جىلناما قايتا جاڭعىردى
سپورتتىق گيمناستيكا 1896 جىلى افينادا العاش رەت ۇيىمداستىرىلعان وليمپيا ويىندارىنىڭ باعدارلاماسىنا ەنگەن. ەرلەر مەن ايەلدەردى قوسا ەسەپتەگەندە, بۇل جەردە 14 جۇلدە جيىنتىعى ساراپقا سالىنادى. حح عاسىردىڭ ەكىنشى جارتىسىندا شىمكەنتتىك يۋري تساپەنكو مەن نەللي كيمنىڭ حالىقارالىق جارىستاردا اتوي سالعانىن كوزىقاراقتى كورەرمەندەر ۇمىتا قويعان جوق. تساپەنكو 1994 جىلى توكيو وليمپياداسىندا 1 كۇمىس پەن 1 قولانى قورجىنعا سالدى. كيمنىڭ كورسەتكىشى تىپتەن كەرەمەت بولدى. نەللي 1976 جىلى مونرەال, 1980 جىلى ماسكەۋدەگى دودالاردا 5 التىن مەن 1 كۇمىس مەدالدى ولجالادى. 1988 جىلى سەۋلدە قوس جەرلەسىمىز اتوي سالدى. اقتوبەلىك ۆالەري ليۋكين 2 التىن مەن 2 كۇمىستى يەلەنسە, الماتىلىق ۆلاديمير نوۆيكوۆ كوماندالىق سايىستا جەڭىس تۇعىرىنىڭ ەڭ بيىك ساتىسىنا كوتەرىلدى. بىراق جەرلەستەرىمىزدىڭ بۇل تابىسىنىڭ بارلىعى دا كەلمەسكە كەتكەن كسرو-نىڭ ەنشىسىنە جازىلدى.
تاۋەلسىزدىك العاننان كەيىن دە قازاقستاننان جاقسى گيمناسشىلار شىقتى. بۇرىن ءبىر تۋدىڭ استىندا بولعان رەسەي, بەلارۋس, ۋكراينا, وزبەكستان, لاتۆيا قۇرامالارى الەم چەمپيوناتتارىندا مەدالدى «كۇرەپ» الىپ جاتقاندا, ءبىزدىڭ جىگىتتەر اراسىنان تەك سەرگەي فەدورچەنكونىڭ عانا باعى جاندى. 1997 جىلى لوزاننادا قولدى تىرەپ جاسالاتىن جاتتىعۋدا ول باس جۇلدەنى ولجالادى. جالعىز قوماقتى تابىسىمىز – وسى. وزگە جەرلەستەرىمىز ءتاۋىر ونەر كورسەتكەنىمەن, ولجاعا كەنەلە المادى. ال وليمپيادادان قورجىنىمىز ۇنەمى بوس قايتىپ ءجۇردى.
فرانتسيانىڭ باس شاھارىندا سول ولقىلىقتىڭ ورنى تولدى. فينالدىق سايىستا 15,433 ۇپاي جيعان 26 جاستاعى ناريمان قۇربانوۆ كۇمىس مەدالدى ەنشىلەدى. ول تەك الەم مەن ەۋروپانىڭ ەكى دۇركىن چەمپيونى ريس ماككلەناگاندى العا جىبەردى. جەرلەسىمىز يرلانديانىڭ دۇلد ۇلىنەن نەبارى 0,100 ۇپاي قالىپ قويدى. الەم چەمپيونى, پانامەريكا ويىندارىنىڭ جەڭىمپازى, امەريكالىق ستيۆەن نەدوروشيك (15,300 ۇپاي) قولا مەدالدى قاناعات تۇتتى. ال وليمپيادانىڭ 3 دۇركىن چەمپيونى, سول جارىستىڭ 3 دۇركىن قولا جۇلدەگەرى, 3 دۇركىن الەم چەمپيونى جانە سول جارىستىڭ 5 دۇركىن كۇمىس جۇلدەگەرى, ۇلىبريتانيالىق ماكس ۋيتلوك ءتورتىنشى ورىننان اسا الماسا, ريو وليمپياداسىندا – 2 (1 التىن, 1 كۇمىس), الەم چەمپيوناتىندا – 5 (1+2+1), ەۋروپا ويىندارىندا – 6 (3+3+0) جانە قۇرلىق بىرىنشىلىگىندە 14 (7+3+4) رەت جەڭىس تۇعىرىنا كوتەرىلگەن ۋكراينانىڭ ماقتانىشى ولەگ ۆەرنياەۆ بەسىنشى ساتىعا تابان تىرەدى. مىنە, وسى مالىمەتتەردىڭ وزىنەن-اق اكەسى حۋسانجان ءشارىپ ۇلىنىڭ شاكىرتى ناريمان قۇربانوۆقا عالامدىق دودادا جەڭىس تۇعىرىنا كوتەرىلۋ ءۇشىن قانداي سىناقتان وتۋگە تۋرا كەلگەنىن شامالاي بەرۋگە بولادى.
جەڭىس تۇعىرىنان تۇسكەن بەتتە ناريمان: «وليمپيادالىق تسيكل بارىسىندا وتكەن باسەكەلەر بارىسىندا مەن باعدارلاما سوڭىندا ءجيى قۇلايتىنمىن. بۇل مەنىڭ تەحنيكالىق نەمەسە تاكتيكالىق كەمشىلىگىم ەمەس ەدى. كوبىنە-كوپ پسيحولوگيالىق تۇرعىدان ۇتىلاتىنمىن. سول ولقىلىقتىڭ ورنىن تولتىرۋ ءۇشىن ەش ايانباي جاتتىقتىم. كوپ ەڭبەكتەندىم. وليمپيا ويىندارىندا ءوزىمنىڭ مول تاجىريبەمە ارقا سۇيەي وتىرىپ, بار بىلگەنىمدى تولىعىمەن اۆتوماتتى تۇردە ورىنداپ شىقتىم. ەرەن ەڭبەك ەش كەتكەن جوق. پاريجدە كۇمىس مەدالدى يەلەندىم. قازىر قۋانىشىمدا شەك جوق», دەپ اعىنان جارىلدى.
