مۇناي مەن گاز وندىرىسىنە قاجەتتى جابدىقتار وندىرەتىن زاۋىتتىڭ پەريمەترى بويىنشا قورشاۋ سالۋ, اۋىزسۋ, گاز جانە ەلەكتر قۋاتى جەلىلەرىن تارتۋ سەكىلدى نەگىزگى جۇمىستار ورىندالدى. اسحانا, باقىلاپ وتكىزۋ پۋنكتى, جاتاقحانا جانە نەگىزگى تسەحتىڭ ىرگەتاسى قالانىپ, كىرمە اۆتوجولدى تىعىزداۋ جانە تەگىستەۋ جۇمىستارى جۇرگىزىلدى. سونداي-اق اۋىزسۋ قۇبىرىنا قوسىلۋ, قۇرىلىس قالاشىعىنا دەيىن سۋمەن جابدىقتاۋ جەلىسىن جوندەۋ, وزگە دە قاجەتتى ءبىراز جۇمىس ورىندالدى.
«الاڭىشىلىك جەلىلەر مەن سىرتقى ينفراقۇرىلىم نىساندارىنىڭ جوباسىن ازىرلەۋدى جاقىندا اياقتايمىز دەپ وتىرمىز. ال شىلدە ايىنىڭ سوڭىنا دەيىن نەگىزگى تسەح جوباسىنا ۆەدومستۆودان تىس ساراپتاما جۇرگىزۋ اياقتالادى. قازىر مودۋلدىك بلوكتاردى دايىنداۋ, زاۋىتتىڭ قوسالقى عيماراتتارىنىڭ ىرگەتاسىن مونتاجداۋ جۇمىستارى جۇرگىزىلىپ جاتىر», دەدى زاۋىت وكىلدەرى.
زاۋىت 16 ءتۇرلى تاۋار وندىرەدى. نىساننىڭ قۇرىلىسى مەن قىزمەت ەتۋ كەزەڭىندە جاڭاوزەندىكتەر ءۇشىن 250-دەن استام جاڭا جۇمىس ورنى اشىلادى.
ماڭعىستاۋ وبلىسى
