مازمۇندى ءىس-شارانىڭ ماقساتى – «وركەن» ءبىلىم بەرۋ گرانتىنا ۇمىتكەرلەر اراسىندا رەزەرۆتىك تىزىمدە تۇرعان اۋىل مەكتەبىندە وقيتىن, سونىڭ ىشىندە الەۋمەتتىك جاعىنان از قامتىلعان وتباسىدان شىققان 7-سىنىپتىڭ ءبىر وقۋشىسىنا NIS تۇلەكتەرى اتىنان زياتكەرلىك مەكتەپتە وقۋعا قاجەتتى قاراجات جيناۋ. بىلتىر تۇركىستان وبلىسى ءشاۋىلدىر اۋلىنىڭ وقۋشىسىنا ءدال وسىنداي گرانت بەرىلىپ, ونىڭ وقۋ اقىسىن تولىق تولەۋ ءۇشىن ەكى قايىرىمدىلىق بالى وتكەن ەدى. بيىل بۇل وقۋشى شىمكەنت قالاسىنداعى حيميا-بيولوگيا باعىتىنداعى زياتكەرلىك مەكتەپتىڭ وقۋ جىلىن ۇزدىك ءبىتىردى.
قايىرىمدىلىق بالدا ءسوز العان «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى ءانۋار جانعوزين ءىس-شارانىڭ ماڭىزىنا توقتالىپ, وعان كەلىپ قاتىسقان تۇلەكتەرگە ريزاشىلىعىن ءبىلدىردى.
– «Alumni NIS» قاۋىمداستىعى – ءبىزدىڭ ۇلكەن بايلىعىمىز. ءبىز تاجىريبە الماسىپ, ءبىر-ءبىرىمىزدى قولداۋ ارقىلى بيىك بەلەسكە قول جەتكىزە الامىز. ءبىز – ۇلكەن وتباسىمىز, سوندىقتان ءبىزدىڭ كۇشىمىز بىرلىكتە ەكەنىن ەستەن شىعارمايىق. الەمدى ىزگىلىك, مەيىرىمدىلىك, قايىرىمدىلىق ارقىلى جاقسى جاققا وزگەرتۋگە بولادى. بۇگىنگى بال تەك قايىرىمدى ءىس جاساۋ عانا ەمەس, سونىمەن بىرگە تاماشا كەزدەسۋ الاڭى دەر ەدىم. وسى زالعا ءتۇرلى سالانىڭ وكىلى جينالدى. سوندىقتان بۇل ءىس-شارا بارىمىزگە جىلى شۋاعىن توگىپ, جاڭا مۇمكىندىك سىيلايتىنىنا سەنەمىن. شىن مانىندە, زياتكەرلىك مەكتەپتەر سىزدەرگە كوپ مۇمكىندىك بەردى. ساپالى ءبىلىم مەن ادامي اسىل قۇندىلىقتى بويلارىڭىزعا ءسىڭىردى. ەندى ءبىلىم العان مەكتەپتەرىڭىزدى, وقۋشىلاردى جان-جاقتى قولدايتىن ۋاقىت كەلدى, – دەدى ۇيىمنىڭ باسقارما توراعاسى.
ءىس-شارا بارىسىندا نازارباەۆ زياتكەرلىك مەكتەپتەرى مەن «SmarTestPrep» كومپانياسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. ەكىجاقتى كەلىسىم زياتكەرلىك مەكتەپ وقۋشىلارى ءۇشىن جاڭا مۇمكىندىك بەرەدى. الداعى ۋاقىتتا جۇلدە قورى 3 ميلليون تەڭگە بولاتىن بايقاۋ وتكىزىلمەك. سونىمەن بىرگە وقۋشىلارعا ەمتيحانعا دايىندالۋ ءۇشىن شاعىن كۋرستان (IELTS/SAT/NUET) ءوتۋ, شەتەلدە وقۋ جانە ت.ب. قىزمەت ءتۇرى تەگىن ۇسىنىلادى.
قايىرىمدىلىق بالعا بىرىككەن ۇلتتار ۇيىمى, پارلامەنت سەناتى, ۇلتتىق بانك, «استانا» حالىقارالىق قارجى ورتالىعى, KPMG, «Ernst & Young», «Deloitte», «Binance», «Alstom», «Dyson», «PricewaterhouseCoopers», «Kaspi.kz», «Beeline» جانە باسقا دا جەتەكشى وتاندىق جانە حالىقارالىق ۇيىمدار مەن كومپانيالاردا قىزمەت ەتەتىن, سونداي-اق «Ivy League» مەن QS رەيتينگىندەگى ۇزدىك جوعارى وقۋ ورىندارىندا وقيتىن تۇلەكتەر قاتىستى.
ولاردىڭ اراسىندا الماتى قالاسىنداعى فيزيكا-ماتەماتيكا باعىتىنداعى زياتكەرلىك مەكتەپتىڭ تۇلەگى ادەلينا لۋتسەنكو دا بار. بۇگىندە ول ازاماتتىق اۆياتسيا اكادەمياسىنىڭ ۇشقىش-نۇسقاۋشىسى بولىپ جۇمىس ىستەيدى. بيىل كوكتەمدە ادەلينا نۇسقاۋشى جانە ستۋدەنت قىزداردان قۇرالعان وقۋ ۇشاعىن اۋەگە كوتەردى. بۇل وقۋ تاجىريبەسى تاريحىندا العاش رەت بولدى.
– قايىرىمدىلىق بالى – تەك دوستارىمىزبەن كەزدەسۋ عانا ەمەس, تۇلەكتەر قاۋىمداستىعىنىڭ باستاماسىن قولداۋعا باعىتتالعان ەرەكشە ءىس-شارا. مەن NIS-تە ساپالى ءبىلىم الدىم. سوندىقتان بۇل ءبىلىم وشاعى وقۋعا ىنتالى, بىراق قارجىلىق قولداۋدى قاجەت ەتەتىن بالالارعا قولجەتىمدى بولعانىن قالايمىن. ءبىزدىڭ ارقايسىمىز وسكەلەڭ ۇرپاقتىڭ دامۋىنا ءوز ۇلەسىمىزدى قوسۋعا ءتيىسپىز. مەن وسىنداي ماڭىزدى ءىستىڭ باسى-قاسىندا بولعانىمدى ماقتان ەتەمىن, – دەدى ول.
