وبلىستىق ءبىلىم باسقارماسى ماماندارىنىڭ ايتۋىنشا, 16 مامىردا باستالعان ۇلتتىق بىرىڭعاي تەستىلەۋ 5 شىلدەگە دەيىن جالعاستى. بيىل وتاندىق وقۋشىلار ۇبت-نى جىلىنا بەس رەت تاپسىردى. ونىڭ ۇشەۋى اقىلى بولسا, ەكى رەت باق سىناپ كورۋ تەگىن. بارلىق تالاپكەر نەگىزگى ۇبت-نى ەكى رەت تاپسىرىپ, ۇزدىك ناتيجەسىمەن گرانت كونكۋرستارىنا قاتىسادى.
شىعىس قازاقستان وبلىسى بويىنشا ۇلتتىق بىرىڭعاي تەستىلەۋگە بيىل 3 847 مەكتەپ تۇلەگىنىڭ 3 176-ءسى قاتىسۋعا تىلەك ءبىلدىردى. سىناققا كىرگەندەر دايىندىقتارىنا قاراي جاۋاپ بەرىپ, ءبىلىم دەڭگەيلەرىن بايقاستى. ءبىلىم سالاسى ماماندارىنىڭ ايتۋىنشا, بيىلعى تەستىلەۋدە ۇپاي كورسەتكىشتەرى بىلتىرعىدان جوعارى سەكىلدى. ارينە, قورىتىندىسى تولىق شىقپاي جاتىپ, ناقتى مىسال كەلتىرۋ قيىن. دەسە دە, كورسەتكىش جامان ەمەس دەسەدى.
– وقۋشىلار سىناقتان سۇرىنبەي ءوتۋى ءۇشىن ۇلكەن جاۋاپكەرشىلىكپەن دايىندالعانىن بايقاپ جۇردىك. ۇلكەن ومىردەگى العاشقى ءارى جاۋاپتى بەلەس ەكەندەرىن سەزىندى. ۇستازدار ۇجىمى دا قولداۋ ءبىلدىرىپ, بارىمىزدى سالدىق. ءوز وقۋشىلارىمىز ءۇشىن تاقىم قىستىق. جالپى, وبلىستا ۇبت قورىتىندىسى جامان ەمەس. بارلىعى اياقتالعان سوڭ كورە جاتارمىز, – دەيدى وسكەمەن قالاسى, №1 ورتا مەكتەپتىڭ ديرەكتورى ءادىل سايلاۋبەك.
ايتقانداي, كۇن-ءتۇن دەمەي ءبىر جىل تەستىلەۋگە دايىندالعاندار جوعارى ۇپايعا قول جەتكىزىپ, قۋانىشتارى قويىندارىنا سىيماي جاتتى. سونىڭ ىشىندە تارباعاتاي اۋدانى قۇيعان اۋىلىنىڭ تۇلەگى وبلىستا 138 بالل جينادى. جوعارى بالل جيناعان ول سالماقتى بايقاۋلاردا دا جوعارى ناتيجە كورسەتكەن. ەندىگى ارمانى – مەنەدجمەنت جانە باسقارۋ ماماندىعى بويىنشا وقۋعا ءتۇسۋ.
– مەكتەپتە ءىس-شارالارعا بەلسەنە قاتىسىپ ءجۇردىم. مەكتەپ پرەزيدەنتى بولدىم. بوس ۋاقىتىمدا ءان ايتىپ, دومبىرا تارتقان ۇنايدى. ۇبت-عا دايىندىقتى بىلتىرعى تامىز ايىنان باستادىم. 2021–2023 جىلدارى اۋداندىق گەوگرافيا ءپانى وليمپياداسىنان 1-ورىن الدىم. جەتىستىگىم ءۇشىن جەتەكشىم گۇلنار وماروۆا اپايعا العىسىم شەكسىز. قوسىمشا تامىزدان ماۋسىم ايىنا دەيىن «juz40_online» كۋرسىندا ءبىلىم الدىم. جوعارى بالل الۋىم, ەڭ باستىسى اتا-انامنىڭ, مەكتەپتەگى ۇستازدارىمنىڭ قولداۋى جانە اتالعان كۋرستىڭ ناتيجەسى دەپ ويلايمىن. قازىرگى كەزدە مەنەدجمەنت جانە باسقارۋ ماماندىعىن تاڭداپ وتىرمىن, – دەيدى ەركە تىنىباەۆا.
سونداي-اق 136 بالل جيناعان دانا قاجىقان زايسان اۋدانى قازاقستان ورتا مەكتەبىنىڭ تۇلەگى. ۇلان اۋدانى ر.مارسەكوۆ اتىنداعى ورتا مەكتەبى تۇلەگى قۋانىش مۇحامەتجان 135 بالدى قورجىنعا سالدى. ارينە, وقۋعا ءتۇسىپ, ۋنيۆەرسيتەت تابالدىرىعىن اتتاعانشا, ارقانى كەڭگە سالۋعا بولماس. دەي تۇرعانمەن, جوعارى ۇپاي سەنىم ۇيالاتادى. ولارعا وبلىستىق ءبىلىم باسقارماسى باسشىلارى دا سەنىم ءبىلدىرىپ وتىر.
– سىزدەرگە جۇرەگىڭىزدى تىڭداپ, وزىڭىزگە ۇنايتىن كاسىپتى عانا ەمەس, جالپى ومىردەگى باعداردى تاڭداۋىڭىزعا تىلەكتەسپىز. بيىك شىڭداردان كورىنىڭىزدەر. ەندىگى جولدارىڭىزدا جاقسى ادامدار جولىعىپ, ماڭىزدى جەتىستىكتەرگە جەتۋدى تىلەيمىز, – دەيدى وبلىستىق ءبىلىم باسقارماسىنىڭ باسشىسى ينەسسا چەرنىشەۆا.
تاعى ءبىر قۋانارلىق جاڭالىق, ەرەكشە ۇلگىدەگى اتتەستات يەگەرى, تارباعاتاي اۋدانى «ى.التىنسارين اتىنداعى ورتا مەكتەپ» كمم وقۋشىسى اياۋجان مۇراتوۆا ۇلتتىق بىرىڭعاي تەستىلەۋ ناتيجەسىندە 139 بالل جيناپ, وبلىس بويىنشا ۇزدىك ناتيجە كورسەتتى. ۇبت-دا قازاق ادەبيەتى ءپانى بويىنشا 50 بالدان 50 بالل جينادى. اياۋجان وبلىستىق جانە رەسپۋبليكالىق زياتكەرلىك وليمپيادالاردىڭ جۇلدەگەرى. «اۋىل بالالارى» رەسپۋبليكالىق وليمپياداسىندا ءى ورىن الىپ, س.امانجولوۆ اتىنداعى شقۋ گرانتىن جەڭىپ العان.
شىعىس قازاقستان وبلىسى
