مەتاللۋرگتەر جاڭا ءۇي مەن بالاباقشا سىيلادى

ال الىپ  زاۋىتقا جاقىن ورنالاسقان قالامىزدىڭ جاڭا اۋدانى اتىنا زاتى ساي بولىپ, مۇمكىن, الداعى جىلدارى “قازاقستان-2030” دەپ تە اتالار... ENRC كورپوراتسياسىنىڭ قۇرامىنا ەنەتىن وبلىس ور­تا­لى­عىنداعى “قازاقستان اليۋمي­نيى” اكتسيونەرلىك قوعامىنىڭ  جۇ­مىسشىلارى مەن قىزمەتكەر­لە­رى ءۇشىن بۇدان ارتىق قانداي قۋانىش بولسىن. زاۋىت باس­شى­لى­عى ەلباسىنىڭ بيىلعى جول­داۋىندا ايتىلعان مەكتەپ جا­سى­نا دەيىنگى بوبەكتەردى وقىتۋ مەن تاربيەلەۋدى قامتاماسىز ەتۋدى ارتتىرۋعا باعىتتالعان “بالاپان” باعدارلاماسىن وسىلاي ورىنداي باستادى. ءوندىرىس ورنىنىڭ ءوزى   جاقىن ورنالاسقان قالاداعى ۆو­رۋ­شين كوشەسىندەگى  240 ورىندىق بالاباقشا قۇرى­لى­سى  ءبىر جىل­دىڭ ىشىندە اياقتالدى. مەتاللۋرگ­تەر ايتقان سوزدەرىندە تۇردى. بالاباقشا تۇگەلىمەن جاڭا زامان تا­لاپتارىنا ساي جاب­دىق­تالدى. شەت تىلدەرىن  ۇيرەتۋ جانە كوم­پيۋ­تەرلىك ساۋاتتى­لىق­قا باۋلۋ, دەنە شىنىقتىرۋ جانە مۋزىكا الەمى زالدارى سياقتى ارنايى  كا­بينەتتەر جۇيەسى بار. مۇندا كەلەتىن كىشكەنتايلار ورىس جانە قازاق تىلدەرىندە  وقىپ-ۇيرەنىپ, تاربيە الادى. زاۋىت باسشىسى الماس يبرا­گيموۆتىڭ ۇسىنى­سى­مەن تەك زاۋىت جۇمىسشى­لارى­نىڭ عانا ەمەس, وسى اۋدان كو­لە­مىندە تۇراتىن قالا تۇرعىندارى­نىڭ  بالالارى  ءۇشىن دە بالاباق­شا ەسىگى اشىق. ال وبلىس اكىمى باقىتجان سا­عىن­تاەۆتىڭ اي­تۋ­ىن­شا, بيىلعى جىلدىڭ سوڭىنا قاراي  وڭىردە 19 بالاباقشا قايتادان قالپىنا كەلتىرىلىپ, جالپى ءبىلىم بەرەتىن مەكتەپتەر جانىنان 83 شاعىن ورتالىقتار  اشىلادى. تاعى ءبىر قۋا­نىشتى جاعداي, بالاباقشا جانىنان 125 پاتەرلى ون قاباتتى  تۇرعىن ءۇي پاي­دالانۋعا بەرىلدى. زاۋىت باس­شىلىعى وسىمەن ەكىن­شى رەت ءوز جۇمىسشىلارى مەن قىز­مەتكەر­لەرىنە جارقىراعان, جاڭا پاتەرلەر سىيلاپ وتىر. الىپ كورپوراتسيا قابىلداعان 2023 جىلعا دەيىنگى الەۋمەتتىك باعدارلامالار اياسىندا بالا­باق­شالار, تۇرعىن ۇيلەر, باسقا دا الەۋمەتتىك-تۇرمىستىق نى­ساندار سالۋ جۇيەسى جوسپار­لا­نىپتى. بۇل ماقساتقا  جالپى قۇنى 45 ميل­ليون اقش دوللارىن جۇمساۋ قاراستىرىلعان كورىنەدى. فاريدا بىقاي. پاۆلودار. _______________ سەمەيلىك پوشتاشىلار جەڭىمپاز اتاندى ادەتتە پوشتا قىزمەتكەرلەرى­نىڭ اتىنا سىن كوپ ايتىلىپ جا­تاتىنى راس. ويتكەنى, باسىلىم باعالارى جىل سايىن شارىقتاپ, سوعان قاراماستان ونىڭ وقىرمان قولىنا كەش ءتيىپ جاتاتىنى دا, قايسىبىر حات-حابارلاردىڭ قولدى بولىپ كەتەتىنى دە وتىرىك ەمەس. “قازپوچتا” اكتسيونەرلىك قو­عامىنا قاراستى سەمەي قالالىق بايلانىس تورابىنىڭ ۇجىمىنا مۇنداي وكپە-رەنىشتىڭ قاتىسى جوق پا دەيمىز. بۇل ۇجىمعا رەس­پۋبليكامىزدىڭ قۇرمەتتى بايلا­نىس­شىسى, ءوز ءىسىنىڭ بىلگىرى ما­نار­بەك ءمولداراحيموۆتىڭ باس­شىلىق ەتە باستاعانىنا ونداعان جىلدىڭ ءجۇزى بولدى. كورشىلەس ەكى وبلىس بىرىكتىرىلگەننەن بەرگى جەردە دە بىرقاتار قالا, اۋدان, سونداي-اق اۋىلدىق وكرۋگتەر اتالعان بايلانىس تورابىنىڭ قىزمەتىن پايدالانۋدا. سولار­دىڭ بارىنە كۇندەلىكتى باسى­لىم­دار مەن حات-حابارلار ۋاقىتىندا جەتكىزىلۋدە. مۇنىڭ سىرتىندا بۇلار وزدەرىنە قاراستى ۋچاس­كە­لەردەگى زەينەتكەرلەرگە زەينەت­اقى­سىن دا ەشقانداي داۋ-داماي­سىز دەر كەزىندە جەتكىزىپ بەرىپ كەلەدى. سونداي-اق, قايسىبىر ەلدى مەكەندەردە بۇرىن جابىلىپ قال­عان پوشتا ۇيلەرى قايتادان اشى­لا باستادى, ياكي ولار جاڭادان تۇرعىزىلۋدا. وسى ورايدا, سەمەي قالالىق پوشتا تورابىنا ءوز تاراپى­مىز­دان ايتار العىسىمىز دا جوق ەمەس. ويتكەنى, وعان قاراستى ەلدى مەكەندەردە ەل گازەتى “ەگەمەن­نىڭ” تارالىمى جىل وتكەن سايىن ارتا ءتۇسىپ كەلە جاتسا, سول جەتىس­تىكتە اتالعان ۇجىمنىڭ دا ۇلەسى بارشىلىق. ونىڭ ۇستىنە وبلىس ورتالىعى وسكەمەندە شىعىپ جاتقان ءبىزدىڭ باسىلىمنىڭ سول كۇنى مۇنداعى وقىرماننىڭ قو­لى­نا تيۋىنە جاعداي جاساپ وتىر­عان دا وسىلار. مىنە, سونىڭ ءبارى ەسكەرىل­گەندىكتەن بولار, جۋىردا بۇلار وتكەن جىلدىڭ قورىتىندىسىمەن حالىققا پوشتا جانە قارجى قىز­مەتىن كورسەتۋدەگى ۇزدىك كور­سەت­كىشتەرىمەن وبلىس بويىنشا جەڭىمپاز اتانىپ, گران-پري ءجۇل­دەسىن يەلەندى. “حالىققا قىزمەت كورسەتۋ ءىسىن الداعى ۋاقىتتا دا جاقسارتا ءتۇسۋ – ءبىزدىڭ باستى مىندەتىمىز”, دەيدى ماناربەك سادىق ۇلى. داۋلەت سەيسەن ۇلى. سەمەي.