سۇرمەرگەندەر سايىساتىن باسەكەگە ەلىمىزدىڭ تۇكپىر-تۇكپىرىنەن 300-گە تارتا سپورتشى كەلىپ, باق سىناستى. ايتا كەتەيىك, كەڭ اۋقىمداعى سايىس وسكەمەندە تۇڭعىش رەت ءوتتى. ءتىپتى ەل كولەمىندە مۇنداي ءدۇبىرلى دودا بۇرىن-سوڭدى بولماعان دەسەدى.
– شىعىستاعى ساداق فەدەراتسياسىنىڭ پرەزيدەنتى اجار راحمەتقىزى ۇسىنىس ايتقان سوڭ, بىرىنشىلىكتى وسكەمەندە وتكىزۋدى ءجون دەپ شەشتىك. بۇل وتە دۇرىس بولدى. سەبەبى قايتا جاڭعىرعان بابا ءداستۇرى ەلىمىزدىڭ شىعىسىندا دا دامۋى كەرەك. بۇگىنگى جارىس كوپشىلىكتىڭ ساداق اتۋعا دەگەن قىزىعۋشىلىعىن وياتقان سەكىلدى. ءبىر ايتا كەتەرلىگى, بۇعان دەيىنگى وتكەن چەمپيوناتتاردا مۇنشا كوپ ساداقشى قاتىسپاعان, – دەيدى ساداق اتۋ فەدەراتسياسىنىڭ ۆيتسە-پرەزيدەنتى دياس احمەتوۆ.
ءداستۇرلى ساداق اتۋدان اۋقىمدى جارىستى قازاقستان رەسپۋبليكاسى ۇلتتىق سپورت قاۋىمداستىعى مەن «Oskemen sadaq atu» ءداستۇرلى ساداق اتۋ فەدەراتسياسى بىرلەسىپ ۇيىمداستىرعان. جاسوسپىرىمدەر اراسىنداعى جارىسقا 7 جاستان 17 جاسقا دەيىنگى ساداقشىلار قاتىسىپ, پۋتا, قالقان, جامبى نىسانادا باق سىناستى. ءار قاتىسۋشىعا ءار نىساناعا بەس مۇمكىندىكتەن بەرىلدى. جاس ەرەكشەلىكتەرىنە قاراي اراقاشىقتىق تا ءارتۇرلى بولدى. مىسالى, 7-9 جاستاعى ساداقشىلار 10 مەتردەن ساداق تارتسا, 10-12 جاستاعىلار – 15 مەتردەن, 13-15 جاستاعىلار – 20 مەتردەن, 16-17 جاستاعى جاسوسپىرىمدەر 25 مەتردەن نىسانا كوزدەدى. سانگە اينالعان ساداق سايىسىنىڭ ءبىر ەرەكشەلىگى, قاتىسۋشىلار ۇلتتىق كيىممەن كەلدى.
ساپ تۇزەگەندە, كورەرمەن قاۋىم بايىرعى قازاقتىڭ ۇل-قىزدارىن كورگەندەي بولدى. بۇل بىرىنشىلىكتىڭ وسكەمەندە ءوتىپ جاتقانىنا مۇرىندىق بولعان – شىعىستاعى ساداق فەدەراتسياسىنىڭ پرەزيدەنتى اجار راحمەتقىزى.
– ەلىمىزدىڭ سۇرمەرگەندەرى وسكەمەندە باس قوسقانىنا قۋانىشتىمىن. بۇل دا ۇلتتىق ءداستۇرىمىزدىڭ جاڭعىرعانى دەپ ەسەپتەيمىن. جالپى, ءۇشىنشى رەت وتكىزىلىپ جاتقان چەمپيوناتتىڭ وسكەمەندە ۇيىمداستىرىلۋى – فەدەراتسيا ءۇشىن ۇلكەن جەتىستىك. ەكىنشىدەن, شىعىس جۇرتىنا ساداق اتۋ ونەرىنىڭ دامىپ كەلە جاتقانىن كورسەتكىمىز كەلدى. وسىناۋ ۇلتتىق قۇندىلىعىمىزدى ناسيحاتتاي بەرەيىك, – دەيدى «Oskemen sadaq atu» فەدەراتسياسىنىڭ پرەزيدەنتى ا.تولەۋحانوۆا.
بىرنەشە كۇنگە سوزىلعان بىرىنشىلىكتىڭ قورىتىندىسى بويىنشا جالپىكوماندالىق ەسەپتە ءبىرىنشى ورىندى تۇركىستان وبلىسىنىڭ ساداقشىلارى يەلەندى. جۇلدەلى ەكىنشى ورىندى باتىستان شىعىسقا ات شالدىرعان ماڭعىستاۋلىق ساداقشىلار قانجىعاعا باستى. ءۇشىنشى ورىن الماتى وبلىسىنىڭ كومانداسىنا بۇيىردى.
ساداقشىلار باق سىناسقان سايىسقا قالا اكىمى جاقسىلىق ومار كەلىپ, جىلى لەبىزىن ءبىلدىرىپ, ساداقشىلاردى قۇتتىقتادى. ءداستۇرلى ساداقتى دامىتۋعا قولداۋ كورسەتۋگە دايىن ەكەنىن دە ايتتى. وسى ورايدا ايتا كەتەرلىگى, ساداق سپورتىنا ەڭ قاجەتى كەڭ عيمارات قانا. ساداقتى دامىتۋعا تۇساۋ بولىپ تۇرعان ماسەلە – وسى. ۇلتتىق سپورتتى دارىپتەپ, جاستاردى جاتتىقتىرىپ جۇرگەن اجار تولەۋحانوۆا وسىدان بەس جىل بۇرىن عانا گلۋبوكوە اۋدانىندا ساداق اتۋ ۇيىرمەسىن اشقان. اينالدىرعان از ۋاقىت ىشىندە شاكىرتتەرى جاقسى ناتيجە كورسەتىپ, جەڭىس تۇعىرلارىنان كورىندى. ەندى وسكەمەندە ۇيىرمە اشىلسا, تاعى دا سۇرمەرگەندەر سۇرىپتالارى ءسوزسىز. ال اجاردىڭ ءوزى استانادا وتەتىن بەسىنشى دۇنيەجۇزىلىك كوشپەلىلەر ويىنىنا قاتىسىپ, قازاقتىڭ نامىسىن قورعايدى.
وسكەمەن
