كوماندا مۇشەلەرىنىڭ ءبىرى يلفات ابدۋللين قازاقستاندىق وليمپياداشىلاردىڭ قالاي ءومىر سۇرەتىنىن اڭگىمەلەپ بەردى.
- ءبىز بۇگىن تاڭەرتەڭ جايعاستىق. تەك تاڭعى اس ءىشىپ ۇلگەردىك. ءبىزدىڭ كوماندا قازاقستان قۇراماسى ساپىنان العاش بوپ ورنالاستى. ەندى قالعان سپورتشىلارىمىزدى قارسى الامىز. جاعداي جاقسى. وليمپيادا اتموسفەراسى كەرەمەت سەزىلەدى. ءبارى ادەمى ءارى جايلى. اسحانا جايلى تولىق ەشتەڭە ايتا المايمىن. ازىرگە, مازىرمەن تولىق تانىسپادىق. مۇندا ءبارى بار دەپ ويلايمىن. ودان بولەك, قوسىمشا تاماقتانۋ ورىندارى, كوفەحانالار بار, - دەيدى ابدۋللين.
ونىڭ ايتۋىنشا, تۇرعىن ۇيلەر جايلى ءارى ىڭعايلى.
«نومەردە بىزگە كەرەكتىنىڭ ءبارى بار. تەك كونديتسيونەر جوق (كۇلدى). دەسە دە, وليمپيادالىق اۋىلداعى جاعدايدىڭ جاقسى ەكەنىن ايتقىم كەلەدى. ەرىكتىلەر جاقسى كومەكتەسىپ جاتىر», - دەيدى سپورتشى.
وليمپيادالىق اۋىلدا 14,5 مىڭداي ادام تۇرادى. ونىڭ ىشىندە 9 مىڭ سپورتشى بار. قازاقستان كومانداسى سپورتتىڭ 25 تۇرىنەن 80 سپورتشىنى جارىسقا قوسادى.
