فوتو: olympic.kz
ازيا ويىندارى مەن قۇرلىق چەمپيوناتىندا جۇلدە الىپ جۇرگەن موڭعوليانىڭ ەڭسەلى قىزىنا ونىڭ ءالى جەتپەدى. بۇل سالماقتا الەمدە ءۇش رەت جۇلدە الىپ, ءوز قۇرلىعىندا قارسىلاس شىداتپاي جۇرگەن برازيليالىق بەاتريس سوۋزانىڭ باعى جاندى. فينالدا ول يزرايلدىك راز گەرشكونى جولىنان ىعىستىردى. ءۇشىنشى ورىندى فرانتسيالىق رومانە ديككو مەن وڭتۇستىككورەيالىق كيم كايۋن يەمدەندى. ەرلەر اراسىندا اسا اۋىر سالماقتا تەددي رينەرگە تەڭ كەلەر ەشكىم تابىلمادى. وليمپيادانىڭ اشىلۋ راسىمىندە القىزىل الاۋى تۇتاندىرعان فرانتسيانىڭ اتاعى جەر جارعان الىبى شەشۋشى تۇستا بيىلعى الەم چەمپيونى كيم ميندجوننىڭ تاس-تالقانىن شىعاردى. تاجىك تەمۋر راحيموۆ پەن وزبەك الىشەر يۋسۋپوۆ قولا مەدالدى ەنشىلەدى.
ودان كەيىن كوماندالىق سايىستاردى تاماشالادىق. قازاقستان قۇراماسى باستاپقى باسەكەدە برازيليامەن ايقاستى. العاشقى بولىپ تاتاميگە شىققان ءابيبا ابۋجاقىنوۆا وزىنەن جوعارى ەكى سالماقتا ونەر كورسەتەتىن سيلۆا رافاەلامەن كۇرەستى. بۇل بەلدەسۋ وليمپيادا مەن دۇنيەجۇزىلىك دودانى ەكى رەت ۇتقان 32 جاستاعى اككى دزيۋدوشىنىڭ پايداسىنا شەشىلدى. كەلەسى كەزدەسۋدە دانيار شامشاەۆ دانيەل كارنيننەن جەڭىلىپ جاتىپ, باسەكە بەل ورتادان اۋعان تۇستا جەڭىستى قارسىلاسىنىڭ ۋىسىنان ج ۇلىپ اكەتتى. توكيو وليمپياداسى مەن تاشكەنتتەگى الەم چەمپيوناتىندا ۇزدىك ۇشتىكتى تۇيىندەپ, پانامەريكا بىرىنشىلىگىندە ءۇش رەت توپجارعان جامپوز قازاق بالۋانىنىڭ «قاقپانىنا» قالاي تۇسكەنىن ءوزى دە اڭعارماي قالدى. ءۇشىنشى بولىپ ەسميگۇل كۋيۋلوۆا ونەر كورسەتتى. وسىدان باقانداي 16 جىل بۇرىن بەيجىڭ وليمپياداسىندا قولا مەدالدى يەلەنگەن 36 جاستاعى ارداگەر سپورتشى كەتلين كۋدروسقا 22 جاستاعى قازاق قىزىنىڭ ءالى جەتپەدى. ابىلايحان جۇبانازار وجەتتىگىمەن ءوز قۇرلىعىنىڭ مىقتىسى رافاەل ماسەدونى تىزە بۇكتىردى. وسى ورايدا قانداسىمىزدىڭ 81, ال برازيليالىقتىڭ 90 كگ سالماق دارەجەسىندە ونەر كورسەتەتىنىن دە ەسكەرگەن جوق. بىراق ودان كەيىن كاميلا بەرلىقاش پاريج وليمپياداسىنىڭ جەڭىمپازى بەتاريس سوۋزادان, نۇرلىحان شارحان لەوناردو كونسالۆەستەن ۇتىلدى. ءسويتىپ, قازاقستان جارىس جولىنان شىعىپ قالدى. كوماندالىق سايىستىڭ فينالىندا فرانتسيا جاپونيانى 4:3 ەسەبىمەن ۇتسا, قولا مەدال كانادا مەن برازيلياعا بۇيىردى.
