بۇل اۋلەتتىڭ ءومىر ورنەگى تەمىرجول سالاسىمەن استاسىپ جاتىر. ءۇش ۇرپاقتان 26 ادام قيىن دا كۇردەلى تەمىرجولشى ماماندىعىن تاڭداعان. ولاردىڭ بارلىعىنىڭ تەمىرجولداعى جالپى ەڭبەك ءوتىلى 826 جىلدى قۇرايدى. تامىرىن تەرەڭگە جايعان ونەگەلى اۋلەتتىڭ وكىلدەرى ونەردەن دە قۇر الاقان ەمەس. سايىسقا قاتىسۋعا ءوتىنىم بىلدىرگەن 235 وتباسىنىڭ ىشىنەن وق بويى وزىپ شىققان قاپىشەۆتار ەندى قىركۇيەك ايىندا استانادا وتەتىن رەسپۋبليكالىق كەزەڭدە باق سىنايدى.
«توككەن تەر, ەتكەن ەڭبەك جەمىس بەرەتىنىنە كوزىمىز جەتتى. ءبىزدىڭ اۋلەتتىڭ تاريحى شويىنجول بويىنداعى قيىن دا قىزىق سالانىڭ تاريحىمەن قاتار ورىلەدى. وسى ءبىر شاراپاتى مول ماماندىق بىزگە اكەلەرىمىزدەن ميراس بولدى, ءبىزدىڭ ۇرپاعىمىز دا ۇرپاقتار ساباقتاستىعىن جالعاپ, ەل ءۇشىن ەڭبەك ەتىپ ءجۇر. باسەكەلەستىك ۇلكەن بولدى. ەندى استانادا ءوز قالامىزدىڭ جانە تەمىرجولشىلار اۋلەتىنىڭ نامىسىن قورعاۋ ءۇشىن مۇقيات دايىندالامىز. تەمىرجولعا دەگەن سۇيىسپەنشىلىك – ءبىزدىڭ قانىمىزدا. وسىنىڭ ناتيجەسىندە ءبىز جەڭىسكە جەتتىك. ءبىز ءوز ماماندىعىمىزدى شىن جۇرەكتەن جاقسى كورەمىز», دەيدى مۇرات قاپىشەۆ.
مۇراتتىڭ اكەسى تەمىرجولشى بولعان, ول 1932 جىلى وسى سالاعا كەلىپ, 1968 جىلى زەينەتكە شىققان. جۇبايىمەن بىرگە ولار سەگىز بالا تاربيەلەپ ءوسىردى. ولاردىڭ بارلىعى اكەسىنىڭ جولىن قۋىپ, تەمىرجول سالاسىندا جۇمىس ىستەدى. مۇرات قاپىشەۆتىڭ كىندىگىنەن تاراعان ءۇش بالاسى دا تەمىرجولدا جۇمىس ىستەيدى.
«مەرەيلى وتباسى» بايقاۋىنىڭ باستى ماقساتى – ادامگەرشىلىك مۇراتتارىن جاڭعىرتۋ, وتباسى مەن نەكەنى قۇرمەتتەۋگە تاربيەلەۋ, سونداي-اق وتباسىلىق قۇندىلىقتار مەن قازاقستاندىق وتباسىنىڭ وڭ ءيميدجىن كورسەتۋ جانە كەڭىنەن ناسيحاتتاۋ.
الماتى
