شىعىس قازاقستان وبلىستىق ءماسليحاتىنىڭ كەزەكتەن تىس XIV سەسسياسىندا جاڭا قۇرىلعان اۋدانداردى دامىتۋعا قوسىمشا قارجى بولىنەتىنى ءسوز بولدى. قارجى ەسەلەنىپ, ەل ىرگەسى بۇتىندەلىپ جاتسا, مارقاكول ەرتەڭ-اق ىرگەلى اۋدانعا اينالادى.
ەستەرىڭىزدە شىعار, كوكتەم تۋا وڭتۇستىكتەن وتىزعا جۋىق تۇرعىن شىعىس قازاقستان وبلىسىنا ارنايى كەلىپ, ەل-جەردىڭ جاي-كۇيىمەن تانىسقان. سولاردىڭ ىشىندە مارقاكولگە بەس وتباسى مويىن بۇرىپ, اقبۇلاق اۋلىنا كوشىپ كەلدى. ولاردىڭ ورنالاسۋىنا جەرگىلىكتى اكىمدىك قاجەتتى كومەك قولدارىن سوزدى.
– مارقاكول اۋدانىن ارالاپ, اۋىلداردى كورىپ قايتقان ەدىك. ءسويتىپ, اقبۇلاق اۋلى ۇنادى, ماماندىعىما ساي جۇمىس تابىلدى. وتباسىمىزبەن اقىلداسىپ, كوشىپ كەلدىك. بەس بالام بار, ۇشەۋى مەكتەپتە وقىسا, بىرەۋى بالاباقشاعا بارادى. ەندى بىرەۋى كوللەدجگە وقۋعا تاپسىردى. ءوزىم – حيميا جانە بيولوگيا ءپانىنىڭ مۇعالىمىمىن, – دەيدى قونىس اۋدارعان مەرەكە كەرىمبەكقىزى.
بۇل جولى كوشپەن ىلەسە جەر شالۋعا كەلگەن وڭتۇستىكتىڭ تۇرعىندارىنا ۇيىمداستىرۋشىلار مارقاكول ءوڭىرىن ارالاتىپ, شەكارا شەبىندەگى اۋىلداردى تاعى تانىستىردى.
– جىل باسىندا شىمكەنت, تۇركىستان قالالارىنا ارنايى جۇمىس ساپارىمەن بارىپ, شىعىس وڭىرىنە كوشۋگە نيەت بىلدىرگەن وتىزعا جۋىق ادامدارمەن اڭگىمەلەسكەنبىز. ولار مامىردا ارنايى كەلىپ, مارقاكول اۋدانىن ارالاپ قايتقان. ناتيجەسىندە, بەس وتباسى كوشىپ كەلسە, تاعى بىرنەشەۋى جەر كورىپ قايتۋعا بەكىنگەن. وڭتۇستىكتەن تۇرعىنداردى كوشىرىپ اكەلۋ جۇمىسىن جالعاستىرامىز. جالپى, وڭىرىمىزگە كوشىپ كەلۋشىلەرگە مەملەكەت تاراپىنان كومەك كورسەتىلەدى, – دەيدى وبلىستىق ەڭبەك موبيلدىگى ورتالىعىنىڭ ديرەكتورى اسەل قايىربەكوۆا.
ايتا كەتەيىك, شىعىس قازاقستان وبلىسىنداعى بىرقاتار اۋدانعا ارنايى كۆوتا بولىنگەن. قونىس اۋدارۋعا بەرىلەتىن بىررەتتىك سۋبسيديا بيىل 70 ايلىق ەسەپتىك كورسەتكىشكە تەڭەلدى. دەمەك 258 440 تەڭگە. بۇل – وتباسىنداعى ءاربىر ادامعا بەرىلەتىن تولەم. ال ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50 پايىزىن وتەيدى. بۇل سەرتيفيكات قۇنى 4 282 720 تەڭگەدەن اسپايتىن باسپانا الۋعا بەرىلەدى.
– جاڭادان قۇرىلعان مارقاكول اۋدانىندا ادام سانىن كوبەيتۋ كەرەك. ءوزىم تۋعان اۋىلىم اقبۇلاققا بىلتىر دا بىرنەشە وتباسىنىڭ كوشىپ كەلۋىنە سەپتىگىمدى تيگىزگەنمىن. بيىل دا بيلىك وكىلدەرىمەن بىرگە وڭتۇستىكتىڭ تۇرعىندارىن شىعىسقا كوشىرۋگە اتسالىسىپ ءجۇرمىن. كوشىپ كەلگەن تۇرعىنداردى قارسى الىپ, ۇيگە قاجەتتى زاتتارىن الىپ بەردىك, – دەيدى اقبۇلاق اۋلىنىڭ تۋماسى, كاسىپكەر باۋىرجان جاۋعاشاروۆ.
جوعارىدا اتاپ وتكەندەي, شىعىس قازاقستان وبلىستىق ءماسليحاتىنىڭ كەزەكتەن تىس XIV سەسسياسىندا وبلىستىق بيۋدجەت تالقىلانعان. ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى فارحاد بەلبەەۆتىڭ مالىمەتىنشە, 2024 جىلعا ارنالعان وبلىستىق بيۋدجەتتى جاڭا قۇرىلعان اۋداندار اراسىندا قايتا ءبولۋ نەگىز بولعان. كاتونقاراعاي جانە كۇرشىم اۋداندارىنىڭ بيۋدجەتتەرىنەن 2 992,5 ملن تەڭگە بەرۋ كوزدەلگەن. اتالعان قاراجات ۇلكەن نارىن جانە مارقاكول اۋداندارىن دا دامىتۋعا جۇمسالادى. سونىمەن قاتار وسى اۋداندارداعى مەملەكەتتىك ورگانداردىڭ ماتەريالدىق-تەحنيكالىق بازاسىن نىعايتۋعا 2 ملرد تەڭگە قاراستىرىلعان.
جۇمىس تۇرالاپ تۇرعان جوق. ماسەلەلەر رەت-رەتىمەن شەشىمىن تاۋىپ كەلەدى. ەڭ باستىسى, وڭتۇستىكتەن تۇزىلگەن كوش لەگى ارتا بەرسىن. مارقاكولدىكتەردىڭ دە تىلەگى – وسى.
شىعىس قازاقستان وبلىسى,
مارقاكول اۋدانى
