اتىراۋ. 26 ءساۋىر. اتىراۋداعى ەڭ قارت سايلاۋشىنىڭ ءبىرى – نىشان اجە جۇباەۆا بيىلعى 1 قاڭتاردا 104 جاسقا تولدى. ول ەل تىنىشتىعى ءۇشىن داۋىس بەردى. بۇل تۋرالى egemen.kz ءتىلشىسى حابارلادى.
جاس كۇنىنەن ءومىردىڭ قيىندىعىن كوپ كورىپتى. سوعىس جىلدارىندا ەگىنشى بولدى, كەيىن ءارتۇرلى جۇمىستار اتقارعان. مايداننان امان ورالعان ومىرلىك جارى جۇباي قاريامەن بىرگە ەكى قىزى مەن بايمۇراتتاي ۇلىنىڭ قىزىعىن كوردى. ون نەمەرەنىڭ ءبىرى ءازيدوللا مەن كەلىنى عاسىردان دا ۇزاق عۇمىر جاساعان اجەسىن ماپەلەپ وتىر. التى شوبەرەسى, اسىرەسە, اسىلحانى «اجەلەپ», بال قىلىعىمەن باۋرايدى.
«اللا بۇگىنگى ۇرپاقتى باقىتتى ومىرگە جەتكىزە كورسىن, ەلىمىزدىڭ بىرلىگى مەن تىنىشتىعى بۇزىلماسا ەكەن», – دەپ كۇنى-ءتۇنى تىلەك تىلەيتىن نىشان اجە ءالى دە تىڭ. دالاعا ءوزى كىرىپ-شىعادى, كوزىلدىرىككە جۇگىنىپ كورمەپتى. ءتىپتى, اعايىن-تۋىستىڭ جاقسىلىعىن بولىسۋدەن قالمايدى ەكەن. بىراق بۇرىنعىداي ەمەس, بۇل جولى سايلاۋ ۋچاسكەسىنە بارا العان جوق. №64 ۋچاسكەلىك سايلاۋ كوميسسياسى توراعاسىنىڭ ورىنباسارى مەيرامبەك ارىستانعاليەۆ پەن كوميسسيا مۇشەسى عالىمجان سۇلتانوۆ نىشان اجەنىڭ ۇيىنە جىلجىمالى جاشىكتى الىپ كەلدى.
ءوز تاڭداۋىن جاساعاننان كەيىن نىشان اجە: «قازاق ەلى امان, جاستاردىڭ بولاشاعى جارقىن بولسىن, اينالايىندار!» – دەپ باتاسىن بەردى.
جولداسبەك شوپەعۇل.
دەرەك: egemen.kz.
سۋرەت راحىم قويلىباەۆ.
