مادەنيەت سارايىنىڭ الداعى تاعدىرى تۋرالى ارنايى بريفينگ بەرۋدى ۇيعارعان قالالىق اكىمدىك وكىلدەرى جۋرناليستەردى اتالعان عيمارات ماڭىنا جينادى. بۇگىنگى تاڭدا مادەنيەت وشاعىنىڭ اينالاسى تۇگەل تەمىر قورشاۋمەن قورشالعان. ويتكەنى وسىنشا جىل قاراۋسىز جاتىپ, نە ەسىگى, نە تەرەزەسى جوق بولعاندىقتان كىم كورىنگەن بۇل جەردى پانا ەتىپ العان. اسىرەسە جاستار وسى ماڭعا ۇيىرسەكتەپ العان ەدى. ول جەردە نە ىستەيتىندەرى بەيمالىم, ايتەۋىر تۇرعىندار جاس جەتكىنشەكتەر كۇندىز دە, تۇندە دە ىشىندە توپىرلاپ جۇرەدى دەپ تالاي شاعىم ايتقان. اقىرى سونىڭ ارتى قايعىلى جاعدايمەن اياقتالدى. ءۇش بوزبالا سەلفيلەتەمىز دەپ تۇندە ىشىنە كىرگەن, سول كەزدە بەتوندى قۇرىلىم وپىرىلىپ ءتۇسىپ بىرەۋىن باسىپ قالعان. قۇداي ساقتاپ قالعان ەكەۋى قاشىپ ۇلگەرگەن. مىنە, سودان بەرى ول جەردىڭ اينالاسى تەمىر قورشاۋمەن قورشالىپ, تاس بەكىتۋلى.
جوعارىدا ايتقانىمىزداي, ەندى ول بۇزىلاتىن بولدى. بۇل تۋرالى بريفينگتە شىمكەنت قالالىق ىشكى ساياسات جانە جاستار ءىسى باسقارماسى باسشىسىنىڭ مىندەتىن اتقارۋشى ايگەرىم جۇماعۇلوۆا ايتىپ بەردى.
«نىسان بىلتىر قاراشادا شاھاردىڭ كوممۋنالدىق قىزمەتىنە وتكەن ەدى. و باستا قايتا جاڭعىرتىلادى دەگەن شەشىم بولعان. بۇل جۇمىسپەن ء«سابي» قايىرىمدىلىق قورى اينالىساتىن بولىپ شەشىلگەن. قور قۇرىلىس ساپاسىن انىقتاۋ ءۇشىن ساراپشىلارعا جۇگىنەدى. ساراپشىلىق ۇيىم نىساننىڭ پايدالانۋعا جارامايتىنى تۋرالى تۇجىرىم جاسايدى. سونىمەن, ەندى عيمارات الداعى ۋاقىتتا سۇرىلەدى. يەسى بولسا دا بۇل ماڭ قاراۋسىز قالدى. سونىڭ سالدارىنان بۇل جەردە ۇرلانباعان زات قالمادى. تەمىر بەتوننىڭ ارماتۋراسىنا دەيىن جۇرت كەسىپ اكەتتى. ەندى مادەنيەت سارايىنىڭ ورنىنا جاڭادان ءدال وسىنداي پىشىندە, سىرتقى كەلبەتى دە تۋرا قازىرگىسىن قايتالايتىن ۇلكەن ءزاۋلىم ساراي تۇرعىزىلادى. قۇرىلىس جۇمىستارى بيىل قىركۇيەك ايىندا باستالادى. بيۋدجەتتەن ەشقانداي قاراجات بولىنبەيدى. بارلىق شىعىندى ء«سابي» قايىرىمدىلىق قورى ءوزى كوتەرەدى. ەسكى عيمارات ورنىنا جاستار ورتالىعى كەشەنى بوي كوتەرەدى. جوبا بويىنشا جاڭا نىساندا ءتۇرلى ۇيىرمەلەر, جاستار مەن وقۋشىلاردىڭ بوس ۋاقىتىن ءتيىمدى ۇيىمداستىرۋعا ارنالعان بارلىق جاعداي قاراستىرىلادى. سونىمەن قاتار مادەنيەت سارايىنىڭ اينالاسى گۇلزار مەن ساياباققا اينالادى. سۋبۇرقاقتار ىسكە قوسىلادى. بالالار مەن سپورتتىق الاڭشالار پايدا بولادى», دەدى ءا.جۇماعۇلوۆا.
فوسفورشىلار سارايىنىڭ جاعدايىنا الاڭداعان جاناشىر قالا تۇرعىندارىنىڭ ءبىرى, 90 جاستاعى قاريا, قالا اكىمىنىڭ كەڭەسشىسى وركەن ابدىرەەۆ اقساقال دا بۇگىنگى جيىنعا قاتىستى. العاشقى باستامانى كوتەرگەن دە وسى قاريا بولاتىن. ون شاقتى جىلدان بەرى قوعام مەن اكىمدىك نازارىن وسى ماسەلەگە اۋدارۋعا تىرىسىپ ءجۇردى. ارەكەتى ناتيجەسىز قالمادى. قالا اكىمى عابيت سىزدىقبەكوۆ اقساقالمەن ارنايى كەزدەسىپ, مادەنيەت سارايىنىڭ جاي-كۇيىمەن تانىستى. ارتىنشا اۋقىمدى سەنبىلىك ۇيىمداستىرىلىپ, عيماراتتىڭ اينالاسى كۇل-قوقىستان تازالاندى. جان-جاعىنداعى قاۋلاپ ءوسىپ كەتكەن شوپتەر, ارتىق تالدار كەسىلىپ, رەتكە كەلتىرىلدى. قوعام بەلسەندىسى جىلدار بويى شاھاردىڭ باس اۋرۋىنا اينالعان پروبلەمانىڭ شەشىلگەنىنە قۋانىشتى. عيماراتتىڭ جان-جاعى – تولعان ءۇي. بالالار كۇن ىستىقتا قايدا وينارىن بىلمەي جۇرەدى. ەندى ولارعا كەرەمەت مۇمكىندىك تۋىپ تۇر. ءبىر-ەكى جىلدا بۇل جەر ءساندى ساياباققا اينالادى. بالالار دا ۇلكەندەر دە سوندا دەمالىپ, سپورت, ويىن الاڭشالارىندا بوس ۋاقىتىن وتكىزەدى. ودان قالسا, جاڭا سارايدا ءتۇرلى ۇيىرمەلەرگە قاتىسىپ, وزدەرىن دامىتادى دەگەندى ايتتى قاريا.
بۇعان قوسا اقساقال قۇرىلىسقا, جالپى قالانىڭ مادەني سالاسىنا بايلانىستى بىرنەشە ۇسىنىسىن جەتكىزدى. بىرىنشىدەن, بولاشاق مادەنيەت سارايى ۇلتتىق ويۋ-ورنەكتەرمەن اسپەتتەلگەن, ساۋلەتى شىعىس ۇلگىسىنە جاقىن نىسان بولسا دەگەن تىلەگىن ايتتى. ەكىنشىدەن, تالاي تىندىرىمدى ءىس قىلعان مەملەكەت جانە قوعام قايراتكەرى وزبەكالى جانىبەكوۆتىڭ اتى وسى مادەنيەت سارايىنا بەرىلسە دەگەن ويىن جاريالادى. ويتكەنى وزاعاڭداي قازاق مادەنيەتى مەن ونەرىنە قىزمەت ەتكەن ادام از دەيدى. ءبىرى – سوناۋ ەرميتاجداعى تايقازاندى ەلگە اكەلۋگە سەپتىگىن تيگىزگەنى, ەكىنشىسى – حالقىمىزدىڭ ءتول مەرەكەسى ناۋرىزدى جاڭعىرتۋى. قاريانىڭ ءۇشىنشى ۇسىنىسى كومپارتيانىڭ ءبىرىنشى حاتشىسى حرۋششەۆكە تىكەلەي قارسى شىعىپ, قازاقستاننىڭ جەر تۇتاستىعىن ساقتاپ قالعان حالقىمىزدىڭ ادال ازاماتى جۇمابەك تاشەنوۆ ەسكەرتكىشى جاڭعىرتۋدان وتكەن شىمكەنتتىڭ تەمىرجول ۆوكزالىنىڭ الدىنان تۇرعىزىلسا دەگەن يدەياسى بولدى. اقساقالدىڭ پىكىرىنشە, شىمكەنتتى ەلىمىزدەگى ەڭ كورىكتى, ساۋلەتتى قالاعا اينالدىرۋعا تولىق مۇمكىندىك بار. شاھاردى دامىتۋ تۇجىرىمداماسىنا وراي بۇل تىرلىكتەر اتقارىلىپ تا كەلەدى. وسى ورايدا اتامىز جاڭادان اشىلىپ جاتقان گۇلزار مەن ساياباقتاردى, جولداردىڭ جوندەلىپ, تالاي جىل توپىراعى كورىنىپ جاتقان ىشكى كوشەلەردىڭ اسفالتتالىپ جاتقانىن تىلگە تيەك ەتتى.
وسى بريفينگ بارىسىندا قالالىق توتەنشە جاعدايلار دەپارتامەنتى باستىعىنىڭ ورىنباسارى ەركىن وتارعالىم ۇلى كەيىنگى 5 جىلدا عيمارات ىشىندەگى قۇرىلىمداردىڭ قۇلاۋ فاكتىلەرى بويىنشا 7 وقيعا تىركەلگەنىن جەتكىزدى. سوڭعىسى, جوعارىدا ايتىپ وتكەنىمىزدەي, بىلتىر جەلتوقسان ايىندا ورىن العان. سونىڭ سالدارىنان ءبىر ءجاسوسپىرىم قايتىس بولدى. سوندىقتان دەپارتامەنت وكىلى عيماراتتىڭ قازىرگى قالپى قاۋىپتى ەكەنىن باياندادى.
«ارنايى مامانداندىرىلعان مەكەمە اتالعان نىسان كۇردەلى جوندەۋگە كەلمەيدى دەگەن قورىتىندى بەردى. بىراق اكىمدىك وكىلدەرى مالىمدەگەندەي, بۇل جەردە قايتادان سول بۇرىنعى قالپىن ساقتاعان جاڭا نىسان پايدا بولادى. بۇل عيمارات پەن ونىڭ اينالاسىنداعى ساياباق ەڭ بىرىنشىدەن وسى توڭىرەكتەگى تۇرعىندارعا جاقسى بولعالى تۇر. جالپى, قالا بويىنشا 107 اپاتتى نىسان بار. ولاردى قالپىنا كەلتىرۋ, كۇردەلى جوندەۋ جونىندە ءتيىستى مەكەمەلەر تاراپىنان جۇمىستار جۇرگىزىلىپ جاتىر», دەدى ەركىن وتارعالىم ۇلى.
