فوتو: primeminister.kz
كونفەرەنتسيانىڭ العاشقى كۇنىندەگى نەگىزگى وقيعا – «جاساندى ينتەللەكت: قازاقستان قاۋىپسىزدىكتىڭ جاڭا مودەلىن قالىپتاستىرۋدا» اتتى ستراتەگيالىق پلەنارلىق سەسسيا بولدى. وندا ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆ ەلىمىزدەگى ەڭبەكتى قورعاۋ جۇيەسىن تسيفرلاندىرۋدىڭ قازىرگى جاعدايى مەن دامۋ باعىتتارىن تانىستىردى. باعدارلاماعا جالپى 11 تاقىرىپتىق سەسسيا جانە بيزنەس-ويىندار ەنگىزىلگەن.
ءىس-شارانى ەڭبەك جانە حالىقتى الەۋمەتتىك قورعاۋ مينيسترلىگى, توتەنشە جاعدايلار مينيسترلىگى, ەڭبەكتى قورعاۋ جونىندەگى رەسپۋبليكالىق عىلىمي-زەرتتەۋ ينستيتۋتى جانە «ITECA» كومپانياسى ۇيىمداستىرعان.
كونفەرەنتسياعا مەملەكەتتىك ورگاندار مەن حالىقارالىق ۇيىمداردىڭ وكىلدەرى, سالالىق قاۋىمداستىق جەتەكشىلەرى مەن ساراپشىلار قاتىسىپ وتىر. ولاردىڭ قاتارىندا حەۇ, ددۇ ماماندارى, سونداي-اق ءوندىرىس پەن عىلىم سالاسىنىڭ وكىلدەرى بار.
ستراتەگيالىق سەسسيادا ساراپشىلار وندىرىستەگى قاۋىپسىزدىكتى ارتتىرۋدا جاساندى ينتەللەكتتىڭ شەشۋشى رولىنە توقتالدى. اسىرەسە تاۋەكەلدەردى ەرتە انىقتاۋ, وندىرىستىك جاراقاتتانۋدى ازايتۋ جانە پرەديكتيۆتى اناليتيكانى قولدانۋ ماسەلەلەرى كەڭىنەن قارالدى. سونىمەن بىرگە تاۋ-كەن جانە ونەركاسىپ سالالارىندا جي الگوريتمدەرىن ەنگىزۋ تاجىريبەسى ۇسىنىلدى.
سوڭعى بەس جىلداعى وڭ وزگەرىس: ەلىمىزدە وندىرىستىك جاراقاتتانۋ دەڭگەيى 8,3%-عا ازايدى
ەربول تۇياقباەۆ ءوز سوزىندە بيىل ەلىمىزدە تسيفرلاندىرۋ جانە جاساندى ينتەللەكت جىلى جاريالانعانىن اتاپ ءوتىپ, بۇل ەڭبەك قاۋىپسىزدىگى سالاسىنا جاڭا سەرپىن بەرەتىنىن ايتتى.
«جاھاندىق سىن-قاتەرلەر جاعدايىندا تسيفرلىق ترانسفورماتسيا قاۋىپسىز ءارى لايىقتى ەڭبەككە كەڭ مۇمكىندىك اشادى», دەدى ءبىرىنشى ۆيتسە-مينيستر.
ونىڭ ايتۋىنشا, سوڭعى جىلدارى وندىرىستىك جاراقاتتانۋ تومەندەۋ ءۇردىسىن كورسەتكەنىمەن, ءار وقيعانىڭ ارتىندا ادام تاعدىرى تۇرعاندىقتان, الدىن الۋ شارالارىن كۇشەيتۋ قاجەت. قازاقستان حالىقارالىق ەڭبەك ۇيىمىنىڭ 26 كونۆەنتسياسىن راتيفيكاتسيالاپ, ەڭبەك قۇقىقتارىن قورعاۋ باعىتىندا بىرقاتار رەفورمانى جۇزەگە اسىردى.
ۆيتسە-مينيستر الەۋمەتتىك-ەڭبەك سالاسىن تسيفرلاندىرۋعا ەرەكشە توقتالدى. قازىر ەلىمىزدە كاسىپورىنداردىڭ تسيفرلىق كارتاسى مەن ەڭبەك تاۋەكەلدەرىنىڭ كارتاسى جۇمىس ىستەيدى. الداعى ۋاقىتتا جۇمىس ورتاسىن ناقتى ۋاقىت رەجيمىندە باقىلايتىن بىرىڭعاي احۋالدىق ورتالىق ىسكە قوسىلادى.
«ەڭبەكتى قورعاۋدى تسيفرلاندىرۋ – ستراتەگيالىق باعىت. باستى ماقسات – ءاربىر ازامات ءۇشىن قاۋىپسىز ءارى لايىقتى ەڭبەك جاعدايىن قامتاماسىز ەتۋ», دەدى ەربول تۇياقباەۆ.
KIOSH 2026 باعدارلاماسى 29 ساۋىردە ونەركاسىپتىك قاۋىپسىزدىك ماسەلەلەرىمەن جالعاسادى. وندا تاۋەكەلدەردى پرواكتيۆتى باسقارۋ, تسيفرلىق قۇرالداردى ەنگىزۋ جانە وندىرىستەگى ءىرى وقيعالاردىڭ الدىن الۋ تەتىكتەرى تالقىلانادى. سونىمەن قاتار پراكتيكالىق ترەنينگتەر مەن Safety Games فورماتىنداعى ينتەراكتيۆتى جاتتىعۋلار وتەدى.
بيىلعى كورمەگە 9 ەلدەن 87 كومپانيا قاتىسىپ وتىر. ولاردىڭ ىشىندە 53 شەتەلدىك جانە 34 وتاندىق كاسىپورىن بار. كورمەگە العاش رەت قاتىسىپ وتىرعان 18 كومپانيانىڭ بولۋى ەڭبەك قاۋىپسىزدىگى سالاسىنداعى حالىقارالىق قىزىعۋشىلىقتىڭ ارتىپ كەلە جاتقانىن كورسەتەدى.
