بىلتىر ءۇشىنشى مەگاپوليستە 12 «جايلى مەكتەپتىڭ» قۇرىلىسى باستالدى. قازىر اتالعان ءبىلىم ۇيىمدارىنىڭ ءىشى ارلەنىپ, ينجەنەرلىك جەلىلەرى تارتىلىپ, اۋلالارى اباتتاندىرىلۋ ۇستىندە. بۇل مەكتەپتەردىڭ بارلىعى دا بيىل قولدانىسقا بەرىلەدى. ۇلتتىق جوبانىڭ ورىندالۋىن, ياعني قۇرىلىستاردىڭ ساپاسىن, دەر كەزىندە پايدالانۋعا بەرىلۋىن «Samruk-Kazyna Construction» اق قاداعالايدى.
«بيىل «جايلى مەكتەپ» جوباسى اياسىندا شىمكەنتتە تاعى 6 مەكتەپتىڭ قۇرىلىسى باستالادى. بۇل ءبىلىم بەرۋ ۇيىمدارى كەلەسى جىلدىڭ سوڭىنا قاراي تاپسىرىلادى. جالپى, ەلىمىز بويىنشا ۇلتتىق جوبا شەڭبەرىندە 2025 جىل اياقتالعانشا 369 زاماناۋي مەكتەپ سالىنادى. وسىنداي «جايلى مەكتەپكە» 740 مىڭ وقۋشى سيادى. وسى تۇستا قۇرىلىسشى كومپانيالار مەن باسقا دا تاۋار وندىرۋشىلەر اراسىندا بايلانىس ورناتىپ, «التىن كوپىر» بولىپ وتىرعان «اتامەكەن» ۇلتتىق كاسىپكەرلەر پالاتاسىنىڭ باسشىلىعىنا العىسىمدى ايتامىن. نەگىزىندە «سامۇرىق-قازىنا» ۇلتتىق ءال-اۋقات قورى» اق-نىڭ كوزدەگەن ماقساتى – جەرگىلىكتى تاۋار وندىرۋشىلەردى قولداۋ. الدا تۇرعان ەڭ ماڭىزدى مىندەتتىڭ ءبىرى ول – «جايلى مەكتەپ» جوباسى اياسىندا سالىنىپ جاتقان بارلىق مەكتەپ جاڭا وقۋ جىلى قارساڭىندا ەل يگىلىگىنە تاپسىرىلۋعا ءتيىس», دەيدى «Samruk-Kazyna Construction» اق شىمكەنت قالاسى بويىنشا وڭىرلىك باسشىسى مارات قۋانىشباەۆ.
«Samruk-Kazyna Construction» اق وكىلىنىڭ ايتۋىنشا, جايلى مەكتەپتەر قانداي دا ءبىر شەتەلدىك ستاندارتقا سۇيەنىپ سالىنىپ جاتقان جوق. دەگەنمەن مەكتەپتەردى جوبالاۋ بارىسىندا شەتەلدىك جانە وتاندىق وزىق ءبىلىم وشاقتارىنىڭ تاجىريبەسى نەگىزگە الىنعان.
مۇنداي ءبىلىم وشاقتارىنىڭ اۋدانى كادىمگى جالپى ورتا مەكتەپتەرگە قاراعاندا 15-20 پايىزعا ۇلكەن بولادى. سونداي-اق تەحنيكالىق جاراقتاندىرۋى دا 4 ەسەگە كۇشتى. سوندىقتان «جايلى مەكتەپكە» كومپيۋتەر, ينتەراكتيۆتى تاقتالار سەكىلدى زاماناۋي قۇرىلعىلار كوبىرەك پايدالانىلادى. ال قۇرىلىسقا بارىنشا وتاندىق قۇرىلىس ماتەريالدارى قولدانىلادى. وتاندىق قۇرىلىس ماتەريالدارىنىڭ ورتاشا ۇلەسى شامامەن 70 پايىزدى قۇرايدى. ماسەلەن, مەكتەپ قۇرىلىسىنا پايدالانىلاتىن تسەمەنت, قيىرشىق تاس, ودان بولەك قاسبەتىن ارلەيتىن ماتەريالدار مەن شاتىر جابىندىسىنا دەيىن وتاندىق ءونىم پايدالانىلادى. م.قۋانىشباەۆتىڭ ايتۋىنا قاراعاندا, «جايلى مەكتەپتەرگە» ارنالعان جيھاز دا تەك قازاقستاندىق تاۋار وندىرۋشىلەردەن ساتىپ الىنادى. بۇل رەتتە باسىمدىق جەرگىلىكتى كومپانيالارعا بەرىلىپ وتىر.
وسىلايشا, جاڭا تيپتەگى مەكتەپتەردى جابدىقتاۋعا شىمكەنتتىك تاۋار وندىرۋشىلەر, ونىڭ ىشىندە جيھاز كومپانيالارى جۇمىلدىرىلعان. ولار مەردىگەرلەرمەن كەلىسىمشارتقا وتىرىپ, وقۋ قۇرالدارىمەن قامتاماسىز ەتىپ جاتىر.
سالا ماماندارى مەن ساراپشىلار بايانداعانداي, ەلىمىزدە العاش رەت جۇزەگە اسىپ جاتقان قاناتقاقتى جوبا قازاقستاندىق كومپانيالاردى, جەرگىلىكتى تاۋار وندىرۋشىلەردى قولداۋدىڭ ۇلكەن تەتىگىنە اينالدى. ۇلتتىق جوبانى ناعىز ستراتەگيالىق باستاما دەۋگە بولادى. سەبەبى ول كاسىپكەرلەرگە مەملەكەتتىڭ قولۇشىن بەرۋگە, ۇلتتىق جوباعا بولىنگەن قارجىنىڭ ەل ەكونوميكاسىنا جۇمىس ىستەۋىنە ۇلكەن كومەگىن تيگىزىپ وتىر.
دەگەنمەن جوبا اياسىندا تاپسىرىس الىپ, ونى ورىنداۋدىڭ دا وزىندىك تالابى بار. ماسەلەن, «جايلى مەكتەپ» ۇلتتىق جوباسىنا قاتىسۋ ءۇشىن تاۋار وندىرۋشىلەردىڭ ست-KZ نەمەسە يندۋستريالدى سەرتيفيكاتى بولۋعا ءتيىس. سەبەبى ءبىلىم بەرۋ سالاسىنداعى وسى ۇلتتىق جوباعا سايكەس مەكتەپتەردىڭ بارلىق عيماراتى مەن جيھازى وقۋشىلار مەن ۇستازدار ءۇشىن ىڭعايلى, قاۋىپسىز بولۋى كەرەك. سونىمەن قاتار ەلىمىزدىڭ زاڭدارى بويىنشا ءتيىمدى وقىتۋ ۇدەرىسىن ۇيىمداستىرۋ ءۇشىن ءبىلىم الۋشىلار مەن پەداگوگتەردىڭ وقۋ-تاربيە قاجەتتىلىكتەرىنە سايكەس كەلۋى قاجەت. شىمكەنت قالالىق كاسىپكەرلەر پالاتاسىنىڭ ديرەكتورى سابيرا ادامبەكوۆانىڭ مالىمدەۋىنشە, ەلىمىزدەگى بارلىق مەكتەپ باسكەگە قابىلەتتى ناعىز ساپالى تاۋار شىعاراتىن وتاندىق وندىرۋشىلەردىڭ قۇرال-جابدىقتارىمەن جاراقتاندىرىلعانى ابزال. بۇل ەكسپورتقا باعدارلانعان ءوندىرىستى قولداۋدىڭ ءتيىمدى ءتاسىلى عانا بولىپ قويمايدى, سونىمەن بىرگە قازاقستاننىڭ تاۋارىنا دەگەن سەنىمدىلىكتى كۇشەيتىپ, ناعىز ءپاتريوتيزمنىڭ كورىنىسىن ايعاقتاي تۇسەدى.
وسى تۇستا جاۋاپتى سالا وكىلدەرىنىڭ قۇرىلىس كومپانيالارى مەن جيھاز وندىرۋشىلەرگە قويىپ وتىرعان باستى تالابى – ول جوعارىدا ايتىپ وتكەنىمىزدەي, قۇرىلىس پەن وقۋ كابينەتى جابدىقتارىنىڭ ساپالى بولۋى. بۇل قاعيدانى «جايلى مەكتەپ» قۇرىلىسىنا قاتىسۋشى كاسىپكەرلەرگە جاۋاپتى سالا وكىلدەرى الدەقاشان جەتكىزگەن. سوندىقتان بۇگىندە ساپا ماسەلەسىن قالالىق اكىمدىك تە, ءبىلىم باسقارماسىنىڭ ماماندارى دا ءبىرىنشى كەزەككە قويىپ, ءجىتى قاداعالايدى. جىل باسىندا شىمكەنت قالاسىنىڭ اكىمى عابيت سىزدىقبەكوۆ جيھاز جاساۋشىلارمەن, «جايلى مەكتەپ» جوباسىن ىسكە اسىرۋشىلارمەن ارنايى كەزدەسىپ, ساپا ماسەلەسىندە شيكىلىك شىقپاۋ كەرەكتىگى جونىندە قاداپ ايتقان ەدى.
وسى ورايدا شىمكەنت قالاسى اكىمدىگى اپپاراتىنىڭ باسشىسى ەرجان سەيتەنوۆتىڭ قاتىسۋىمەن بىرنەشە جيىن ءوتىپ, «جايلى مەكتەپ» جوباسىنىڭ مەردىگەر كومپانيالارى مەن جيھاز وندىرۋشىلەرى وندا باس قوسىپ, تۇيتكىلدى ماسەلەلەردى تالقىلادى. ءوز كەزەگىندە شىمكەنت قالالىق ءبىلىم باسقارماسىنىڭ وكىلدەرى مەكتەپ جيھازدارىنا قويىلاتىن تالاپتاردى, ولاردىڭ ستاندارتتان اۋىتقىماۋى تۋرالى جيھاز وندىرۋشىلەرگە الدىن الا حاباردار ەتكەن.
«شىمكەنت قالاسىنىڭ اكىمى ۇلتتىق جوبانى جۇزەگە اسىرۋعا قاتىستى ءتيىستى تاپسىرما بەردى. مەكتەپ سالۋشى مەردىگەر كومپانيالار مەن جيھاز تسەحتارى اراسىندا كەلىسىمشارت جاسالدى. جالپى, «جايلى مەكتەپ» جوباسى اياسىندا سالىناتىن مەكتەپتەردى جابدىقتاۋدا قويىلاتىن تالاپ – ءبىلىم وشاقتارىن جاڭا وقۋ جىلىنا دەيىن قاجەتتى وقۋ جيھاز-جابدىقتارمەن دەر كەزىندە قاتاماسىز ەتۋ. مەكتەپ كابينەتىن ءتيىستى ستاندارت پەن نورماعا ساي جيھازدارمەن قامتاماسىز ەتۋ بويىنشا ءبىلىم باسقارماسى سول كەزدەگى ءبىلىم جانە عىلىم ءمينيسترىنىڭ 2016 جىلعى 22 قاڭتارداعى «مەكتەپكە دەيىنگى, ورتا ءبىلىم بەرۋ ۇيىمدارىن, سونداي-اق ارنايى ءبىلىم بەرۋ ۇيىمدارىن جابدىقتارمەن جانە جيھازبەن جاراقتاندىرۋ نورمالارىن بەكىتۋ تۋرالى» №70 بۇيرىعىنا سۇيەنىپ, وسى ەرەجەنى نەگىزگە الادى. ماسەلەن, وسى بۇيرىقتاعى تالاپتىڭ ءبىر پۋنكتىن الساق, وقۋ جيھازدارى نەگىزىنەن اشىق ءتۇستى بولۋى كەرەك. سوندىقتان باسقارما مينيسترلىكتىڭ جيھازعا قاتىستى قاعيدا-ەرەجەلەرىن «سامۇرىق-قازىنا» اق-عا, قۇرىلىس كومپانيالارىنا ارنايى حاتپەن جولداعان», دەدى قالالىق ءبىلىم باسقارماسى ءبولىمىنىڭ باسشىسى تۇرار ساۋتوۆ.
وسىلايشا, ۇلتتىق جوبا وتاندىق كاسىپكەرلەر ءۇشىن, ونىڭ ىشىندە تاۋار وندىرۋشىلەرگە جاقسى مۇمكىندىك تۋدىرىپ وتىر. قولدا بار سوڭعى مالىمەتكە سۇيەنسەك, «جايلى مەكتەپ» ۇلتتىق جوباسى اياسىندا شىمكەنتتە سالىنىپ جاتقان 12 مەكتەپ قۇرىلىسىنىڭ باس مەردىگەرلەرى جەرگىلىكتى 5 جيھاز كومپانياسىمەن كەلىسىمشارتقا وتىرعان. ءوز كەزەگىندە جيھاز وندىرۋشىلەر العان بۇل تاپسىرىستىڭ ءبىرازىن تاعى دا جەرگىلىكتى 4 جيھاز وندىرۋشىگە ءبولىپ بەرگەن.
شىمكەنت
