۇپكىر-تۇپكىرىنەن كەلگەن قوناقتار فەستيۆالدان قيماي تارقاستى.
قاراعاندى وبلىسى,
بالقاش قالاسى
