تاتتىمبەت قارا ەڭبەكپەن وسكەن, ماڭداي تەردىڭ قادىرىن بىلەتىن ازامات. اۆتوپارككە جۇمىسقا ورنالاسقانشا بىرنەشە جەردە ەڭبەك ەتتى. جەتى قات جەر استىنا دا ءتۇستى. كوستەنكو اتىنداعى شاحتادا دا ءبىراز جىل تەر توكتى. كەيىن ءوزىنىڭ قولىنان كەلەتىن قازىرگى سلەسارلىق قىزمەتكە اۋىستى. وسى جەردە ءجۇرىپ ءوسىپ-ونگەن تاتتىمبەتكە بىرنەشە ۇسىنىس تۇسسە دە, اۆتوپاركتەن كەتكىسى جوق. ويتكەنى جۇلدىزىمدى جاققان دا, باعىمدى تاپقان دا وسى ءبىر جۇمىس ورنى دەيدى.
مۇندا كۇنىنە ءتورت-بەس اۆتوبۋستى تەحنيكالىق تەكسەرىستەن وتكىزەدى. ماي-سۋىن اۋىستىرادى. فيلترلەرىن جاڭالايدى. بۇزىلىپ تۇرعان بولشەكتەرىن ايىرباستايدى. قالا ىشىندەگى كوك اۆتوبۋستار ەش كەدەرگىسىز ءجۇرىپ تۇرسا, وندا تاتتىمبەت سەكىلدى جۇمىسىنا جاۋاپتى مەحانيكتەردىڭ ەڭبەگى دەپ ءبىلىڭىز.
«تاڭنان كەشكە دەيىن توقتاۋسىز جولدا جۇرەتىن اۆتوبۋستاردا تەحنيكالىق كىنارات بولماۋى كەرەك. ويتكەنى ولار جولاۋشى تاسىمالدايدى. سوندا ءبىزدىڭ دە جاۋاپكەرشىلىك جۇگىمىز اۋىر دەگەن ءسوز. دەگەنمەن قازىر بۇرىنعىداي ەمەس, اۆتوبۋستار ءبىرشاما جاڭالانىپ قالدى», دەيدى سلەسار تاتتىمبەت.
بەس جاسىنان باستاپ قوي كەزەكتە دومبىرا شەرتىپ جۇرگەن قارا دومالاق بالا ونەرىن وسىندا ءجۇرىپ شىنداپ قولعا الادى. «مەڭدى قىز» انىنە اۆتوپاركتەگى كولىك جوندەيتىن ارىپتەستەرىمەن بىرگە بەينەبايان ءتۇسىرىپ, كوپشىلىككە تانىمال بولىپ شىعا كەلدى.
«جۇمىس ۋاقىتىندا تەك جۇمىستى عانا ويلايمىن. كولىكتەردىڭ كىناراتسىز ءجۇرۋى – ءبىز ءۇشىن باستى مىندەت. سالاداعى بىلىكتىلىگىمدى جەتىلدىرىپ, مامان رەتىندە دامۋدى كوزدەيمىن. كولىك سالاسىندا قىزمەت ەتىپ جۇرگەن بارشا ارىپتەستەرىمدى كاسىبي مەرەكەمەن قۇتتىقتايمىن. يلەگەنىمىز ءبىر تەرىنىڭ پۇشپاعى, وتاندىق كولىك سالاسى قاناتىن كەڭگە جايا بەرسىن», دەيدى اقجارقىن ازامات.
قاراعاندى وبلىسى
