جەتىسۋ وبلىسىنىڭ پروكۋراتۋراسى ءبىلىم بەرۋ مەكەمەلەرىندە بالالار ءۇشىن قاۋىپسىز ورتانى قامتاماسىز ەتۋگە تەرىس اسەر ەتكەن 200-دەن استام زاڭبۇزۋشىلىقتى انىقتادى.
ماسەلەن, سارقان, قاراتال جانە پانفيلوۆ اۋداندارىنداعى 12 بالاباقشانىڭ جانىندا جاياۋ جۇرگىنشىلەر وتكەلدەرى مەن "بالالار" بەلگىلەرى جوق.
- سارقان جانە الاكول اۋداندارىنداعى ەكى بالاباقشانىڭ اۋماعى تولىق قورشالماعان, بۇل بوگدە ادامداردىڭ بالاباقشالار اۋماعىنا كەدەرگىسىز كىرۋىنە مۇمكىندىك بەردى.
پانفيلوۆ اۋدانىنىڭ 55 جەكە بالاباقشاسىندا "شاقىرۋ دابىل تۇيمەسى" جۇيەسى جوق. 40 بالاباقشادا ءورت قاۋىپسىزدىگىن حابارلاۋ جۇيەسى جۇمىس ىستەمەيدى, ال ەكى بالاباقشادا ولار مۇلدەم بولمادى. الاكول, ەسكەلدى جانە سارقان اۋداندارىنىڭ جەتى بالاباقشاسىندا بەينەباقىلاۋ كامەرالارىنىڭ كوپشىلىگى جۇمىس ىستەمەيدى.
اقسۋ, سارقان اۋداندارى مەن تەكەلى قالاسىنىڭ 9 بالاباقشاسى ءوز قىزمەتىن مەرزىمى وتكەن سانيتارلىق قورىتىندىلار نەگىزىندە جۇزەگە اسىردى. ال كەيبىر جاعدايلاردا مەرزىمى وتكەن مەديتسينالىق پرەپاراتتار ساقتالعان. اقسۋ اۋدانىنىڭ 8 بالاباقشاسىندا ىشەك تاياقشالارى تابىلدى, - دەلىنگەن حابارلامالا.
ەڭبەك زاڭناماسىنىڭ (قر ەڭبەك كودەكسىنىڭ 26-بابى) تالاپتارىنا قايشى, وبلىستىڭ بالاباقشالارىندا بۇرىن قاساقانا قىلمىس جاساعانى ءۇشىن قىلمىستىق جاۋاپكەرشىلىككە تارتىلعان 11 ادام جۇمىس ىستەگەن.
سونىمەن قاتار, پروكۋرورلار كەربۇلاق اۋدانىنىڭ بالاباقشالارىندا جالپى سوماسى 25 ميلليون تەڭگەدەن استام بيۋدجەت قاراجاتىن جىمقىرۋ دەرەكتەرىن انىقتادى, ولار بويىنشا سوتالدى تەرگەۋ باستالعان.
بارلىق انىقتالعان زاڭبۇزۋشىلىقتار بويىنشا ولاردى جويۋ تۋرالى 22 قاداعالاۋ اكتىسى ەنگىزىلدى, 40 ادام اكىمشىلىك جاۋاپكەرشىلىككە, 7 ادام تارتىپتىك جاۋاپكەرشىلىككە تارتىلدى.