ستاتيستيكانى سويلەتسەك, جىل باستالعالى ەكى ورتادا 30 جول-كولىك اپاتى تىركەلكەن. سالدارىنان 29 ادام قازا تاپقان. 44 جولاۋشى ءتۇرلى دەڭگەيدە جاراقات الىپ, اۋرۋحاناعا تۇسكەن. قورقىنىشتى كورسەتكىش!
14 شىلدە كۇنى عانا جان تۇرشىگەرلىك تاعى ءبىر وقيعا ورىن الدى. اقشاتاۋ كەنتىنىڭ ماڭىندا اۆتوبۋس پەن جەڭىل كولىك قاقتىعىسىپ, 5 ادام ءدال سول جەردە ءتىل تارتپاي كەتتى. وسى سەكىلدى قانشا عۇمىر قىرشىننان قيىلىپ جاتىر. الەۋمەتتىك جەلىنى اشىپ قالساڭىز بولدى, وسى ءبىر باعىتتا ورىن العان جول اپاتىنان كوز سۇرىنەدى. جاعاڭىزدى ۇستايسىز…
ءيا, بۇل باعىت تەك بالقاشقا عانا اپارمايدى. استانا مەن الماتىنى جالعايتىن ۇلكەن كۇرەتامىر. سول سەبەپتى, كۇنىنە مىڭ سان جۇك كولىگى قاتىنايدى. جەڭىل كولىكتە ءتىپتى ەسەپ جوق. وكىنىشكە قاراي, قاراعاندى مەن بالقاشتىڭ اراسىندا جول-كولىك وقيعاسى ءجيى تىركەلەدى. ەل-جۇرت ونىڭ سەبەبىن ساعىزشا سوزىلعان جولدىڭ قۇرىلىسىنان كورەدى.
جاقىندا عانا قاراعاندىدان اقباستاۋ اۋىلىنا دەيىن 4 جولاق پايدالانۋعا بەرىلدى. بۇل تۋرالى بۇقارالىق اقپارات قۇرالدارىندا سۇيىنشىلەدىك. ال اقباستاۋدان ءارى قارايعى جول ەكى-اق جولاق. 15 تامىزعا دەيىن بالقاش قالاسىنىڭ جولايرىعىنان بەكتاۋ اتا تۋربازاسىنا دەيىن جالپى ۇزىندىعى 50 شاقىرىم بولاتىن 2 جولاق اشىلادى. قۇقىق قورعاۋ ورگانىنىڭ وكىلى 4 جولاقتىڭ تولىقتاي اشىلۋى قاۋىپسىز كولىك قوزعالىسىن قامتاماسىز ەتەدى دەيدى.
بۇل ماسەلەگە قاتىستى «قازاۆتوجولدىڭ» دا ءوز ايتارى بار. ولاردىڭ مالىمدەۋىنشە, قاراعاندى – بالقاش جول ۋچاسكەلەرىن كەزەڭ-كەزەڭىمەن جوسپارلى ىسكە قوسۋ جۇمىستارى ءجۇرىپ جاتىر. قازىرگى ۋاقىتتا اسفالت جابىنىنىڭ جوعارى قاباتىن توسەۋ جۇمىستارى تياناقتالىپ كەلەدى. سايكەسىنشە, قۇرىلىس ءجۇرىپ جاتقان جول ۋچاسكەسىنە ءتيىستى جول بەلگىلەرى, جىلدامدىقتى شەكتەۋ بەلگىلەرى قويىلعان. بىراق ونى ەلەپ جاتقان جۇرگىزۋشى جوق, ءتىپتى جابىق جولعا دا شىعىپ الىپ, زۋلايتىندار بار ەكەن. سودان سوڭعى ءبىر سوراقىلىق – جىلدامدىق شەكتەۋلەرى ەسكەرىلمەيدى.
جالپى, قاراعاندىدان باستاپ, جامبىل وبلىسىنىڭ شەكاراسىنا دەيىنگى جول 513 شاقىرىم. ال قاراعاندى مەن بالقاشتىڭ اراسى 363 شاقىرىم. بيىلعا دەيىن وسى ەكى ورتادا اينالما جول كوپ بولدى. ولاردىڭ ءبارى جابىلىپ, اۆتوباننىڭ ەكى جولاعى اشىلىپ, جاعداي الدەقايدا جاقساردى دەيىن دەسەك, جوعارىداعى كورسەتكىشكە قاراپ, تاعى دا ويىمىز تۇسالادى.
قۇرىلىسى باستالعالى بەرى قانشا كولىك قاقتىعىسىپ, قانشا ادام قازا تاپقانىن ەسەپتەۋدىڭ وزىنە جۇرەك بارمايدى. ءسويتىپ, ەل كۇتكەن اۆتوبان اجال تاسجولىنا اينالىپ شىعا كەلدى. جولدى قىسقارتامىن دەپ قارسى باعىتقا شىققاندار, ۋاقىت ۇتامىن دەپ جىلدامدىقتى اسىرعاندار وزىنە دە, وزگەگە دە قيانات كەلتىردى. بالا – جەتىم, جار جەسىر قالدى.
جول قاۋىپسىزدىگىن قامتاماسىز ەتەتىن وبلىستاعى پوليتسيا دەپارتامەنتى پاترۋلدىك كولىكتەردىڭ سانىن كۇرت كوبەيتكەن. وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى قايىربەك شاكەنوۆ بۇل تاسجولمەن كۇنىنە 33 مىڭ كولىك قاتىنايتىنىن, پاترۋلدىك پوليتسيا قىزمەتكەرلەرى كۇنىنە 3500 كولىكتى توقتاتاتىنىن ايتتى.
«رەسپۋبليكالىق ماڭىزى بار جولدارداعى اپاتتىلىقتى تۇراقتاندىرۋ ءۇشىن مامىر ايىنان باستاپ, كەزەكشىلىك سانى 17-دەن 37-گە دەيىن ۇلعايتىلدى. قىزمەت وتكەرۋ كەزىندە پاترۋلدىك پوليتسيا قىزمەتكەرلەرى اپاتقا اسەر ەتەتىن بۇزۋشىلىقتاردى انىقتاپ قانا قويماي, جۇرگىزۋشىلەرمەن ۇيقى جانە دەمالىس رەجىمىن ساقتاۋ تۋرالى پروفيلاكتيكالىق اڭگىمەلەر جۇرگىزەدى. پوليتسيا قىزمەتكەرلەرى ءبىر تاۋلىكتە 3,5 مىڭ جۇرگىزۋشىنى قامتيدى. بۇل ۋچاسكەدەگى كولىك اعىنى تاۋلىگىنە 33 مىڭعا جۋىق اۆتوكولىكتى قۇرايدى. جول قوزعالىسى قاۋىپسىزدىگىن قامتاماسىز ەتۋ ماقساتىندا وسى جىلدىڭ باسىنان بەرى اۆتوموبيل جولدارىنا, قالالار مەن اۋدان ورتالىقتارىنىڭ كوشەلەرى مەن جول جەلىسىنە 1217 تەكسەرۋ جۇرگىزىلدى. ناتيجەلەرى بويىنشا جول-كوممۋنالدىق ورگانداردىڭ باسشىلارىنا اۆتوجولدارداعى كەمشىلىكتەر ءۇشىن 1170 ۇيعارىم بەرىلدى. كەيىنگى 6 ايدا مەردىگەرلىك ۇيىمدارعا («سينەميداسستروي» جشس, «سيتيككونستراكشن» جشس, «كولينس سمس» جشس) قاتىستى 40 حاتتاما تولتىرىلدى. سونىمەن قاتار «قازاۆتوجولعا» بيىلدىڭ وزىندە 36 920 تەڭگە ايىپپۇل سالىندى», دەيدى قايىربەك شاكەنوۆ.
پرەمەر-مينيستر ولجاس بەكتەنوۆ قاراعاندى مەن الماتىنى جالعاپ جاتقان تاسجولدا بايلانىس جەلىسىنىڭ جوقتىعىن كوتەرگەن ەدى. بۇل دا – كۇيىپ تۇرعان ماسەلەنىڭ ءبىرى. نەگە دەسەڭىز, جولدا اپات ورىن العان جاعدايدا بىردەن حابار تاراتۋ قيىنعا سوعادى. سودان العاشقى كومەك كورسەتۋ قىزمەتى كەشەۋىلدەيدى.
«قالاارالىق جولداردا شەشىلمەي كەلە جاتقان ۇلكەن ماسەلە بار. الىس ساپارعا اتتانعان جولاۋشى ءموبيلدى بايلانىستان مۇلدە اجىرايدى. ماسەلەن, قاراعاندى مەن الماتىنىڭ اراسىنداعى 500 شاقىرىمدىق جولدا اپاتقا تۇسكەندەر دەر كەزىندە كومەك شاقىرا المايدى. تسيفرلاندىرۋعا جاۋاپتى ۆەدومستۆو وسىنى باستى نازارعا الۋعا ءتيىس. سونىمەن قاتار قاۋىپسىزدىكتى قامتاماسىز ەتەتىن بەينەباقىلاۋ جۇيەسى جوق», دەدى و.بەكتەنوۆ.
وبلىستىق پوليتسيا دەپارتامەنتى جالپى ايماق بويىنشا جول-كولىك وقيعاسى 55 پايىزعا وسكەنىن, ال ودان كوز جۇمعانداردىڭ ۇلەسى 44,7 پايىزدى قۇراعانىن ايتادى. بۇعان قاتىستى ساراپتاما ناتيجەسى جول اپاتىنىڭ باسىم بولىگى جىلدامدىقتى شەكتەن تىس اسىرعاننان دەپ وتىر.
قاراعاندى وبلىسى
