ءبىزدىڭ اۋىل بۇرىن «كارل ماركس اتىنداعى كەڭشار» دەپ اتالدى. كۇرىش تە ەگەتىن, مال دا باعاتىن. قابا ساقال كوسەم اتىن يەمدەنگەنمەن ناعىز قازاقى اۋىل بولدى. ادامى بەينەتكەش, جەرى قۇنارلى ولكە. كەيىننەن ساقالدى كوسەمنىڭ كۇنى تايدى دا, بەكارىستان بي اۋلى اتاندىق. تاۋەلسىزدىكتىڭ ارقاسى ەدى بۇنىڭ ءبارى.
بۇرىنعىنىڭ سۇيەگىنىڭ ءبارى اسىل. بۇگىنگىمەن سالىستىرساق سولاي. قازىرگىنىڭ ءبارى تاس ەمەندەي قاتتى. جۇرەگى جىلىمايدى. جانى اشىپ جۇرگەنى از. وسىلاي دا وسىلاي. ءيا, مۇنداي جورعا سوزبەن ءسىزدىڭ باسىڭىزدى اۋىرتىپ قايتەمىز, اڭگىمەنى باياندالىق.
كورول فەرماداعى ەڭ ءسۇتتى سيىر ەدى. سونىسىمەن عوي «كورول» اتانعانى. جەلىنى بۇلاق دەرسىڭ. مارجان اپا ساۋسا, ءتىپتى شەلەگى مەيمىلدەپ تولىپ كەلەدى. نەگە ەكەنى بەلگىسىز, مارجان اپا مەن كورول اراسىندا ءوزارا تۇسىنەتىندەي تىم جاقىندىق بار. اسا ىستىق. اپا قاسىنا بارا سالا ونى ەركەلەتەدى, ساۋىرىنان سيپايدى. اناۋ دا سوعان بەيىل. قۇلاعىن قاعىپ-قاعىپ, كوزى موليە موڭىرەيدى. ىقىلاسى بولەك ءبىر-بىرىنە. فەرماعا العاش كەلگەلى بۇل سيىر تەك مارجان اپانىڭ شەلەگىن لىق تولتىرۋشى ەدى.
مارجان اپانىڭ ەڭبەكقورلىعى تىم بولەك. اۋىلدىڭ ء«شايلا» دەگەن بولىمشەسىندەگى فەرمادا ساۋىنشى. وزاتتار قاتارىندا. سونىڭ ارقاسىندا شىعار, تالاي جينالىسقا دەلەگات اتانىپ, قۇرمەتكە يە بولعانى. انا جىلدارى قازاقستاننىڭ ءبىرىنشى باسشىسى د.قوناەۆتىڭ وزىمەن دە ديدارلاسقانى بار. ديمەكەڭ دە ەڭبەك ادامىن قالاي قادىرلەۋدى بىلەدى عوي.
سودان بەرى بىرنەشە جىل وتكەن. اۋىلعا كىرەبەرىس جەردىڭ وڭ قاپتالىن الا مالشىلار ءۇيى ءتۇستى. فەرما دا جاڭارتىلدى. ساۋىنشى مەن مالشى اعايىننىڭ ايى وڭىنان تۋعانى بار. تاۋارلى-ءسۇت فەرماسىن كىتابيا قۇرمانباەۆ باسقاراتىن. تاڭ ازانمەن مارجان اپا باستاعان قىز-كەلىنشەكتەر وسىندا اعىلادى. دامەگۇل, زينا, ۇلمان, زەينەپ, ۇلبيكە, جاقسىبيكە, قانزيرا, تالماگۇل, گۇلدەراي, رابيعا, ءالىپ, دامەگۇل, قانسۇلۋ سياقتى ساۋىنشىلاردىڭ شەلەكتەرى ەرتەمەن سالدىرلاي دىبىس شىعارادى. ساۋىنشىلاردان سوڭ سيىرشىلار ءمۇيىزدىنىڭ ءبارىن ورىسكە ايدايدى. داناعۇل, شاماران, ايجىگىت, ايدۋللا, قالماش, ورىنباسار, اقبەرگەن, بوكەنباي سىندى اعالار وسى جۇمىستىڭ باسى-قاسىندا.
وسىنداي قىم-قۋىت, تىنبايتىن, تولاسسىز شارۋا بارىسىندا ادام جانىن تىتىركەنتكەن جايت بولعان. ءيا, كەيىنگى جىلى كورول قارتايىپ ەدى. ءسۇتى دە قاشىڭقىراعان. بىراق ءالى دە شەلەكتى تولتىرۋعا قاۋقارى بار. مارجان اپا عانا ساۋسا سولاي.
ادەتتە قارتايعان سيىردىڭ كوبى ەتكە وتكىزىلەدى. ۇكىمەت تاپسىرماسى بۇل. سوعان سايكەس كورولدىڭ دە بۇل كەزدە كۇتىمى كۇشەيگەن. جەم-ءشوبى مەن سۋى ۇزبەي بەرىلىپ, قوڭى دا قالپىنا كەلە باستادى.
«مىنا «كورولدى» ەتكە وتكىزەتىن ۋاقىت بولدى. بايقاڭدار, مارجان اپا كورمەسىن. سويعىزباسى انىق ايتپەسە». زاۆفەرما كىتابيانىڭ شەشىمى بۇل. ءبارى ءۇنسىز كەلىسكەن. ولاي قىلماسقا امال جوق, مارجان مەن سيىر كورولدىڭ ءبىر-بىرىنە ىقىلاسىن مۇنداعىلار ابدەن بىلەتىن.
بالكىم ءتۇن, بالكىم ءتۇس, ونىسىن كىم بىلگەن, بىراق ءسۇتتى سيىر كورول سويىسقا جىعىلدى. ەكى-ءۇش جىگىت نۇسقاۋ بويىنشا ءبىر ساعات ىشىندە بۇتارلاپ ۇلگەرگەن. تۇزدالعان تەرىنى جايىپ تاستادى.
ەرتەڭىنە بولدى قىزىقتىڭ ءبارى. قىز-كەلىنشەكتەر كورولدىڭ ورنىندا جوعىن بايقاعان. مارجان اپا كورسە نە بولماق؟ ءبارى ىشتەي بىلسە دە, وزات ساۋىنشىعا ايتۋعا باتىلى بارمادى. بۇل كەزدە جاۋلىعى اعاراڭداپ مارجان اپا دا كورىنە بەرگەن.
ەندى قىزىق ەمەس, شىجىق باستالدى. سيىردىڭ ورنىندا جوعىن بايقاعان مارجان اپا سوستيىپ ءسال تۇرعان. ءوڭى قۇپ-قۋ. زاۆفەرما كىتابيانىڭ بەتىنە جالتاقتاپ قاراي بەرەدى.
– كورول قايدا؟
– سويىستىققا كەتتى. ەتكە وتكىزەتىنىمىزدى بىلەسىز.
– قۇدوي-وۋ! قولىنداعى شەلەك داڭعىرلاي جەرگە ءتۇسىپ, اۋدەم جەردە اۋناپ جاتتى.
تالاي جىل ساۋعان ءسۇتتى سيىرىنا ادامشا باۋىر باسقان مارجان اپا داۋىس سالا جىلادى. «اقۇدايىم-اۋ, اق كورولىم-اۋ, كەتكەنىڭ بە شىنىمەن...» كادىمگى جوقتاۋدىڭ ماقامىنا سالىپ سىڭسيدى مارجان اپا. قاسىنداعى قىز-كەلىنشەكتەر ءۇنسىز ەگىلەدى. مال جايىن ۇعىپ وسكەن اۋىل ازاماتتارى بۇل كورىنىسكە شىداماي تەرىس اينالىپ تا جاتتى...
ەڭبەگىمەن ەلەنگەن مارجانداي انامىز ءوز كاسىبىنە وسىلاي شىن بەرىلگەن دەسەدى. سونىڭ وتەۋىندەي بولىپ ءبىزدىڭ ەلدە مارجان ىزماعانبەتوۆا اتىندا كوشە دە بار.
