وتىرىستى اشقان ماۋلەن اشىمباەۆ ەل پرەزيدەنتى قاسىم-جومارت توقاەۆ بۇۇ-نىڭ ورنىقتى دامۋ ماقساتتارى جونىندەگى سامميتىندە ورنىقتى دامۋ قاعيداتتارى قازاقستاننىڭ نەگىزگى ۇلتتىق ستراتەگيالارى مەن باعدارلامالارىنىڭ وزەگىنە اينالعانىن بىرنەشە رەت اتاپ وتكەنىن اتاپ ءوتتى. سوندىقتان ەلىمىزدە اتالعان ماقساتتارعا قول جەتكىزۋگە باسا ءمان بەرىلىپ وتىر. مەملەكەت باسشىسىنىڭ تاپسىرماسىمەن 2023 جىلى ورنىقتى دامۋ سالاسىنداعى ۇلتتىق ماقسات-مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا قۇرىلدى. اكسەلەراتوردىڭ قىزمەتى وسى ماقساتتارعا قول جەتكىزۋگە ىقپال ەتۋدى كوزدەيدى.
اكسەلەراتوردىڭ نەگىزگى مىندەتى – مەملەكەتتىك قۇرىلىمداردى, عالىمدار مەن ساراپشىلاردى جانە بارلىق مۇددەلى تاراپتى جۇمىلدىرا وتىرىپ, ورنىقتى دامۋ ماقساتتارىنا قول جەتكىزۋدىڭ جاڭا تاسىلدەردى ازىرلەۋ. ءىس-شارا بارىسىندا ساراپشىلار كوماندالارىنىڭ وكىلدەرى جانە ولاردىڭ سەناتور-كۋراتورلارى ەكى ايدا اتقارىلعان جۇمىستى قورىتىندىلادى. ولار قولداعى ناتيجەلەرگە سۇيەنە وتىرىپ, دەنساۋلىق ساقتاۋ, ءبىلىم بەرۋ, ەكونوميكالىق ءوسۋ, قالالاردىڭ تۇراقتى دامۋى جانە باسقا دا سالالار بويىنشا تاۋەكەلدەر كارتاسى مەن تۇجىرىمدامالىق ۇسىنىستارىن ۇسىندى.
«پرەزيدەنت قاسىم-جومارت توقاەۆ ورنىقتى دامۋ ماقساتتارىنا قول جەتكىزۋگە ۇنەمى ۇلكەن كوڭىل ءبولىپ, بۇل باعىتتى ۇلتتىق باسىمدىق رەتىندە بەلگىلەدى. وسىعان بايلانىستى قازاقستان پارلامەنتى اتالعان ماقساتتارعا قول جەتكىزۋ جولىنداعى جۇمىسقا بەلسەندى قاتىسىپ كەلەدى. بۇل ىسكە سەناتتىڭ جوبالىق كەڭسەسى دە قاتىسىپ جاتىر. ءبىز وسى باستاما بارىسىندا اتقارىلعان جۇمىستىڭ ارالىق قورىتىندىلارىن تالقىلادىق. ايتارلىقتاي ىلگەرىلەۋ بار ەكەنىن اتاپ وتكەن ءجون. وسى ۋاقىت ىشىندە ورنىقتى دامۋ ماقساتتارىنىڭ ءتۇرلى باعىتى بويىنشا ارنايى قۇرىلعان كوماندالار ساراپشىلارمەن جانە ءتيىستى ماماندارمەن بىرلەسىپ, ەسەلى ەڭبەك ەتتى. بۇگىنگى كەزدەسۋدە جوبالىق كەڭسە اكسەلەراتورى ماڭىزدى جانە كەلەشەگى زور الاڭ ەكەنىنە كوز جەتكىزدىك», دەدى سەنات سپيكەرى.
سونىمەن قاتار ءىس-شارا كەزىندە اكسەلەراتوردىڭ نەگىزگى ماقساتى زاڭنامانى جەتىلدىرۋدىڭ الەۋەتتى ايماقتارى مەن ورنىقتى دامۋ ماقساتتارىنا قول جەتكىزۋگە كەدەرگى كەلتىرەتىن توسقاۋىلداردى انىقتاۋ ەكەنى ايتىلدى. وسى باعىتتاعى باستامالار پارلامەنت سەناتىنىڭ الداعى قىزمەتىندە نازارعا الىنادى.
