فوتو: senate.parlam.kz
ريددەردە كوپسالالى اۋرۋحانا سالۋ ماسەلەسىنە ەرەكشە نازار اۋدارىلدى. مۇنداعى ەسكى اۋرۋحانا عيماراتىنىڭ سالىنعانىنا 70 جىلدان استام ۋاقىت وتكەن بولاتىن. سوندىقتان قالا تۇرعىندارى جاڭا قۇرىلىستىڭ اياقتالۋىن اسىعا كۇتىپ وتىر. سەناتور بۋلاۆكينا رەسپۋبليكالىق بيۋدجەتتەن قارجىلاندىرىلاتىن بۇل جوبانىڭ ساقالدى قۇرىلىسقا اينالماۋى ماڭىزدى ەكەنىن اتاپ ءوتتى.
دەپۋتاتتار سونداي-اق وڭىردەگى قازاقستان حالقى اسسامبلەياسىنىڭ وكىلدەرىمەن دە كەزدەستى. كەزدەسۋ بارىسىندا تاۋ-كەن ونەركاسىبىندەگى كادر تاپشىلىعىنا قاتىستى وزەكتى ماسەلەلەر, جوعارى وقۋ ورىندارىندا مامان دايارلاۋعا ارنالعان گرانت سانى از ەكەنى ايتىلدى. سونىمەن قاتار دەنساۋلىق ساقتاۋ مەكەمەلەرىندە ءمامس جەلىسى بويىنشا تولەمدى كەشىكتىرۋ جانە بالالارعا ارنالعان ارناۋلى مەكەمەلەر تاربيەشىلەرىنىڭ جالاقىسىن ارتتىرۋ ماسەلەلەرى دە قوزعالدى.
پارلامەنتشىلەر ساپار اياسىندا د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ جۇمىسىمەن دە تانىستى. سەناتورلار وسى وقۋ ورنىنداعى ستۋدەنتتەر ءىس جۇزىندەگى داعدىلاردى يگەرىپ, اۆتوموبيل جۇيەلەرىنە, اتاپ ايتقاندا, ەلەكتروموبيلدەر مەن گيبريد اۆتوموبيلدەرگە تەحنيكالىق قىزمەت كورسەتۋ جانە دياگنوستيكا جاساۋ ءۇشىن سيمۋلياتسيالىق سىناق جۇرگىزەتىنى تۋرالى حاباردار ەتىلدى.
