فوتو: gov.kz
اتالعان وقۋ-جاتتىعۋدىڭ جەتەكشىسى, قارۋلى كۇشتەردىڭ دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەەۆتىڭ ايتۋىنشا, وتاندىق جانە بەلارۋستىك دەسانتشىلار بىرىڭعاي جاۋىنگەرلىك تاپسىرمانى ورىنداي وتىرىپ, بىرىككەن ەكى بولىمشەنىڭ قۇرامىندا ارەكەت ەتەتىن بولادى.
«جاتتىعۋعا قاتىسۋشىلار ءبىر بولمەگە ورنالاستىرىلعان, بىرگە تاماقتانادى. سول ارقىلى ءبىر-ءبىرىنىڭ سالت-ءداستۇر, ادەت-عۇرپىمەن جاقىنىراق تانىسىپ, باۋىرلاستىق كۇشەيە تۇسەدى», دەپ اتاپ ءوتتى ا.جۇماكەەۆ.
بەلسەندى ءىس-قيمىلدارعا دەيىن بەلارۋستىك داسانتشىلار تاۋ دايىندىعىنىڭ نەگىزدەرىن يگەردى. پوليگوندا قاجەتتى وقۋ ورىندارى دايىندالدى. قازاقستان دەسانتتىق-شابۋىلداۋ اسكەرلەرى الپىلىك روتالارىنىڭ نۇسقاۋشىلارى ولاردى قاۋىپسىزدىك شارالارىمەن, تاۋ دايىندىعى جابدىقتارىمەن, جابدىقتاۋ ەلەمەنتتەرىمەن, ساقتاندىرۋ جانە ءوزىن-ءوزى ساقتاندىرۋ نەگىزدەرىمەن, ءتۇرلى توراپتاردى توقۋمەن, ءتۇسۋ, كوتەرۋ جانە سۋ توسقاۋىلدارى ارقىلى ءوتۋ ەلەمەنتتەرىمەن تانىستىردى. فەلدشەرلەر كۋرسى شەڭبەرىندە وزىنە-ءوزى كومەك كورسەتۋگە, العاشقى مەديتسينالىق جاردەمگە جانە جارالىلاردى تاۋ جاعدايىندا تاسىمالداۋعا ەرەكشە نازار اۋدارىلدى.
تاۋلى جەرلەردە ءومىر ءسۇرۋ ساباقتارىندا اسكەري قىزمەتشىلەردى قولدا بار قۇرالداردان پەشتەر سالۋ, تۇتاندىرعىش زاتتار بولماعان كەزدە ءارتۇرلى تاسىلدەرمەن وت جاعۋ نۇسقالارىمەن, سۋدى زارارسىزداندىرۋ جانە جەرگىلىكتى فلورا مەن فاۋنادان تاماق دايىنداۋ تاسىلدەرىمەن تانىستىردى.
پراكتيكالىق ساباقتاردا ەكى ەلدىڭ دەسانتشىلارىنىڭ بىرىككەن توپتارى جاۋىنگەرلىك اتىستاردى قامتىعان شابۋىلداۋ مەن تورۋىلداۋدى ۇيىمداستىرۋ جانە جۇرگىزۋ ەلەمەنتتەرىن پىسىقتادى. سونداي-اق قازاقستان دەسانتتىق-شابۋىلداۋ اسكەرلەرىنىڭ قولدانىسىنداعى ۇشقىشسىز ۇشۋ اپپاراتتارىنىڭ تاكتيكالىق-تەحنيكالىق سيپاتتامالارىمەن, ولاردى بيىك تاۋلى جەرلەردە قولدانۋ مۇمكىندىكتەرىمەن تانىستى.
ەستەرىڭىزگە سالايىق, جاتتىعۋعا قازاقستان مەن بەلارۋستىڭ 350-دەن استام دەسانتشىسى قاتىسىپ جاتىر. ونىڭ بەلسەندى كەزەڭى وسى ايدىڭ 17-19 كۇندەرى وتەدى.
