كاسىپكەر اسەل بالا كەزىنەن اسۇيگە جاقىن ءوسىپتى. قولى قالت ەتسە, شايعا ءتۇرلى تورت, ءبالىش ءپىسىرۋدى ادەتكە اينالدىرىپ العان. العاش «بال» مەن «حانىمنىڭ ساۋساقتارى» تورتىن ازىرلەۋدى ۇيرەنىپتى. ول كەزدە قازىرگىدەي كونديتەر ونىمدەرىن ازىرلەيتىن تسەح جوق. قازاقتىڭ توي-قۋانىشى كوپ بولعان سوڭ, تاپسىرىس توپەلەپ تۇسە باستايدى. ارمەن قاراي ءمازىرىن مولايتقىسى كەلەدى. سودان ورىس تىلىندە شىعاتىن «ليۋبليۋ گوتوۆيت» («تاعامدى دايىنداۋدى ۇناتامىن») دەگەن شاعىن جۋرنالدى ىزدەپ ءجۇرىپ ساتىپ الىپ وتىرعان.
كەيىننەن ينتەرنەتكە قول جەتكەن سوڭ ءتۇرلى ءتاتتى توقاشتاردىڭ قۇرامىن, جاسالۋ جولىن سودان الادى. ءسويتىپ, تورتتىڭ, ءتاتتى دەسەرتتىڭ ءتۇر-ءتۇرىن ءپىسىرۋدى ۇيرەنەدى. بىرتە-بىرتە اسۇيىنەن شاعىن تسەحقا اۋىسادى. كاسىبى ودان سايىن دوڭگەلەگەن اسەل ەربولقىزىنىڭ قاراماعىندا 24 ادام جۇمىس ىستەيدى.
ساتىلىمدى ۇيىمداستىراتىن مەنەدجەرلەر, اسپازدار, كونديتەرلەر, دۇكەنشى-كاسسيرلەر, سالات, نان قامىرلارىن دايىنداۋشىلار, ءبالىش, پەچەنە پىسىرۋشىلەر, الەۋمەتتىك جەلىگە جاۋاپ بەرەتىن مامان, موبيلوگراف ءبارى تسەحتاعى جۇمىس كورىگىن قىزدىرادى. ەكى كولىك جۇرگىزۋشى جەڭىل كولىكتەرىمەن تاپسىرىستاردى تەگىن جەتكىزىپ بەرەدى. سونىڭ ارقاسىندا كاسىپ وركەندەيدى.
كونديتەرلىك تسەح پەن جىلدام تاماقتانۋ بولىمىندە تورتتىڭ 35, پيروگتىڭ 25, رۋلەتتىڭ 9, چيزكەيكتىڭ 10, پيروجنىيدىڭ 35, پيتستسانىڭ 6 ءتۇرى پىسىرىلەدى. مۇنىمەن قوسا مازىرىندە بۋرگەر, كەكس, حوت-دوگ, سامسا, چەبۋرەك, ءبالىش, توقاش, تاعامداردان مانتى, تۇشپارا, ۆارەنيك, لاعمان, دۋملياما, قازان-كەباب, فري بار.
«كۋلينارلىق تاتتىلەرگە, ىستىق استارعا تاپسىرىس وتە كوپ. ۇلگەرمەي جاتامىز. ءتىپتى كەيبىر تاپسىرىستان باس تارتۋعا تۋرا كەلەدى. كەڭىرەك ەتىپ كوفەحانا اشساق دەگەن وي بار. ويتكەنى حالىق, اسىرەسە جاستار سونداي جەردىڭ بولعانىن قالايدى. وتباسىمەن, بالالارىمەن كەلىپ ءتاتتى بالىشپەن كوفە, شاي ىشكىلەرى كەلەدى. تۋعان كۇن, باسقا دا مەرەكە كۇندەرى جينالادى», دەيدى كونديتەر تسەحىنىڭ باسشىسى.
بىلىكتى اسپاز ارنايى كۋرس اشىپ, كەنتتىڭ جاستارىنا شەبەرلىك ساباقتارىن جۇرگىزەدى. ودان ءدارىس العان جيىرماعا تارتا جاس ۇيلەرىنە كەنت تۇرعىندارىنان جەكە تاپسىرىستار الىپ, كاسىپتەرىن جالعاستىرىپ جاتىر. كاسىپكەر قايىرىمدىلىق شارالارىن دا نازاردان تىس قالدىرمايدى. ول جاعدايى تومەن وتباسىلارعا, مۇمكىندىگى شەكتەۋلى جاندارعا قارجىلاي كومەك كورسەتەدى. كەنت ىشىندە وتەتىن مادەني جانە سپورتتىق ءىس-شارالارعا ۇنەمى دەمەۋشىلىك جاسايدى.
اۋدان ەكونوميكاسىنىڭ وركەندەۋىنە ايتارلىقتاي ۇلەس قوسىپ جۇرگەن, حالىقتىڭ توي-قۋانىشىنا ءتاتتى ءونىمىن ۇسىنىپ جۇرگەن «Caramel» كونديتەر تسەحى ءالى دە دامىپ, جەتىلە ءتۇسۋدى كوزدەپ وتىر.
قاراعاندى وبلىسى,
شەت اۋدانى,
اقادىر كەنتى
