بۇل اتالعان كلينيكالىق ەمدەۋ مەكەمەسىندە جۇزەگە اسىرىلعان وسىمەن 221-بۇيرەك ترانسپلانتاتسياسى ەكەن. وپەراتسيادان كەيىن بىرنەشە كۇن اۋرۋحانادا جاتىپ, جاعدايى جاقسى بولعاندىقتان, ول ۇيىنە شىعارىلدى. وسىناۋ قۋانىشتى ساتكە وراي كلينيكادا كىشىگىرىم سالتاناتتى شىعارىپ سالۋ ءراسىمى ۇيىمداستىرىلدى.
بۇيرەگىن الماستىرعان – 49 جاستاعى ەرلان اسقاروۆ دەيتىن ازامات. ول اعزاعا مۇقتاج ادام, ياعني رەتسەپيەنت بولىپ كەزەكتە تۇردى. بۇل جەردە ساۋ ءبىر بۇيرەگىن بەرگەن ءوزىنىڭ ايەلى بولدى. ناۋقاس ءبىر جىلدان بەرى سوزىلمالى بۇيرەك جەتىسپەۋشىلىگىمەن ەسەپتە تۇرعان ەكەن. اتالعان دەرتىنە بايلانىستى گەمودياليز اپپاراتىمەن جاساندى بۇيرەك قىزمەتىنە جۇگىنۋگە تاۋەلدى بولعان. وسىلايشا, دارىگەرلەر اعزا الماستىرۋ وپەراتسياسى كەزىندە ەر ازاماتقا ايەلىنىڭ بۇيرەگىن حيرۋرگيالىق جولمەن سالىپ بەردى.
بىرنەشە كۇن بويى پالاتادا تەراپيالىق ەم قابىلداعان ناۋقاس پەن ونىڭ جۇبايىن ۇيىنە امان-ەسەن قايتارعان «التىن قولدى» مەديتسينا ماماندارى جالپى ەرلى-زايىپتىلارعا جاسالعان وتانىڭ ءساتتى وتكەنىن, ەكى پاتسيەنتتىڭ دە جاعدايى جاقسى ەكەنىن جەتكىزدى.
№1 قالالىق كلينيكالىق اۋرۋحاناسى ترانسپلانتولوگيا بولىمشەسىنىڭ مەڭگەرۋشىسى ءسابيت بايتەمىروۆتىڭ ايتۋىنشا, كلينيكادا بۇيرەك الماستىرۋ وپەراتسياسى 2013 جىلدان باستالعان. بۇيرەك ترانسپلانتاتسياسىن جۇزەگە اسىرۋ ءۇشىن رەتسەپيەنت پەن دونوردىڭ قان توبى, گەنەتيكالىق قۇرىلىمدارى سايكەس كەلۋ كەرەك. ايتپەسە, بۇيرەكتى الماستىرعانمەن, ەرتەڭگى كۇنى اعزا ءبارىبىر ونى قابىلداماي, بويىنان شىعارىپ تاستايدى. بۇل جەردە ناۋقاستىڭ تۋىستارىنىڭ بىردە-ءبىر بۇيرەك الماستىرۋعا ولشەمدەرى سايكەس كەلمەپتى. تەك قانا ايەلىنىڭ عانا بۇيرەگى ترانسپلانتاتسياعا جارايتىن بولىپ شىققان. ناۋقاس وپەراتسيادان كەيىن ون شاقتى كۇن اۋرۋحانادا جاتىپ دارىگەرلەردىڭ باقىلاۋىمەن كۇتىندى. بىراق جوعارى ايتىپ وتكەنىمىزدەي, ءبىر جىلدان بەرى بۇيرەگى قاتتى مازالاپ جۇرگەن ەكەن. اتالعان ورگان قىزمەتىن دۇرىس اتقارا الماعاندىقتان, قاندى زاردەن تازالاۋ ءۇشىن گەمودياليز اپپاراتىنىڭ كومەگىنە جۇگىنۋگە ءماجبۇر بولعان. دەگەنمەن اپپارات قاندى تولىق تازالاي المايدى. ال تابيعي بۇيرەكتىڭ وعان شاماسى كەلەدى. ەندى ناۋقاستى بۇل ماسەلە ەشقاشان تولعاندىرمايدى.
وسى اتالعان كلينيكادا بۇيرەك پەن باۋىر ترانسپلانتاتسياسى ون شاقتى جىلدان اسا ۋاقىتتان بەرى جۇرگىزىلەدى. دارىگەر-حيرۋرگ س.بايتەمىروۆتىڭ مالىمدەۋىنشە, شىمكەنتتە بۇگىنگى تاڭدا 600 ادام گەمودياليز قابىلدايدى. ولاردىڭ ءبارى دە ەسەپتە تۇر. بارلىعى دا دونوردى كۇتىپ ءجۇر. ەشقايسىسى سوڭعى ءۇمىتىن ۇزگىسى كەلمەيدى. ال قايتىس بولعان ادامنىڭ بۇيرەگىن سالۋ كوپ ۋاقىتتى تالاپ ەتەدى. ەڭ جامانى – ونى كۇتۋ. بىلايشا ايتقاندا, مايىتتىك دونور وتە تاپشى. ال دارىگەردىڭ پىكىرىنشە, بۇل ماسەلەنى شەشۋدىڭ ءبىر-اق جولى – ماقۇلداۋ پرەزۋمتسياسىن قابىلداۋ. ياعني تۋىستاردىڭ رۇقساتىنسىز باس ميى سەمىپ قايتىس بولعان ادامداردىڭ ىشكى ساۋ اعزالارىن الىپ, وعان مۇقتاج ناۋقاستارعا سالۋ. ول ءۇشىن زاڭعا ءتيىستى تۇزەتۋلەر ەنگىزىلۋ كەرەك. ەگەر مايىتتىك دونورلىققا كەدەرگى كەلتىرىپ تۇرعان قولدانىستاعى زاڭداعى باپ الىنىپ تاستالسا, وندا ميى ىستەن شىققان, ءولىم اۋزىنداعى ادامنىڭ ىشكى اعزالارى تۋىستارىنىڭ رۇقساتىنسىز الىنادى. تەك بۇعان قارسى تۇراتىن ءبىر-اق نارسە – سول مايىتتىك دونورلىققا جاتاتىن ادامنىڭ ءتىرى كەزىندە ءوزىنىڭ اعزالارىن ترانسپلانتاتسياعا پايدالانۋعا كەلىسپەيتىنى تۋرالى قول قويعان قۇجاتى عانا دونورلىققا كەدەرگى بولا الادى. باسقا كەزدە جول-كولىك وقيعاسىنان, اۋىر باس مي جاراقاتىنان نەمەسە ينسۋلتتان ميى قىزمەتىن توقتاتقان بارلىق ناۋقاس ماقۇلداۋ پرەزۋمتسياسى بويىنشا ىشكى اعزالارى ترانسپلانتاتسيا ءۇشىن الىنادى. بۇل جاعداي ەگەر جوعارىدا اتالعان تۋىستاردىڭ رۇقساتى كەرەك دەگەن زاڭداعى ارنايى باپ الىنىپ تاستالسا عانا مۇمكىن بولماق. وسى رەتتە دارىگەر-حيرۋرگ مايىتتىك دونور دۇنيە ءجۇزىنىڭ بارلىق ەلىندە دامىعانىن ايتادى. سوندىقتان ەلىمىز دە وسىعان كوشۋ كەرەك دەيدى. ونىڭ ايتۋىنشا, بۇل ءبىرىنشى كەزەكتە جىلدار بويى دونور كۇتكەن اعزاعا مۇقتاج ناۋقاستار ءۇشىن كەرەك بولىپ تۇر. سونداي-اق مامان مايىتتىك دونورعا رۇقسات بەرىلسە, زاڭسىز ترانسپلانتولوگيا بەلەڭ الىپ كەتەدى دەگەن اڭگىمەنىڭ نەگىزى جوق ەكەنىن باياندادى.
«اعزا الماستىرۋ – وتە كۇردەلى وپەراتسيا. بۇل كولىكتىڭ بولشەگى سياقتى اۋىستىرا سالاتىن ءىس ەمەس. وپەراتسياعا دەيىن قانشاما مەديتسينالىق تالداۋ مەن زەرتحانالىق انىقتاما جۇرگىزىلەدى. ونىڭ بەرگى جاعىندا نەشەمە زاڭدىق راسىمدەر مەن قۇجاتتىق تولتىرۋلار جاتىر. ءبارى دە ايناداعىداي كورىنىپ تۇرادى. مۇنداي كۇردەلى وپەراتسيالاردى سول ءۇشىن دە جاسىرىپ قالۋ مۇمكىن ەمەس. ونىڭ ۇستىنە ەلدەگى زاڭ ورگاندارى مەن پروكۋراتۋرا بۇل سالانى قاتاڭ تۇردە باقىلاۋعا الاتىنى بەلگىلى. جالپى, مايىتتىك دونور الەمدە جاقسى دامىعاندىقتان, ونىڭ جۇزەگە اسۋ تەتىكتەرى مەن جولدارى, تاجىريبەسى ابدەن ءپىسىپ-جەتىلگەن. سول سەبەپتى ودان قورقۋدىڭ ەش قاجەتى جوق», دەدى س.بايتەمىروۆ.
شىمكەنت
