كاسىپورىن 2009 جىلى قۇرىلعان. نارىقتا 15 جىل بويى ءساتتى جۇمىس ىستەپ كەلە جاتىر. تەمىردى, قاجەت ماتەريالدى الپاۋىت «قارمەت» كومپانياسىنان الادى. ال قاڭىلتىردى «مەتاللسبىتتان», جول بەلگىسىنىڭ بەتىنە جارىق شاعىلىستىراتىن تاسپانى گەرمانيادان جەتكى-
زەدى.
– «ورنەك نس» وندىرىستىك كومپانياسى تەك ءونىم شىعارىپ قانا قويمايدى, سونىمەن قاتار ونى ورناتىپ بەرۋ قىزمەتىن دە ۇسىنادى. وبلىس اۋماعىنان سىرتقا شىعامىز دەدىك قوي. ەڭ ۇزاق ىستەگەن تاپسىرىسىمىز قورداي اۋدانى مەن تۇركىستان وبلىسىندا بولدى. ولاردىڭ تاپسىرىس بەرگەن جول بەلگىلەرى كوپ ەدى. سولاردى جەتكىزىپ, ورناتۋ بويىنشا كومەك كورسەتتىك, – دەيدى كاسىپورىننىڭ باس مامانى جانسايا بەكەنقىزى.
كومپانيا جول بويىنداعى بەلگىلەردەن بولەك, وزەن, كول جاعالاۋىنداعى ەسكەرتۋ تاقتالارىن, تەمىرجولداعى بەلگىلەردى دە شىعارادى. ماسەلەن, «قازاقمىس» كومپانياسى قاۋىپسىزدىك ەرەجەلەرى جازىلعان بىرنەشە تاقتاعا تاپسىرىس بەرگەن.
ءوندىرىس ورنىنىڭ باسەكەلەستەرى نارىقتا جوققا ءتان. بولعان كۇننىڭ وزىندە دە كاسىپورىننىڭ ساپالى قىزمەتى كوپ تۇتىنۋشىنىڭ كوڭىلىن باۋراپ وتىر. تاپسىرىستى دەر ۋاقىتىندا ورىندايتىنى, ساپالى ءارى ءتوزىمدى مەتالداردى پايدالاناتىنى وسىعان سەبەپ.
كاسىپورىن جول جوندەيتىن كورەي فيرماسىمەن, بالقاش-قاراعاندى تاسجولىنداعى مەردىگەرلەر – قىتايلىق «CITIC Construction Co., LTD» ۇيىمىمەن, تۇرىكتەردىڭ «SINE MIDAS STROY» مەكەمەسىمەن تىعىز بايلانىس ورناتقان.
– وسى كاسىپورىن اشىلعالى, ياعني 2009 جىلدان باستاپ وسىندا تەمىر كەسۋشى بولىپ ەڭبەك ەتىپ كەلەمىن. تەمىر كەسەتىن, باسقا دا قاجەتتى ستانوكتاردى الىپ كەلۋگە دە اتسالىستىم. گەلياتينامەن تەمىر شابامىز, ال مىنا قۇرىلعىمەن دوڭگەلەك بەلگىلەردى ازىرلەيمىز. جۇمىسقا قاجەتتى ستانوكتىڭ ءبارى بار. تاپسىرىس كوپ تۇسسە كۇنىنە ەكى ءجۇز بەلگىگە دەيىن دايىندايمىز, – دەيدى كاسىپورىننىڭ ەڭبەككەرى سىرىم يباديلدين.
ستانوكتىڭ ءتىلىن ابدەن مەڭگەرىپ العان سىرىم ۇجىمىنا سىيلى. بىلگەنىن جاستارمەن بولىسەدى, تەمىرمەن جۇمىس ىستەۋدىڭ قىر-سىرىن ۇيرەتەدى. ماسەلەن, باقتيار سۇلتانبەكوۆ ول كىسىنى ۇستازى سانايدى.
– ءوندىرىس سالاسىنداعى ەڭبەككە دە ۇستاز كەرەك. سىرىم اعامىزدى ناعىز ۇستاز دەر ەدىك. بۇل كىسى مۇنداعى ستانوكتاردى سوناۋ 2009 جىلدارى چەليابىدەن اكەلىپ, ورناتىپ, ىسكە قوستى. بۇگىندە بىلگەنىن, تۇيگەنىن بىزگە ۇيرەتەدى. قازىر مەن دە ءبىرشاما توسەلىپ الدىم. كومپانيادا ءارى دانەكەرلەۋشىمىن, – دەيدى باقتيار.
كاسىپورىننىڭ ونىمىنە تاپسىرىس كوپ. ونىڭ ۇستىنە قازىر قالادا جول جوندەۋ جۇمىستارى قارقىندى ءجۇرىپ جاتىر. سوعان بايلانىستى قىزمەتكەرلەردىڭ دە ءبىر ۋاق تىنىستاپ وتىرۋىنا دا ۋاقىت تاپشى.
قاراعاندى وبلىسى
