بىلتىر جامبىل وبلىسى بايزاق اۋدانىنىڭ 342 تۇرعىنىنا «اۋىل اماناتى» جوباسى اياسىندا 2,1 ملرد تەڭگەگە 2,5%-بەن جەڭىلدىگى بار نەسيە بەرىلدى. ءبىر جىل ىشىندە اۋىلداردا جاڭا ءوندىرىس ورىندارى اشىلدى. تامارا دۇيسەنوۆا اۋىل تۇرعىندارىمەن كەزدەسىپ, تابىستى جوبالارمەن تانىستى.
جالعىزتوبە اۋىلىنىڭ تۇرعىنى عانيبەك جۇماساەۆ باعدارلاما بويىنشا الىنعان 6 ملن تەڭگە مولشەرىندە جەڭىلدىگى بار نەسيە قاراجاتىنا كاسىبي جابدىقتار ساتىپ الىپ, تەمىر شاتىر جابىندارىن, مەتالل پليتكالار, پىشىندە توسەنىشتەر ازىرلەۋدى قولعا العان. كاسىپكەر ءوز ءونىمى ۇلكەن سۇرانىسقا يە بولاتىنىنا سەنىمدى: كورشىلەس ەكى اۋىلدا جەكە تۇرعىن ءۇي سالۋعا 700-دەن استام ۋچاسكە بولىنگەن. وندا قۇرىلىس جۇمىس باستالدى جانە اۋىل تۇرعىندارى جەرگىلىكتى وندىرۋشىدەن شاتىر جابىنىنا تاپسىرىس بەرە الادى.
ۆيتسە-پرەمەرگە اۆتوكولىك جۋ, مونشا كەشەنى, سۇلۋلىق سالوندارى جانە باسقا دا نىسانداردىڭ ءساتتى جۇزەگە اسىپ جاتقانى باياندالدى. تامارا دۇيسەنوۆا ىسكە اسىرىلىپ جاتقان جوبالارعا وڭ باعاسىن بەرىپ, جەرگىلىكتى تۇرعىنداردى اۋىل حالقىنىڭ ءومىر ءسۇرۋ دەڭگەيىن ارتتىرۋعا باعىتتالعان مەملەكەتتىك باعدارلامالار تۋرالى حاباردار ەتتى. بۇگىندە ءوز بيزنەسىن اشقىسى كەلەتىن جاستاردىڭ جەڭىلدىگى بار نەسيە الۋعا مۇمكىندىگى مول, ال الەۋمەتتىك وسال ساناتتاعى ازاماتتار ءۇشىن وتەۋسىز گرانتتار كوزدەلگەنى اتاپ ءوتىلدى.
وبلىس اكىمدىگىندە وتكەن وتىرىستا «اۋىل اماناتى» باعدارلاماسىن ناسيحاتتاۋ جانە حالىقتىڭ بيزنەس-يدەيالارىن قولداۋ بويىنشا جۇرگىزىلىپ جاتقان جۇمىس تۋرالى جامبىل, تالاس جانە جۋالى اۋداندارىنىڭ اكىمدەرى باياندادى. اقتوبە وبلىسى سارجانساي اۋىلدىق وكرۋگىنىڭ اكىمى وسى باعىتتاعى تاجىريبەسىن ءبولىستى.
«اۋىل تۇرعىندارىنىڭ ءال-اۋقاتىن ارتتىرۋ – مەملەكەت دامۋىنىڭ كەپىلى. «اۋىل اماناتى» جوباسى ءار ءوڭىردىڭ ەرەكشەلىگىن ەسكەرە وتىرىپ, ءار وبلىستا ىسكە اسىرىلۋدا. تابىستى جەتىستىكتەرىن ءبولىسۋ جانە باعدارلامانى جۇزەگە اسىرۋدىڭ ءتيىمدى جاعدايىن كەڭىنەن تاراتۋ ماڭىزدى. اۋىل اكىمدەرى حالىققا ءتۇسىندىرۋ جۇمىستارىن بەلسەندى جۇرگىزۋى ءتيىس», — دەپ اتاپ ءوتتى تامارا دۇيسەنوۆا.
