«استانا – پاريج 2024: پاراسپورت جانە پاراليمپيادا ويىندارى – باستى نازاردا» دەگەن اتاۋمەن وتكەن فوتوكورمەنى كوپشىلىك تاماشالادى. فرانتسيانىڭ ۇلتتىق مەرەكەسىنە وراي ءارى پاريج وليمپياداسىنىڭ باستالۋىنا ەكى اپتا قالعاندا فرانتسيانىڭ قازاقستانداعى ەلشىلىگى, ۇلتتىق پاراليمپيادا كوميتەتى, استانا قالاسىنىڭ اكىمدىگى جانە دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى ۇيىمداستىرعان كورمەدە سپورتشىلاردىڭ سۋرەتى جۇرت نازارىنا ۇسىنىلدى. ءار پورترەتتىڭ تۇسىنداعى QR-كود ارقىلى تاماشالاۋشىلار سپورتشى تۋرالى تەرەڭىرەك تانىسىپ بىلەدى.
اتىراۋ كوپىرىندەگى كورمەنى 14 تامىزعا دەيىن قالا تۇرعىندارى مەن قوناقتارى تاماشالاي الادى. فرانتسۋز فوتوگرافى ديدە ەشلار مەن وسپان ءالىنىڭ نىساناسىنا ىلىنگەن فوتوداعى كەي پاراسپورتشىلار پاريج جازعى پاراليمپياداسىندا ەل ءۇمىتىن ارقالايدى. سولاردىڭ ءبىرى – جاڭىل بالتاباەۆا. پاراكانوەدەن العاش رەت دوداعا قوسىلاتىن قايسار قىزدىڭ بۇل سپورت تۇرىمەن شۇعىلدانعانىنا ءبىر جىلدان اسىپتى.
«مەن بۇعان دەيىن قىسقى سپورت, ونىڭ ىشىندە شاڭعىدان پاراليمپيادا ويىندارىنا قاتىستىم, بىراق جۇلدە بۇيىرمادى. پاراكانوە سپورتىمەن شۇعىلدانعانىما ءبىر جىلدان استى, وسى ۋاقىت ارالىعىندا پاراليمپيادا جولداماسىن ولجالادىم, مەن ءۇشىن زور جەتىستىك. سەبەبى ماجارستاندا وتكەن الەم چەمپيوناتىندا دۇنيەجۇزىنىڭ تاڭداۋلى ەسكەكشىلەرىمەن دوداعا ءتۇسىپ, ليتسەنزيا يەلەندىم. ساۋساقتارىمنىڭ جوقتىعىنان جەل سوققاندا ەسكەگىمدى ەسۋ قيىندىق تۋدىردى. سوعان قاراماستان باپكەرىمنىڭ ايتقانىن تىڭعىلىقتى ورىنداپ, ءتورت جىلدا اينالىپ سوعاتىن پاراليمپيادا الامانىنا قاتىسۋعا مۇمكىندىك الدىم. ەندى بارىمدى سالىپ, ازىرلىكتى كۇشەيتەمىن», دەگەن جاڭىل بالتاباەۆا بۇل سپورتتا تەك تارتىپكە باعىنىپ, باپكەردىڭ تالابىن ورىنداي العاندا عانا ناتيجە شىعاتىنىن ايتتى.
قايسار قىز قىسقى سپورتقا قاراعاندا جازعى سپورت ءتۇرى اناۋ ايتارلىقتاي اۋىرلىق ەتپەيتىنىن جەتكىزدى.
«شاڭعى بياتلوننان سايىسقا قاتىسقاندا اياعىما دا كوپ كۇش تۇسەتىن, ۇستىمىزدەگى كيىمنىڭ قالىڭدىعى دا از جۇك ەمەس. جازعى سپورتتا, ونىڭ ىشىندە ەسكەك ەسۋدە ونداي قيىندىق تۋمايدى. بىراق بۇل سپورتتىڭ دا وزىندىك ەرەكشەلىگى بار. كىمنىڭ قاجىر-قايراتى كۇشتى, ءتوزىمى مىعىم, سونداي جاندار عانا ناتيجەگە جەتەدى», دەدى سپورتشى.
ءماجىلىس دەپۋتاتى كەنجەعۇل سەيىتجان مۇنداي ءىس-شارالاردى ءجيى ۇيىمداستىرۋ ارقىلى مۇمكىندىگى شەكتەۋلى جانداردىڭ قايسارلىعى مەن ەڭسەرىپ جۇرگەن سپورتتاعى جەتىستىگىن ناسيحاتتاۋ ماڭىزدى دەيدى. ول پاراسپورتتان سپورتشىلاردىڭ الەمدىك دودالاردا ولجالاعان مەدالى مەن ناتيجەسى جوعارى بولعانىمەن, بولىنەتىن قاراجات الدەقايدا كەمشىن ەكەنىن ايتتى.
«مۇنداي ءىس-شارا نە ءۇشىن كەرەك؟ ەڭ الدىمەن, حالىقتى پاراسپورتتىڭ تىنىس-تىرشىلىگىمەن تانىستىرۋ ءۇشىن قاجەت. كەزىندە گولبول دەگەن سپورتتى دامىتىپ, جەتەكشىلىك ەتتىم, پاراۆەلوسپورت فەدەراتسياسىنىڭ باسشىسى رەتىندە بۇل سالانىڭ وي-قىرىن تەرەڭدەي بىلەمىن. كاسىبي سپورتشىلار سەكىلدى پاراسپورتشىلارعا دا قويىلار تالاپ جوعارى, سايىس كەزىندەگى باسەكەلەستىك تە ءالسىز ەمەس. مۇگەدەكتىگى بار سپورتشىنى وسىنداي دوداعا دايىندايتىن باپكەرگە جۇكتەلەر جاۋاپكەرشىلىك تە, سالماق تا وراسان. بىراق جالاقىسى ماردىمسىز. پارلامەنت مىنبەرىندە بۇل ماسەلەنى دۇركىن-دۇركىن قوزعاپ كەلەمىن. پاراسپورتتى دامىتۋ ارقىلى دا ۇلت ساۋلىعىن نىعايتامىز», دەدى دەپۋتات ك.سەيىتجان.
28 تامىز بەن 8 قىركۇيەك ارالىعىندا وتەتىن پاراليمپيادا ويىندارىنا ساڭلاقتارىمىز 8 سپورت تۇرىنەن 21 جولداما يەلەندى. اتاپ ايتقاندا, پاراپاۋەرليفتينگتەن – 5, پاراجەڭىل اتلەتيكادان – 3, پاراجۇزۋدەن – 4, ۆولەيبولدى وتىرىپ ويناۋدان – 1, پاراۇستەل تەننيسىنەن – 1, پاراتاەكۆوندودان – 3, پاراكانوەدەن – 2 جانە پاراوق اتۋدان 2 جولداما بار.
