ءبىراز بوكسشىنىڭ باعى جانبادى
الدىمەن بوكسشىلارىمىزدىڭ باسەكەسى جونىندە. مىرزاعالي ايتجانوۆ بوكستان ۇلتتىق قۇرامانىڭ باس باپكەرى لاۋازىمىن ارقالاپ, وسىمەن ءۇشىنشى مارتە جازعى وليمپيا ويىندارىنا قاتىسىپ وتىر. بىلىكتى ماماننىڭ 2012 جىلعى لوندون, 2016 جىلعى ريو وليمپيا ويىندارىندا بوكسشىلاردى زاۋ بيىككە شىعارعانىن ماقتان تۇتامىز. 2009-2018 جىلدار ارالىعىندا ەكى وليمپيادالىق تسيكلدا باس باپكەرلىك قىزمەتتىڭ جاۋاپكەرشىلىگىن ارقالاعان مامان 2023 جىلدىڭ قاڭتارىندا وسى قىزمەتكە قايتا تاعايىندالدى. بىراق باس باپكەردىڭ ءۇمىت ارتقان 7 بوكسشىنىڭ ۇشەۋى الاماننىڭ العاشقى اينالىمىندا-اق ءسۇرىنىپ, وليمپيا ويىندارىن اياقتادى. ۇلتتىق قۇرامانىڭ كاپيتانى, پاريج جازعى وليمپياداسىنىڭ سالتاناتتى اشىلۋ راسىمىندە سەنا وزەنىنىڭ ۇستىندە تۋىمىزدى الىپ شىققان اسلانبەك شىمبەرگەنوۆ (71 كگ), اسا اۋىر سالماقتا (+91 كگ) توكيو جازعى وليمپيا ويىندارىنىڭ قولا جۇلدەگەرى قامشىبەك قوڭقاباەۆتىڭ جەڭىلىسى جونىندە جازىلدى.
كەشە پاريج رينگىنە الەم چەمپيونى, الەم بىرىنشىلىگىنىڭ كۇمىس جۇلدەگەرى ماحمۇد سابىرحان (57 كگ) شىقتى. قارسىلاسى – ەۋروپا چەمپيونى يسپانيالىق بوكسشى حوسە بروتونس كۆيلەس. ءۇش راۋندتىڭ ناتيجەسىن تۇزگەن تورەشىلەر جەڭىستى يسپانيالىق بوكسشىعا بەردى. ماحمۇد جازعى وليمپيا ويىندارىنا تۇڭعىش رەت قاتىسىپ وتىر. بۇعان دەيىن ول 54 كگ سالماق دارەجەسىندە الەم چەمپيونى اتاندى. بۇل سالماق وليمپيادالىق ويىندارعا ەنبەگەندىكتەن دە 57 كگ سالماققا بىلتىر اۋىستى. ءبىر جىلدىڭ بەدەرىندە جاڭا سالماققا تۇبەگەيلى بەيىمدەلىپ, اۋراسىن تولىق باعامداي الماعانى انىق بايقالدى. ال قارسىلاسىنىڭ بويى دا بيىك, قولى دا ۇزىن, جەرلەسىمىزدىڭ جاقىننان وراي سوققان سوققىلارىن وزىنە مەيلىنشە دارىتپادى. رينگتەن ۇزاعان سوڭ ماحمۇد جەڭىلىسى تۋرالى پىكىرىن ايتتى.
«1-راۋندتا ءسوزسىز بارىمدى سالدىم, ءتىپتى جەڭىس ماعان بەرىلەتىنىنە سەنىمدى بولدىم. بىراق بەس تورەشىنىڭ تورتەۋى قارسىلاسىمنىڭ ۇپايىن مولايتتى. سول ءبارىن تاس-تالقان ەتتى, پسيحولوگيالىق تۇرعىدا سىندىرىپ جىبەرگەندەي بولدى. تورەشىلەردىڭ قىساستىق جاساعانىن العاشقى راۋندتا-اق ءبىلدىم. 2-راۋند تا سولاي بولدى. ءۇشىنشى راۋندتىڭ ناتيجەسى ەشتەڭەگە اسەر ەتپەيتىنى بەلگىلى ەدى. دەسە دە جەڭىلگەندى دە مويىنداۋ كەرەك, قارسىلاسىم وڭايدان ەمەس, فيزيكالىق قۋاتى دا مىعىم ەكەن, بويشاڭدىعى, قولىنىڭ ۇزىندىعى دا ايتارلىقتاي كەدەرگىسىن كەلتىردى», دەدى م.سابىرحان.
ەلدوس سايدالين باپتايتىن ايەلدەر قۇراماسىنىڭ مۇشەسى ۆالەنتينا حالزوۆا 75 كگ سالماق دارەجەسىندە وليمپيا ويىندارىنا العاش رەت قوسىلىپ, ءبىرىنشى جەكپە-جەگىندە ەسە جىبەردى. پانامالىق اتەيلا بايلونعا قارسى ايقاستىڭ 1-راۋندىندا تورەشىلەر ۆالەنتينانىڭ سوققىسى كوبىرەك دارىعانىن باعامداعانىمەن, قالعان ەكى راۋندتا جەڭىستى قارسىلاسىنا بۇردى. ۆالەنتينا ەكىنشى راۋند باستالعاندا قارسىلاسى باسىمەن سوعىپ, مۇرنىنا زاقىم كەلگەنىن ايتتى. ءتىپتى ەكى راۋند بويى تىنىسى تارىلىپ, وكپەسى قىسقانىن جەتكىزدى.
«قارسىلاسىم – 35 جاسقا تولعان وتە تاجىريبەلى بوكسشى. ءبىرىنشى راۋندتا باسىم تۇسكەن سوڭ, 2, 3-راۋندتا بارىمدى سالدىم. تورەشىلەردىڭ شەشىمى سولاي بولسا, نە شارا؟ باپكەردىڭ ايتقان تاكتيكالىق جوسپارىن تولىققاندى ورىندادىم. مەن ءۇشىن العاشقى وليمپيا ويىندارىنىڭ وسىلاي اياقتالعانى وكىنىشتى. كوك تۋىمىزدى جەلبىرەتكىم كەلىپ ەدى», دەدى ۆالەنتينا.
2016 جىلى ريو جازعى وليمپياداسىندا 9-ورىنعا تۇراقتاپ, 2021 جىلى توكيو دوداسىندا شيرەك فينالدا ءسۇرىنىپ, 5-ساتىنى مىسە تۇتقان پانامالىق اتەيلا بايلون تىسقاققان بوكسشى ەكەنىن كورسەتتى.
الەم چەمپيوناتىنىڭ ەكى دۇركىن جەڭىمپازى نازىم قىزايباي (50 كگ)
العاشقى اينالىمدا يتاليالىق دجورداننا سوررەنتينودان باسىم ءتۇستى. 31 جاسىندا جازعى وليمپياعا تۇڭعىش رەت ات بايلاعان جەرلەسىمىز كەشە 1/8 اينالىمدا برازيليالىق كارولين دە المەيدامەن ايقاستى. كەزدەسۋدىڭ العاشقى راۋندىندا نازىم قارسىلاسىنان 5:0 العا شىعىپ, كەيىنگى راۋندتاردا وسى قارقىنىنان قايتپادى. ەكىنشى جانە ءۇشىنشى راۋندتا بىردەي 4:1 ەسەبىمەن ۇتتى. وسىلايشا سەنىمدى جەڭىسكە جەتكەن بوكسشىمىز ەندى شيرەك فينالدا كۇش سىنايدى. قارسىلاسى – كولۋمبيالىق ۆالەنسيا ۆيكتوريا ينگريت لورەنا.
ورتا جولدان قايتتى
ۇستەل تەننيسىنەن ۇلتتىق قۇرامانىڭ مۇشەسى كيريلل گەراسيمەنكو پاريج جازعى وليمپياداسىنىڭ 1/8 فينالدىق سىنىندا ءسۇرىندى. مىسىر سپورتشىسى ومار مۇحاممادي-اسساردان اسا المادى. ءبىرىنشى, ەكىنشى سەتتە 11:8, 11:6 ەسەبىمەن ايقىن ۇتقان جەرلەسىمىز ءۇشىنشى, ءتورتىنشى سەتتە قارسىلاسىنىڭ شابۋىلىنا قاۋقار تانىتا المادى. شەشۋشى بەسىنشى سەتتە دە مىسىرلىق وماردىڭ مەرەيى ۇستەم ءتۇسىپ, جەرلەسىمىز جارىس جولىنان شىعىپ قالدى. كيريلل ءبىرىنشى اينالىمدا چيليلىك نيكولاس ۆارگاستى ايقىن ۇتقان. ەكىنشى كەزەڭدە گەرمانيالىق دان تسيۋدان باسىم تۇسكەن ەدى. افريكا قۇرلىعىنىڭ چەمپيونى ومار كيريلل ءۇشىن سىرالعى قارسىلاس, ەكەۋى بۇعان دەيىن دە بىرنەشە مارتە تارتىسقا ءتۇسىپ, جەڭىستى الما-كەزەك يەلەنىپ ءجۇردى.
ستەند اتۋدان تراپ باعدارلاماسىندا سىنعا تۇسكەن ماريا دميتريەنكو 120 ۇپاي ەنشىلەگەنىمەن, جالپى ەسەپتە 10-ساتىعا تۇراقتاپ, فينالدىق دوداعا وتە المادى.
نىسانا كوزدەۋ تارتىسىندا ۆينتوۆكامەن 50 مەتردەن ءۇش پوزيتسيادا نىسانا كوزدەۋدەن جەكەلەي سايىسقا قاتىسقان يسلام ساتباەۆ 588 ۇپايمەن 18-ورىندى مىسە تۇتتى. تاعى ءبىر سپورتشىمىز كونستانتين مالينوۆسكي 586 ۇپايعا يەلىك ەتىپ, 25-ساتىعا ورنىقتى.
ەكاتەرينا شابالينا ترياتلوننان سايىسقا قوسىلعان. سەنا وزەنىن ءجۇزىپ وتۋدە قويۋ شاڭنىڭ اراسىنان كورىنگەن جەرلەسىمىز ۆەلوسيپەدپەن جۇيتكۋدە جارىستى جالعاستىرا الماي, ورتا جولدان اياقتادى.
سپورتتىق گيمناستيكادان ەرلەر دوداسىندا ميلاد كاريميدىڭ شەبەرلىگىنەن قالىڭ جانكۇيەر وراسان ولجا كۇتكەنى بەلگىلى. سەبەبى پاريج جازعى وليمپياداسىنا دەيىن قاتىسقان الەمدىك دودالاردا توپ جارىپ, تالانتىمەن دارالاندى, كورەرمەننىڭ كوزايىمىنا اينالدى. كوپسايىستا باق سىناعان جەرلەسىمىز وزىنە وڭتايلى جاتتىعۋلارىن ورىنداۋدا ءسۇرىنىپ, ۇپاي جوعالتتى. ميلاد كاريمي ءۇشىن كوپسايىستا كۇش سىناۋ وڭ جامباسىنا كەلمەيدى. دەسە دە ول وسى التى جاتتىعۋدا 76.065 ۇپايمەن 24-ورىنعا تۇراقتادى. سناريادتاعى جاتتىعۋدا جوعارى ۇپايعا قول جەتكىزە بەرمەيتىن ميلاد بۇل جولى كەرىسىنشە ءتاۋىر ۇپاي جينادى. ەندى ول ەركىن جاتتىعۋدان وليمپيادا مەدالى ءۇشىن تارتىسقا تۇسەدى.
ساداق اتۋدان جەكەلەي سايىستا داۋلەتكەلدى جاڭبىرباي ىرىكتەۋ كەزەڭىندە كولۋمبيالىق حورحە ەنريكەمەن باسەكەگە تۇسكەن. 7:3 ەسەبىمەن كولۋمبيالىق مەرگەننىڭ مەرەيى ۇستەم بولدى. داۋلەتكەلدى بۇعان دەيىن كوماندالىق تارتىسقا دا قاتىسىپ, يتاليا ساداقشىلارىنا ەسە جىبەردى. جەكەلەي سىندا يلفات ابدۋللين كانادالىق قارسىلاسىنان اسا الماي وليمپيادا ساپارىن اياقتادى.
دزيۋدو كۇرەسىنەن ەرلەر سىنىندا نۇرلىحان شارحان (100 كگ) جازعى وليمپيادا دوداسىنىڭ ەكىنشى اينالىمىندا ءسۇرىندى. العاشقى بەلدەسۋىندە بەلگيالىق توما نيكيفوروفپەن كۇرەسكەن جەرلەسىمىز قارسىلاسىنان باسىم ءتۇستى. تورەشى بەلگيالىق بالۋاننىڭ سىلبىر بەلدەسكەنى ءۇشىن ءۇش شيدو (ەسكەرتۋ) بەرىپ, دودادان قايتاردى. بىراق ەكىنشى اينالىمدا نۇرلىحاننىڭ الەم چەمپيونى, وزبەك الىبى مۇزافاربەك تۇروباەۆقا كۇشى جەتپەدى. بويى الدەقايدا ۇزىن, كۇشى دە مىعىم قارسىلاسى جەرلەسىمىزدى يپپون ۇپايىمەن ايقىن جەڭدى.
