فرانتسيا وسىمەن ءۇشىنشى مارتە جازعى وليمپيادا ويىندارىن وتكىزىپ جاتىر. بۇل جولعى جازعى وليمپيادا ويىندارىنىڭ رەسمي اشىلۋ سالتاناتى سپورت نىسانىندا ەمەس, سەنا وزەنىنىڭ ۇستىندە وتەدى. قاتىسۋشى مەملەكەتتەردىڭ دەلەگاتسياسى سۋ بەتىندە قوزى كوش جەردى قايىقپەن ءجۇزىپ شىعادى. ەۋروپانىڭ ەڭسەلى قالاسىنىڭ كورىكتى جەرلەرىن كوكتەي وتەتىن كوڭىلدى كەرۋەن كوشىندە ءبىزدىڭ ەلدەن بارعان دەلەگاتسيانى تۋ ۇستاپ بوكسشى اسلانبەك شىمبەرگەنوۆ پەن جەڭىل اتلەت ولگا سافرونوۆا باستاپ شىعادى.
سپورتتىڭ 25 تۇرىنەن 92 ليتسەنزيانى يەلەنگەن 80 سپورتشى دوداعا قوسىلادى. امەريكالىق تالداۋ كومپانياسىنىڭ قورىتقان بولجامى بويىنشا ەلىمىزدىڭ سپورتشىلارى پاريج جازعى وليمپياداسىنان 2 التىن, 3 كۇمىس, 5 قولا مەدال ولجالاۋى مۇمكىن. بىراق بۇل تەك پايىم عانا, ناقتىسىن دودا ايقىندايدى. ءۇش جىل بۇرىن جاپونيانىڭ توكيو قالاسىندا وتكەن جازعى وليمپيادا ويىندارىندا سپورتشىلار 8 قولا مەدالدى مىسە تۇتىپ, جالپى ەسەپتە 83-ساتىعا تۇراقتاعان ەدى.
پاريج جازعى وليمپياداسىندا سپورتشىلارعا قالايدا التىن مەدال الۋ مىندەتى جۇكتەلدى. بۇل وليمپياعا 80 سپورتشىنى باپتاپ 67 باپكەر, 15 دارىگەر, پسيحولوگ سىندى مامانداردان جاساقتالعان عىلىمي كەشەندى توپ قوسا بارا جاتىر. بۇرىن-سوڭدى سپورتشىلاردىڭ جەكە باپكەرلەرى ءدال مۇنداي قالىڭ شوعىر بولىپ بارعان ەمەس. مەملەكەت تاراپىنان كورسەتىلگەن قامقورلىق پەن قولداۋدىڭ قايتارىمى بولماسا, ساڭلاققا سەرت!
