دانيار دارالانا المادى
دۇيسەنبىدە جالعىز دزيۋدوشىمىز جارىس جولىنا شىقتى. 73 كگ سالماق دارەجەسىندە بەلدەسكەن دانيار شامشاەۆقا زور سەنىم ارتتىق. ءالى ەسىمىزدە, 2022 جىلى استانادا وتكەن ازيا چەمپيوناتىندا 20 جاستاعى جاس جولبارىسقا باس جۇلدەنى ولجالاۋ ءۇشىن نەبارى 149 سەكۋند جەتكىلىكتى بولعانى. اتاپ ايتساق, دانيار ۇندىستاندىق سۋرەش سينگح نينگحوۋجام مەن تاجىكستاندىق بەحرۋز قوجازوجدانى 42 سەكۋند, وزبەكستاندىق مۇراتجون يۋلداشەۆتى 31 سەكۋند, قىرعىزستاندىق شىڭعىسحان ساعىناليەۆتى 34 سەكۋندتا ەڭسەردى. سول كەزدە بارلىق باق وكىلدەرى 20 جاسار ورەننىڭ اسقان شەبەرلىگىنە ءتانتى بولىپ, بۇل جىگىتتىڭ ەپتىلىگى مەن ەرلىگى جونىندە جارىسا جازعان ەدى.
سودان بەرى ەكى جىل دا زىمىراپ وتە شىقتى. ەلىمىزدىڭ ءبىرىنشى ءنومىرلى بالۋانى رەتىندە شامشاەۆ تالاي ءدۇبىرلى دوداعا قاتىستى. بىردە ۇتتى, بىردە ۇتىلدى. بىراق الەم چەمپيوناتى مەن ازيا ويىندارى سەكىلدى بايراقتى باسەكەلەردە ونىڭ باعى ءبىر جانبادى. بيىل پاريج وليمپياداسىنىڭ تۇساۋكەسەر كەزدەسۋىندە دانياردىڭ مۇراتجون يۋلداشەۆپەن كۇش سىناساتىنىن ەستىگەندە قاتتى قۋاندىق. ءدال سول بالۋاندى استانادا جارتى مينۋتتا جايپاپ سالعانى تۋرالى جوعارىدا ايتتىق. سول ەكى جىل ارالىعىندا وزبەك دزيۋدوشىسىنىڭ شەبەرلىگى قاتتى ءوستى مە, الدە قازاق جىگىتى تۇرالاپ قالدى ما, ايتەۋىر, بۇل جولى قانداسىمىز ەل سەنىمىن اقتامادى. مۇراتجونعا قارسى باسەكە بارىسىندا ءۇش «شيدو» العان شامشاەۆ جارىستان شەتتەتىلدى.
73 كگ سالماقتا دۇنيەجۇزىلىك رەيتينگتە ءبىرىنشى ورىندا تۇرعان حيدايات گەيداروۆتىڭ اسىعى الشىسىنان ءتۇستى. جارىس بارىسىندا توحار بۋتبۋل (يزرايل), ارتۋر مارگەليدون (كانادا), اكيل گياكوۆا (كوسوۆو) جانە جوان-بەنجامەن گابانى (فرانتسيا) جولىنان ىعىستىرعان ازەربايجان بالۋانى وليمپيادا چەمپيونى اتاندى. بۇل بالۋانعا بەكەر توقتالىپ وتىرعان جوقپىز. حيدايات بىزگە بوتەن ەمەس. ول 1997 جىلى قاراعاندىدا دۇنيەگە كەلگەن. قازاق جەرىندە كىندىك قانى تامىپ, وسى جاقتىڭ اۋاسىمەن تىنىستاپ, ءنارىن بويىنا ءسىڭىردى. بالاۋسا شاعىندا اتا-اناسىمەن بىرگە تاريحي وتانىنا ورالدى. مىنە, سول گەيداروۆ اراعا جىلدار سالىپ, ازەربايجاننىڭ باس بالۋانىنا اينالدى. اتاپ ايتساق, الەم چەمپيونى (2024 جىلى) جانە سول جارىستىڭ ءۇش دۇركىن قولا جۇلدەگەرى (2018, 2019, 2022) اتاندى. ەۋروپا چەمپيوناتىن ءتورت مارتە (2017, 2022, 2023, 2024) ۇتىپ, ءبىر رەت كۇمىسپەن (2018) كۇپتەلدى. ەۋروپا ويىندارىندا قولا (2019), دۇنيەجۇزىلىك ۋنيۆەرسيادانىڭ كۇمىس مەدالىن (2019) ەنشىلەدى. يسلام ىنتىماقتاستىعى ويىندارىندا (2017) باس جۇلدەنى قانجىعاسىنا بايلادى. ال
27 شىلدەدە 27 جاسقا تولعان حيدايات گەيداروۆ ءوزىنىڭ تۋعان كۇنىنە كەرەمەت سىي جاساپ, فرانتسيانىڭ باس شاھارىندا «ماڭگى توزباس» اتاققا قول جەتكىزدى. مولدوۆانىڭ تۋى استىندا ونەر كورسەتكەن تاعى ءبىر ازەربايجاندىق دزيۋدوشى ءادىل وسمانوۆ پەن جاپونيالىق سويشي حاشيموتو قولا مەدالدى موينىندا جارقىراتتى.
ايەلدەر 56 كگ سالماقتىڭ جۇلدەلەرىن ساراپقا سالدى. بۇل تارتىس كانادانىڭ نامىسىن قورعاپ جۇرگەن جاپون قىزى كريستا دەگۋچيدىڭ جەڭىسىمەن اياقتالدى. الەمدىك رەيتينگتە كوش باستاپ تۇرعان اككى بالۋان فينالدا وڭتۇستىك كورەيانىڭ وكىلى حا مي-ءميدى قاپى قالدىردى. جاپونيالىق حارۋكا فۋناكۋبو مەن فرانتسيالىق سارا-لەوني سيزيك ءۇشىنشى ورىنعا تابان تىرەدى.
قامشىبەك تە قاپى قالدى
بوكستان قازاقستاننىڭ ەرلەر قۇراماسى پاريجگە تولىق قۇراممەن بارعانى بەلگىلى. «شۋ» دەگەننەن 71 كگ سالماقتاعى اسلانبەك شىمبەرگەنوۆ شىڭنان قۇلاعاندا كوڭىلىمىز قاتتى قۇلازىدى. سەبەبى ول – قاتارداعى كوپ بوكسشىنىڭ ءبىرى ەمەس. اسلانبەك – وليمپيادانىڭ اشىلۋ سالتاناتىندا قازاقتىڭ كوك بايراعىن ۇستاپ شىققان ەرەن تۇلعا, ۇلتتىق كوماندانىڭ كاپيتانى, الەم جانە ازيا چەمپيونى, ازيا ويىندارىنىڭ ەكى دۇركىن جۇلدەگەرى. پاريج رينگىندە 30 جاستاعى ساقا سپورتشى ويدا-جوقتا يوردانيانىڭ وكىلى زەياد يشايشكە ەسە جىبەردى. ءدال سول بىلعارى قولعاپ شەبەرىن اسلانبەك بۇعان دەيىن بىرنەشە مارتە ساباعان ەدى. ال ءوزىنىڭ سپورتتىق جولىنداعى ەڭ ءىرى دودادا قانداسىمىز جەر سيپاپ قالدى.
وزگە بوكسشىلارىمىز جارىستى جەڭىسپەن باستادى. 63,5 كگ سالماقتاعى مۇحامەدسابىر بازارباي ۇلى يسپانيالىق ويەر يبارەچچەنى ەش قينالماي ۇتتى. 92 كگ سالماقتاعى ايبەك ورالباي نيگەريالىق ولەتەن ولاورەنى ءبىرىنشى راۋندتا ءبىر ەسەڭگىرەتىپ الدى. ودان كەيىن دە قارسىلاسىن جاقسىلاپ تۇرىپ تومپەشتەگەن ول كۇمانسىز جەڭىسكە قول جەتكىزدى. 50 كگ سالماقتاعى نازىم قىزايباي يتاليالىق دجوردانا سوررەنتينوعا سان سوقتىردى. سول كەشتە شارشى الاڭعا شىققان رۋسلان ابدوللاەۆتىڭ دا ايدارىنان جەل ەستى. وزبەكستاننىڭ نامىسىن قورعاعان قازاق جىگىتىنىڭ مەكسيكالىق ميگەل انحەل مارتينەستەن مەرەيى ۇستەم بولدى.
سەيسەنبىدە بازارباي ۇلى وليمپياداداعى ءوزىنىڭ ەكىنشى كەزدەسۋىن وتكىزدى. ول ازيا ويىندارىنىڭ ءفيناليسى, ازيا چەمپيوناتىنىڭ قولا جۇلدەگەرى تايپەيلىك لاي چجۋەنمەن قولعاپ ءتۇيىستىردى. اسا شيەلەنىستى باسەكەدە مۇحامەدسابىر 3:2 ەسەبىمەن جەڭىس تويىن تويلادى. اسا اۋىر سالماقتاعى قامشىبەك قوڭقاباەۆ الەم چەمپيوناتىنىڭ قولا جۇلدەگەرى, ەۋروپا چەمپيونى, يسپانيالىق ايۋب گادفا دريسسيمەن ايقاستى. پيرەنەي تۇبەگىنەن كەلگەن بوكسشىنىڭ بويى ۇزىن, ءوزى ەڭگەزەردەي ەكەن. باسقا الىپ بارا جاتقان ەشتەڭەسى جوق. بىراق قامشىبەكتىڭ سوعان دا ءالى جەتپەدى. تاۋەكەلگە بارماي, جاسقانا قيمىلداپ, قولىن ارا-تۇرا عانا سىلتەگەن ساڭلاعىمىز اقىرى سان سوعىپ قالدى. بەس تورەشىنىڭ ۇشەۋى ءدريسسيدى مىقتى دەپ تانىدى. ال توكيو وليمپياداسىندا قولا, الەم چەمپيوناتىندا ەكى, ازيا ويىندارىندا ءبىر جانە قۇرلىق بىرىنشىلىگىندە ءتورت كۇمىس العان قازاقتىڭ نار تۇلعالى بوكسشىسى ەلگە قۇرقول قايتاتىن بولدى. وكىنىشتى-اق!
تەننيسشىلەر تەگىس ۇتىلىپ, مەرگەندەر ءمۇلت كەتتى
پاريجگە توپىرلاپ بارعان تەننيسشىلەرىمىز تەگىستەي ۇتىلدى. الدىمەن جاراقاتىن جەلەۋ ەتكەن ەلەنا رىباكينا مەن يۋليا پۋتينتسەۆا جارىسقا قاتىسۋدان باس تارتسا, وزگە ويىنشىلارىمىز العاشقى اينالىمنان اسا العان جوق. ەسەسىنە ۇستەل تەننيسىنەن ءوتىپ جاتقان تۋرنيردە كيريلل گەراسيمەنكو تابىستى ونەر كورسەتىپ جاتىر. باستاپقى باسەكەدە چيليلىك نيكولاس بۋرگوستان 4:0 (11:4, 11:5, 12:10, 11:6) ەسەبىمەن باسىم تۇسكەن ەلىمىزدىڭ ءبىرىنشى راكەتكاسى ىلە-شالا گەرمانيا قۇراما كومانداسىنىڭ مۇشەسى تسيۋ داننان ايلاسىن اسىردى – 4:3 (6:11, 11:6, 11:13, 5:11, 11:5, 11:9, 11:6). 1/8 فينالدا كيريلل مىسىرلىق ومار اسسارمەن شەبەرلىك بايقاسادى.
ال بادمينتونشى دميتري پانارين براين يانننان (كانادا) جانە سەمسەرلەسۋشى ايگەرىم سارىباي مانون بريۋنەدەن (فرانتسيا) ۇتىلىپ, جارىستىڭ ەكىنشى بولىگىنە شىعا المادى. ونىڭ الدىندا عانا تاجىريبەلى نوياندار – رۋسلان قۇربانوۆ, ۆاديم شارلايموۆ, ەلمير ءالىمجانوۆ سۇرىنگەن ەدى. نىسانا كوزدەۋدەن نيكيتا چيريۋكينا مەن يرينا يۋنۋسمەتوۆا ىرىكتەۋ سىنىندا 11-ورىندا قالىپ قويدى.
10 مەترلىك قاشىقتىقتان پنەۆماتيكالىق مىلتىق اتۋدا الەكساندرا لە التىنشى ساتىعا جايعاستى. اكادەميالىق ەسۋدەن ۆلاديسلاۆ ياكوۆلەۆ جارتىلاي فينالدا ءبىرىنشى ورىندى يەلەنىپ, ە توبىنىڭ فينالىنا جولداما الدى. قۇرامىندا يلفات ابدۋللين, الەكساندر ەرەمەنكو جانە داۋلەتكەلدى جاڭبىرباي سىندى مەرگەندەرى بار ساداق اتۋشىلار 1/8 فينالدا يتاليا سپورتشىلارىنا 4:5 ەسەبىمەن جول بەردى.
