«ۇلاعات» قازاق ءتىلىن وقىتۋ باعدارلاماسى باۋىرلاس ەكى ەل مەن ەكى جوعارى وقۋ ورنى اراسىنداعى بايلانىستى نىعايتۋ, ورتاق ءبىلىم بەرۋ باعدارلاماسىن جۇزەگە اسىرۋ ارقىلى قازاقتىڭ ءتىلىن, مادەنيەتىن, ادەت-عۇرپىن, سالت-ءداستۇرىن شەتەلدىكتەرگە ناسيحاتتاۋ ماقساتىندا ۇيىمداستىرىلعان بىرەگەي جوبا.
اتاجۇرتقا كەلگەن تۇرىك باۋىرلاردى ۋنيۆەرسيتەت قازاقتىڭ قوناقجايلىعىن كورسەتىپ, قۇشاق جايا قارسى الدى. شاشۋ شاشىپ, ۇلتتىق ءدام ۇسىندى.
– تۇرىك باۋىرلارعا قازاق ءتىلىن ۇيرەتۋ جوباسىن جۇزەگە اسىرۋعا فيلولوگ-عالىم ورحان سويلەمەز مىرزا مەن كاسىپكەر, ۇلت جاناشىرى ەرلان ءاشىم قولداۋ تانىتىپ وتىر. «ۇلاعات» جوباسى شەڭبەرىندە قوناقتارىمىز «Turan el qazaq sport» ۇلتتىق سپورت جانە ساياتشىلىق ورتالىعىندا بولىپ, قازاقتىڭ ۇلتتىق ويىندارىن تاماشالادى. بوكەتوۆ ۋنيۆەرسيتەتىنىڭ ءتىل ماماندارى كاستامونۋ ۋنيۆەرسيتەتىنىڭ ءبىلىم الۋشىلارىنا قازاق ءتىلىن ۇلكەن قۋانىشپەن ۇيرەتتى. «ۇلاعات» باعدارلاماسى – ءبىلىم الۋشىلاردىڭ قازاق تىلىنە قىزىعۋشىلىعىن ارتتىرۋدى, ءتىل ۇيرەنۋشىنىڭ تۇرمىستىق, الەۋمەتتىك تاقىرىپتاردا سويلەۋ بىلىكتىلىگىن جەتىلدىرىپ, ءتىل ۇيرەنۋشىنىڭ ءتىل ساۋاتتىلىعى مەن ءسوز بايلىعىن, باسقالارمەن قارىم-قاتىناسقا ەركىن ءتۇسۋىن جانە ويلاۋ قابىلەتتەرى مەن دۇنيەتانىمدىق داعدىلارىن كەڭەيتۋدى, ساباق ۇدەرىسىندە العان بىلىمدەرىن تەرەڭدەتىپ, تەوريانى پراكتيكادا قولدانۋ داعدىسىن قالىپتاستىرۋدى كوزدەيتىن بىرەگەي جوبا. الداعى ۋاقىتتا اتالعان جوبا جاندانىپ, جالعاسىن تاۋىپ جاتسا, ءبىزدىڭ دە وقىتۋشىلار, PhD دوكتورانت پەن ماگيسترانتتار تۇرىك ءتىلىن ۇيرەنىپ, بىرلەسكەن عىلىمي ەڭبەكتەر جازۋعا مۇمكىندىك الادى, – دەيدى ۋنيۆەرسيتەتتىڭ باسقارما توراعاسى-رەكتورى نۇرلان دۋلاتبەكوۆ.
تۇرىكتىڭ عالىمى ورحان سويلەمەز سويلەگەن سوزىندە ءبىر اپتا بويى تەك قازاق تىلىمەن بىرگە قازاق ەلىنىڭ مادەنيەتىن تانىپ بىلدىك دەدى.
– كاستامونۋ ۋنيۆەرسيتەتى مەن ە.بوكەتوۆ اتىنداعى قاراعاندى ۋنيۆەرسيتەتى اراسىندا عىلىمي بايلانىس نىعايىپ كەلەدى. جاقىندا كاستامونۋ ۋنيۆەرسيتەتىنىڭ رەكتورى احمەت حامدي توپال قاراعاندىعا كەلگەن ءىسساپارىندا ە.بوكەتوۆ ۋنيۆەرسيتەتىنىڭ باسشىلىعىمەن جۇزدەسىپ, اكادەميالىق ۇتقىرلىق, تاجىريبە الماسۋ جونىندەگى كەلىسىمشارتقا قول قويدى. كاستامونۋ ۋنيۆەرسيتەتىنىڭ ون بەس شاكىرتىنە ە.بوكەتوۆ ۋنيۆەرسيتەتى فيلولوگيا فاكۋلتەتىنىڭ ءتىل ماماندارى قازاق ءتىلىن جەتىك ۇيرەتە ءبىلدى. ءبىز ءبىر اپتا ارالىعىندا قازاق ءتىلىن, قازاق مادەنيەتىن تانىپ بىلدىك. ۋنيۆەرسيتەتتىڭ قوناقجايلىعىنا كوڭىلىمىز دە تولدى, قازاق تىلىنەن ءبىلىمىمىز دە تولىقتى, – دەدى توپتى باستاپ كەلگەن عالىم.
قازاق ءتىلىن ۇيرەنۋگە نيەت بىلدىرگەن ون بەس ءبىلىم الۋشى ۇلتتىق كيىم مەن اشەكەي بۇيىمداردىڭ كورمەسىن تاماشالاپ, قولونەردەن شەبەرلىك ساباعىنا دا قاتىستى. ءدارىسحانادا قازاق تىلىندە العاشقى تانىسۋ ساباعى ءوتتى. تۇرىك باۋىرلار ە.بوكەتوۆ زەرتتەۋ ۋنيۆەرسيتەتىنىڭ قارقارالىداعى وقۋ-دالالىق بازاسىندا قازاق ءتىلى مەن تۇرىك ءتىلى اراسىنداعى ۇقساستىق پەن ايىرماشىلىقتى ءتۇسىنىپ, تۇرمىستىق جاعدايدا قولدانىلاتىن لەكسيكانى مەڭگەرىپ, قازاقشا بەيرەسمي قارىم-قاتىناس ورناتا الاتىن دارەجەگە جەتتى دەسەك ارتىق ايتپايمىز. قازاق ءتىلىن مەڭگەرگەن بارلىق قاتىسۋشىعا ە.بوكەتوۆ ۋنيۆەرسيتەتى سەرتيفيكات تابىستادى.
قاراعاندى وبلىسى
